Parabras que nu afechan la su vocal final

La tendéncia los estremeñus es afechal las vocalis e i o postónicas i las finalis, peru la verdá es que nu siempri aconteci asina. Sabin los que falan estremeñu que angunas parabras nu amenidan en –u ni en –i a la escontra e lo que pasa nangunas palras orientalis del astulionés ondi el afechamientu atañi a platicaenti tolas parabras, chascu el cántabru, peru con estu nu quiu idil tapocu que el estremeñu conselvi las desinéncias de los casus de acusativu latinu cumu aconteci en asturianu. Angunus autoris cumu Miguel Ángel Luengo afecha tó tipu parabras enos sus escritus. Enclusu el uniquitu autol que alvierti que nu tolas vocalis finalis son cierrás, Pablo Gonzálvez, afecha las parabras acabihás en –és en –ís (francís). Si queremus hadel gramática, abemus de arreparal que la analohia nu mos val pa uñifical los caraiteris la luenga deque se mos espeta una inregulariá hata el inti inorá. Pol esi mistériu es prehisu landeal en el usiu el estremeñu i sabel vel que, cumu tola luengas que án tiniu mas traición oral que escrebia, se á canteau mas pola regulariá, peru que nu siempri las inregulariais son arrebuhás cola bilma la analohia. Unu desus chascus es esti que estoi refiriendu, que nu tolas parabras en estremeñu afechan las sus vocalis en el acaberu. Imus a vel que parabras manifiestan esta “inregulariá” morfufonulóhica.
—Horma masculina prural i neutra singulal el artículu atelminau. A la escontra e lo que puyera apaicel, a aceción dangunus puebrus ondi el afechi es sistemáticu tamién en esti tipu parabras —cuairanti el noroesti Cazris (Val de Xálima, Villamiel) i suroesti Salamanca (El Rebollal)—, en estremeñu lo nolmal es que se iga lo, los i nu *lu, *lus. Estu mesmu acontenci colas horma contratas colas prepusicionis en, pol i sin (eno/-s, polo/-s, sino/-s i nu *enu/-s, *polu/-s,* sinu/-s) i con el endefiniu tó en tolo i tolos i nu *tolu ni *tolus. Tapocu afechan enas hormas aglutinás deíticas cuandu se asiahan en metá la parabra: veloí, veloquí, velollí i nu *veluí, *veluquí u *velullí.
—La partícula enterrogativa átuna lo, horma proceenti e logo i que acabihó pol entificalsi con el artículu neutru, tapocu afecha la su vocal. Así se ebi escrebil lo qué, lo cuándu, lo cúmu, lo pol qué, ec. i nu *lu qué, *lu cuándu, *lu cúmu, *lu pol qué. Nu estanti, ena hórmula pi lu?, pol sel enclítica afecha la vocal.
—Los prenombris de complementu diretu e indiretu mos, vos, lo, los, le, les cuandu son proclíticus. V. gr.: Mos indirgó póndi eberiamus siguil; Huegai si vos aburrís; Lo queu ena encimera; Le truhu en cochi i nu *mus indirgó, *vus aburrís, *lu queu ni *li truhu. Las hormas con vocal afechá se gastan namás cuandu son enclíticas: indirgalmus, aburrilvus, quealu, traeli.
—El prenombri i conhunción que enhamás se escrebi ni leyi *qui. V. gr.: Qué alabán de profesoris viein pacá!; Lo qué andas mermurandu?; Sabei que enhamás vos é traicionau.
—Conhuncionis acabihás en –que. Estas conhuncionis son asinque, polque, paque, inque, manque, desque, deque i decaque. Estas parabras nu afechan enhamás la —e final, asinque cúdisi de nu escrebil *Polqui semus dos u *Dequi chegó namás sabi guarreal a la henti.
—Las palabras acabihás en e i o tónicas. Estas finalis puein sel -é, -és, -el, -ó, -ós i -ol. V. gr.: purtugués, balumpié, café, tenel, babatel, mó, tós, vapol, caracol.
—Las entrehecionis i ciertas parabras que huncionin cumu talis. Entrehecionis cumu coile, co, recónchile, ho, ole, tate, so nu afechan enhamás la vocal final. Alogo parabras que nolmalmenti son sustantivus, ahetivus u verbus deque huncionan cumu entrehecionis amenidan en –e i –o: coño!, chacho!, leche!, tente!, arto!, vale!