lunes, noviembre 23, 2009

La chalra en La Revista de Miajadas

Tony Alcarria á espubricau oi un articulinu sobri el autu el passau Sábau en La revista de Miajadas. Enclui angunus santus de quandu empençó la comferéncia i parafrasea las parabras el presienti l'associación. Podís leel el articulinu aquina.

domingo, noviembre 22, 2009

Conferéncia a tentu el estremeñu en Mijadas

Doi dende aquí las grácias a la Asociación Cultural Pablo Gonzálvez, en especial, al su presienti Bienveniu i a la su família, pol tratu recebiu i atorgalmi esta esperéncia.
Tamién agraeçu a los miembrus la associación i algotrus vezinus de Mijadas el poel assestil a la chalrina. Tamién m'alegró muchu la assisténcia Antonio Garrido Correas, el traduziol d'El Prencipinu.


La chalra ahiló sin trabancu i a la final s'abrió un debatinu sobri las custionis tratás, andi el púbricu palró, preguntó, hizu osselváncias. Temas comu el polqué essi dispréciu al estremeñu, el desaculagi pol parti las almenistracionis competentis, el pobrema las luengas en España, las destintas variantis ortográficas que se gastan ena literatura aparecierun i se relatarun con ánimu. Mesmu, se mentarun angunas cosinas en estremeñu.

Anque el autu no cuentó con mucha propaganda i esta hue tardia (ena mesma tardi mos enteramus de que lo mentavan en un articulinu nel Hoy), vinun genti bastanti.

Comferencinas comu estas son un primel passu pa la genti enteressalsi pol estremeñu i sabel qué se puei hazel con esta luenga.

viernes, noviembre 20, 2009

Cuaderno de Gramática Extremeña

Acabu de subil el archivu PDF con el primel númiru de los Cuadernos de Gramática Extremeña.




Estus quaerninus vienin huendu aspécii los artículus que pongu nel Cúyu?, pero aquí están recadaus i nel hormatu en que ya estais acostumbraus. Pa ponel mas faci la devulgación el estremeñu i pa dil alantrandu la Gramática, estus quaerninus precurarán tocal temas pocu conocius, hallauras, normas, ec. a tentu la muestra luenga, comu vengu hiziendu paquí.

Quiu asseñalal tamién que estus quaerninus me gustaria que hueran colaborativus. Quien quiera escrevil un articulinu a tentu el estremeñu, puei colaboral. Pa essu mandaimi angún correinu, que vos endilgui eno que huera mestel.



Podís descargalvus el primel númiru el CGE achuchandu aquí.

Creative Commons License
Cuaderno de Gramática Extremeña I by Ismael Carmona García is licensed under a Creative Commons Reconocimiento-No comercial-Sin obras derivadas 3.0 España License.

miércoles, noviembre 18, 2009

Chalra en Miajás a tentu el estremeñu

El próssimu Sábau dia 21 Noviembri vo a dal una chalrina en Miajás a tentu el estremeñu. Tocaré custionis generalis sobri dóndi vien el estremeñu, la literatura en esta luenga, la su preséncia ena Redi i la concéncia lingüística.

La chalra es en el Complejo Cultural Palacio Obispo Solís de Miajás. Asperu que los enteressaus puean assestil, la entrá es de baldi.

Títulu: El estremeñu pol Ismael Carmona García.
Lugal: Complejo Cultural Palacio Obispo Solís, c. Real 28, Miajadas.
Ora: 20:00 h.
Olganiza: Asociación Cultural Pablo Gonzálvez.
Entrá: Libri.

Amus a palral un poquinu IV

El muestru amigu Wifredo mos ofreci otru nuevu vídiu conas parabras vivas que gastan pa Garrovillas. Muchas grácias, compañeru, asperu que saquis mas vidinus destus!

amus a palral un poquinu 4 from dotoljoskin on Vimeo.

domingo, noviembre 01, 2009

"Gramática sobre l'estremeñu" de la Belsana

Las ventajas la Redi son imfinitas pa poel espubrical cosinas en estremeñu, de baldi i que llegui a un númiru mayol de genti. Esta tardi, enreandu entre las páginas la Biblioteca Virtual de Extremadura (BVE), portal dinu d'alabáncia que tien hechu el amigu Manuel Trinidad, hui a paral a una seición andi se hazi recordança de la revista Belsana. En esta página aparecin artículus enteressentíssimus desta revista, impossibris d'atopal si no huera pol mé de Manuel. Entrevistas a autoris comu Alcón Olivera u Garrido Correas feguran entre essus archivus rescataus.

No sabia, hata oi mesmu, que Nicolás Valle Morea, criaol de Belsana tenia escrita en cuya revista una brevi gramática el estremeñu, entitulá Gramática sobre l'estremeñu. Pa poel vela, es mestel que vos registreis enantis de baldi ena Biblioteca, aquí.

Asperu que dende el Cúyu se le vaiga diendu mas propaganda a esta gramática, que pa muchus, encluyéndumi a mí comu podís vel, andava emfochá i enculta, no hiziénduli justícia ni al trebaju de Valle Morea ena Belsana ni a Trinidad ena BVE. Sirva, amás, de comprementu a las gramáticas de Pablo Gonzálvez González i Carlos Quiles Casa i la Morfología que pocu á saqué.