Manifestación del espáciu pol mé las preposicionis

Hata el inti naidi enantis s’iba precupau pol cúmu entiendi el estremeñu el concetu d’espáciu i la su relación con él. Pa ellu imus a vel ciertas preposicionis i los dos ámbitus en que hugan. É labutau en un croqui, que, inque paiza una mihina enteosu, arrepresenta las destintas rialiais. El cubu arrepresenta un espáciu tridimensional i el cérculu el ámbitu en que furrulan los concetus entroucius pol pa i pol. Las crudis aseñalan algotras rialias tridimensionalis al respetivi el cubu. Las frechas marcan, ena miia lo posibri la movición adrentu-ahuera, arriba-abahu, alatrás-alantri.

Las preposicionis estremeñas aseñalan tres nivelis espacialis, estu es: adrentu, ahuera i pohuera. Ca unu destus ámbitus posein relacionis colas otras dos ependéncias, es idil, adrentu-ahuera/pohuera, ahuera-adrentu/pohuera i pohuera-ahuera/adrentu. Inque en el croqui nu apaicin tolas preposicionis, sí que sí están las emportantis pa espricoteal esta idea d’espáciu. Colamus a espricoteal ca unu los ámbitus i las sus relacionis colos otrus.

Adrentu
Partimus del hechu e que en estremeñu adrentu nu senifica nun primel lugal «hacia dentro», sinu «dentro». En el cubu, arrepresenta el espáciu afechau polos seis lateralis. Pa queal mas craru, pensemus que el cubu es una casa, que el adrentu es lo que s’enhalla atrasinu las paeris, el ahuera es el corral i el límiti son los hastialis —en el croqui el espáciu entri el cérculu i el cubu— i el pohuera es la calli. Las relacionis que desistin, pol tantu, del adrentu án de sel:
—Estáticas, pol enhallalsi adrentu el mesmu, es idil, en, en metá de, adrentu.
—Con movición estrínseca adrentu-ahuera, adrentu-pohuera. Las que aseñalan la movición adrentu-ahuera son ahuera, de, endi i las de adrentu-pohuera, pahuera, de, endi.

Ahuera
El ahuera es el espáciu enmeyataenti esternu c’arrodea el cubu, estu es, el corral. En esta segundera estáncia, el cubu s’entiendi cumu una sola entiá, una sola cosa —casa— u bien cumu dos —la casa i el espáciu dadrentu—. Asina s’estableci que las relacionis sedrán endigualmenti estáticas, del cubu-casa con el ahuera i del adrentu con el ahuera.
—Estáticas. Es mestel idil que el ahuera posei tamién caraiti estáticu i pol velsi arrodeau cumu capaciá intelna, estu es, que el ahuera tie un adrentu i pol tantu tamién un en i un en metá de. Esti valol estáticu nu apaici en el croqui, pol nu hadelu mas efariciosu. Nu estanti, la relación que s’estableci con el cubu dota al ahuera de mas valoris estáticus ependientis la relación cubu-ahuera. Aquina furrulan: encima, embahu, con, unta, contra, escontra, enfrenti, alantri i (al)atrás.
—Movición estrínseca ahuera-pohuera. Son las mesmas relacionis que desistin en adrentu-ahuera, ya que quien s’enhalli ahuera pa rifirilsi a argu que s’enhalla lehoti lo percetibri gasta las mesmas preposicionis añiyendu el matís d’empercitibiliá, enseguráncia i farta d’atinu que preporciona pa i pol. Asín arguin que s’atopi nun campus univelsitáriu se rifirirá al salil del campus ihendu que va pahuera i nu ahuera i idirá que la autuvia cai pohuera el campus.
—Movición intrínseca ahuera-adrentu. Pa las relacionis de movición que partin dahuera i ahilan endrentu se gasta endrentu, an i pol castellanismu adrentu. Endrentu a la escontra e lo que se podrie pensal tie sinu e movición i endica la direción hadia drentu i nu senifica drentu.

Pohuera
El pohuera es tolo que nu s’asiaha enos algotrus dos ámbitus, es idil, el esteriol de verdá, la noción c’aseñala el pallí con relación al allí i al aquí. Aquina tó s’espeta esborrosu, deficurtosu p’asiahal de horma prehisa: es lo endefiniu. Es el mundu mas pallá las paeris, mas pallá lo percetibri. Las relacionis que desistin son lo que vie padrentu i lo que sal pahuera, amás de señas enteosas d’ubicación estática.
—Estáticas. Huncionan de maea estática el poncima, pohuera, pombahu i tamién el arreol. Ena cimera del tó, el comuelgu de lo artu, s’atopa el arribota i en el su lau contráriu el abahoti, que palrandu en distáncia es lo que furrula en el ámbitu el lehoti, frenti al celquina que labuta en el ahuera i en el adrentu. Pa espricoteal c’argu s’enhalla enfrenti, peru nu se sabi esataenti ondi ni pondi cai, si está defrenti del tó u nu, se gasta el ponfrenti.
—Movición entrínseca. Apeninas desisti deferéncia entri lo que s’entra en el corral i en el cubu, namás abemus destinción con pan i padrentu cuandu lo que s’acelca al cubu nu penetra en él.
—Movición estrínseca. Nu se pue hucheal estrínseca del mesmu mó i maea que enos otrus dos ámbitus, polque las relacionis que ain son de movición espacial adrentu el mesmu espáciu del pohuera, es idil, lo que ahila al poncima i al pombahu (pa poncima, pa pombahu) i lo que ahila verticalmenti parriba i pabahu. Nu estanti, estas dos úrtimas preposicionis tamién s’emprean enos ámbitus el adrentu i el ahuera.

Sin embalgu, el estuyu destas preposicionis s’espeta emaseau estruturau i nu siempri furrulan asín las preposicionis ni son toas las almientás aquí las que huncionan. Argu que s’enhalli en metá de pue estalu en el pallí, en el allí, en el aquí, enclusu, del aquina i si m’entallas asina, tamién del dengún sítiu...