Las parabras no son de naidi, pero puein sel de tós

Es impossibri resestilsi a espubrical el tesoru léssicu el estremeñu, anque seya esgañitándusi. No entiendu mu bien cómu los que trebajan pol estremeñu quean los sus envestigaerus emburacaus en el ordenaol u emprimius en cajonis. La Redi mos precura el possibri de espubrical quasique qualquiera cosa sin entrimeyal naidi ni ná, ara, dependi de caqual que las entencionis seyan pol chanu umental i dihundil la cultura u estén a la golilla de sacal algu con ellu.

Yo pa mí, lo que preteneci al puebru el puebru es el que lo tien que gozal. Es una suerti que oi pol oi no aiga que pagal pa ascuchal a naidi dizil quijiendu, acessal u no te hervi sel tan malu. Con enlialsi a palral con qualquiel viejinu u no tan vieju i hiziendu güena gavilla densiguia poemus sentil el estremeñu. Lo que paici un desatinu es que aigamus que estal pendientis de espubricacionis en libru pa poel conocel mas de la muestra cultura. Dos dicionárius enormis están cogiendu polvu pol no sel escapazis los autoris de que se lo espubriquin. Novelas, poemas, cuentus en estremeñu, pa atopalus ai que landealus enos recuéncanus mas ascondius las librerias. Grabacionis de cancionis, romancis, carabas andan en muebris de dialeutólogus. Desta manera el patrimoñu estremeñu se quea escondiu asperandu no sabemus qué, mentris que ca dia que passa semus menus coscientis de lo que semus i ándi vivimus pol no conocel lo que está al retorteu.

Indina, mas qu'otra cosa, que la cultura se quei assina, emfochá, quandu tó puebru ergullosu de lo suyu lo saca a tó i pol tó sin avejinalsi. Pero en esta Estremaura paici que la cultura la encultan, la entierran. Pol essu atrabancal a quien quiel dal a conocel la su cultura es unu de los crímin mas velgonçosus el ombri. Pero mas tendria que herveli a quien (re)tuviendu la cultura la engancha a las perras i a los enteressis presonalis i laboralis, creyendu alastimal el ergullu pol un eshuerçu ténicu que las gentis de patrás á hechu de horma oral i de baldi. Otras muchas parabras acabu de subil al Vegas Bajas:de qué me val tenelas apuntás ena libreta? Anda i que las lea el mundu enteru! Que vean el patrimoñu oral tan ricu que conselvan los muestrus agüelus! A dengunu naidi les paga pol sabel lo que sabin i pol hablal comu lo hazin. Essa es la verdaera cultura.