Nuevu libru en estremeñu

Acabihu de subil a la Redi una obrina en estremeñu. Se trata del De prouidentia qu'escrebió Séneca traduciu al estremeñu. Anque seya un tratau cortu, es hunta El Prencipinu, Requilorios, Primera Gramática Ehtremeña, La Cohtitución en ehtremeñu i el cuentu la Mardición de Marián, una las pocas obras en prosas escritas en estremeñu. 

Anque nu prometu ná, possibrimenti seya la primel obra duna coleción testus crássicus latinus i griegus traducius al estremeñu, dependi de la acohia que tenga el púbricu i el enterés que muestri pol esti tipu obras, que, huendu de suyu enteosas pal letol el sigru XXI, se dobra pol velsi traducia a una idioma cumu el estremeñu.

Esta primel obrina es de tema filosóficu, vos pongu un cachinu la entrodución:

Esti opúsculu s’enhalla endrentu los Dialogi i compón el primeru de los sus dozi librus. El sutítulu orihinal en latín es De prouidentia. Esta obrina en seis capítulus qu’eicó a Lucíliu es una reflessión filosófica pol mé la quala quiel dali una contiesta convicenti a la pregunta de pol quépassan cosas malas a los ombris güenus.
Es una muestra testual el razonamientu estoicu, redatá sigún los prencípius la retólica. Pa Séneca, el dios se porta conos ombris cumu un pairi qu’endereça a los sus ihus con trebahu i
estuyu, nu huendu assín malu con ellus ni tolerandu que les passi mal dengunu, sinuendirgándulus pol caminu corretu pol mé daquellu que hazi grandi i huerti al ombri. Losespartanus, Catón u los própius puebrus el norti, cumu los helmanus, pol costumbri, pol caraiti u pol naturaleza nu son ehemprus de misericórdia u lástima, sinu de reziura, tentigués i aguanti. Valoris de los que los antíguus romanus eran conoceoris i que cona deheneración ena qu’estaba cayendu el rehimin emperial s’andaban dessipandu de la moral común.

L'obra la podís descargal achuchandu aquí. Asperu que vos gusti i, de sel assina, vendrán mas.