Entradas

Mostrando entradas de 2010

Nueva muestra la riqueza léssica el estremeñu

Acabu de espubrical una nueva retahila de parabras estremeñas gastás en Las Vegas Bajas . No se puei desprical mu bien quál es la sensacion de sabel que la imensa riqueza léssica el estremeñu se está perdiendu pa agarral parabras d'otras idiomas. Son los própius estremeñus los que premitin que estu passi, porque piensan que izil las cosas en castellanu quea mas finu. No ai mas finura en castellanu que en estremeñu i quien mos niegui que no avemus parabras pa tó i que no sabemus espressal-mos o lo hazemus mal es porque no entiendi ni peba a tentu de lo que izi. Ei arrecogiu parabras del campu, de agricultura comu cial , cartucho o pajeá , de la ganaeria comu mollá o picón , de la botánica tradicional comu ingüente puchero , charneca , cilindra o periquito . Las que mas, parabras referias al ombri , a sus portamientus, espetus, caraiti comu desenquerao , increedó , sarpicao , péncano , peluciento o pasante . Tapocu estamus asprés de locucionis , de las que gastamus mas de lo que

El cochi i la calabaça

Tiempu á que grabé esta carava en Garrovillas d'Alconeta , allá junta Taju. Ei aprovechau la mesma página que tengu en Archive pa subil la grabacion que andava trasconejá en otras páginas, pero que agora la recadu en mejol sítiu. Alogu izin que es enventu... Quántu mos quea pa envestigal entovia!!!

Primel Assamblea pal huturu el estremeñu

El Viernis mos ajuntémus pocus, pero pa prantal la simienti no eran mestel mas. Acuyerun escrevioris, representantis d’associacionis, professoris, filólogus, políticus i amantis la cultura estremeña. El ordin el dia tocava quatru puntus, en cuyus dos primerus mos espaceémus bastanti. El primeru d’ellus diva a tentu las associacionis i el associacionismu . Propusimus la criacion duna cabecera que sirva de referéncia a tolas associacionis culturalis segunderas a las muestras entencionis. Por mé d’ellu se puei almenistral mejol el haci trebaju qu’avemus i favorecel la concéncia social. En drentu d’esta cabecera divan a enfuncional cordinás pressonas i associacionis que hata el momentu queavan desapartás, que se relanci el estremeñu i lo estremeñu enos meyus. Mesmu propusun la criacion duna revista a tentu lo estremeñu i una editorial pa librus ena muestra léngua. Alogu, eno que toca al segundu puntu, a tentu la unificacion el estremeñu , comenté que es mestel avel una varieá de estr

Los dos de la tarde

Endespues de dal con el arremetiu estúdiu del arrádiu aquí en Caçris, mos apreparémus pa tenel un ratinu de carava conos zagalis del pograma. Mos pusun de cabecera una cancion de Berri del buyeti i polos ventipocus menutinus que anduvimus palrandu ijimus... güeno, ascuchai la entrevista i ya comentais. Aprovechu pa recordal-vos que l' assamblea a tentu el huturu el estremeñu es esti Viernis. Agraeceriamus que confirmeis l'assisténcia.

Entrevista pal Canal Extremadura Radio

Imagen
La semana passá mos pegarun el avisiju a tiu Revu i a mí dende el Canal Extremadura Radio pa atendel a una entrevista esti Miércolis. Dimus a vél á qué preguntan. A los que les enteressi i les vagui pa oyé-lo, el pograma es el de Los dos de la tarde , que presentan José Carlos Macías i José Parras Canuto. De salil, bichará a partil de las 17:00. Pograma: Los dos de la tarde . Emissora: Canal Extremadura Radio. Dia: Miércolis, 15 Diziembri. Ora: 17:00. Ya vos daré mas enteracionis quantis quandu passemus pol pograma i vos pondré el endilgu con el podcast.

Festival de Folklore de Miajadas

Imagen
El passau Sábau 4 de Diziembri hue el Festival de Folklore Extremeño de Mijadas. Hue una tardi mu entretenia, con bailis regionalis a cargu grupus de San Sebastian i Mijadas. Alogu, l' Asociación Cultural Pablo González organizó un recitalinu poesia en estremeñu con crássicus de Chamizo , Gabriel y Galán , Feijóo , ec. Poeis leel la notícia mas destendia i guipeal las retratauras aquina . Agraeçu a l'associacion la entriega la praquina que me hizun en reconocimientu lo ya hechu, enque lo mas mejol hue tenel l'ocassion de arrematal la tardi palrandu una mijina en estremeñu a los assistentis i conpartil aluspues unas parabras con angunus los miembrus i conos compañerus del Centro Cultural Extremeño de San Sebastian. Es un vencijón qu'á veniu en güen momentu. Muchas grácias a la Associacion i al puebru de Mijadas!

Chalra de Rey Yelmo

Esta hue la chalra endilgá pol señol Rey Yelmo el passau Sábau 20 Noviembri en Mijadas. Julgai vosotrus mesmus...

El huturu el estremeñu

Imagen
Dimus a hazel una queá el dia 17 Diziembri en Caçris pa tenel un descutíniu a tentu el huturu el estremeñu. Estamus ca qual pa su lau sin sel escapazis de organizal-mos i enlial-mos a trebajal en grupu, de hazel propuestas sérias sobre qué vias tien el estremeñu d'arrecuperal-se, de gastal-se, de normalizal-se. Esti ajuntaeru quandu menus es un escomiençu pa ellu. Agraeçu que vaigan tolos que puean, porque palraremus sobre el porvenil d'esta luenga, ogañu tan mal cudiá polos própius estremeñus i es prejisu cuental cona opinion de tós. Centro Vecinal s/n c/ Abilio Rodríguez Rosillo Caçris Viernis 17 Diziembri 2010 18:00 oras

Chalra en Mijadas

Imagen
El Presienti la Asociación Cultural Pablo Gonzálvez González m'á mandau esti cartelinu vé-lo equí: Jesús Claudio Rey Yelmo va a dal una chalrina a tentu el estremeñu el próssimu dia 20 Noviembri a las 19:00, ena sala conferéncias el conpreju cultural el paláciu Obispo Solís de Mijadas.

Corrigenda

Imagen
Sé que ei tardau bastanti en sacá-lo, pero era comenienti un periodu de preva. Por fin vos traigu los Corrigenda a la Ortografía . En ellus namás hagu un repassinu a las noveais ortográficas mas enportantis dende que saqué l' Ortografía vai ya tres añus. Son 17 muacionis, angunas vos sonarán mas i otras menus, pero quandu menus ya las tenís arrecogias. Con el propósito de salvaguardar problemas de escritura motivados por las variantes orales, se ha replanteado la Ortografía del Extremeño. Para ello se han tenido en cuenta menos los criterios de la pronunciación, que los fonemáticos, morfológicos y etimológicos . Algunos de estos cambios se han producido desde su publicación y se han ido aplicando, otros son recientes. Tras reflexionar sobre la conducta de los que escribimos el extremeño y las tendencias hacia unas u otras propuestas , así como después de haber analizado los problemas que plantean en general las ortografías romances y de considerar que el mejor modo para

Arti de la Mairi Tierra

Imagen
El amigu Antonio Garrido me acaba de endilgal la direcion la su bitácora Arti de la Mairi Tierra . Es una de las poquinas bitácoras que ain escritas en estremeñu, assinque poeis gozal con el su escrevieru. Un salú dende el Cúyu? i que acontini diendu-le vida a essa paginina que ata agora no conociamus.

Decretu Senatorial a tentu Las Bacanalis

Imagen
Vos traigu el quintu númeru la coleccion Crássicus en estremeñu . Es un brevi testu legal, curiosu pol conteniu, pero tamien por sel unu de los testus lingüísticamenti mas enteressantis la latiniá. Es un decretu mandau pol Senau en el sigru II ea. C. en que se proibin Las Bacanalis en Roma, en baju severu castigu. Pa poel descargal el decumentu en PDF, achuchai aquina .

La voz de Feria

Imagen
Acaba de passal-me el amigu Juan un atiju con una web mu bien trebajá i séria. Se trata de la página La voz de Feria que lleva Juan José Becerra. Tien mu güen trebaju lessicográficu i de devulgacion hechu i al qual le do la noragüena. Vesitai quantis que poais esta página porque no tien desperdíciu dengunu.

Eraclitu - A tentu la naturaleza

Imagen
Ya poeis leel el nuevu númeru la colecion Crássicus en estremeñu . El libru es del filósofu elenu Eraclitu . Asperu que vos gusti. Vo-lo poeis descargal achuchandu aquí .

Nuevu libru en estremeñu

Tengu ya apreparau el que sedrá el númeru 4 de la colecion Crássicus en estremeñu . Esta vezi ei descogiu un utol griegu i de los mas enportantis i enfruyentis en el pensaeru ociental. No vos igu el nombri, namás que no á siu faci traduzí-lo. Drentu de pocu vo-lo subiré.

Endofísica

Imagen
Vai muchu tiempu que no espubricu ná i que se vé estu una mijina parau. Essu va a dil acabandu-se. Polo plontu vos traigu un nuevu poemáriu en estremeñu. Son 19 poemas escritus ena primel metá del añu passau i les ei puestu el nombri de Endofisica , por referil-se a la naturaleza de drentu de mosotrus. Ei subiu el PDF en Archive, comu es costumbri. Pa poel descargal-vos el librinu, achuchai aquina . Güena letura!

Ñiu mielrus

Imagen
Juan Francisco Reina Raposo á abiertu una bitacorina en estremeñu en Wordpress, Ñiu mielrus . Dende aquí l'animu a que acontini escreviendu en estremeñu i se vaiga hiziendu mayol usu de la muestra luenga ena Redi. No vos perdais los sus endilguis!

Cigüeña negra

Imagen
Comu aconteci sempri en estus casus, m'ei atopau con una bitácora en estremeñu landeandu cosas pola Redi. Esta página es una mesturiña temática andi gasta destintas huentis. Política, literatura i luenga s'arrebrujan enos sus deferentis endilguis. Pa quien quiera jechal una guipaina, esti es el atiju . Dende el Cúyu? un vencijón paque acontini sacandu cosinas.

Olivença consigui letrerus bilíngüis

Imagen
Grácias a la associacion Além Guadiana , el monicípiu pacensi de Olivença arrecuperará dende Juñu el nombri tradicional de las sus ruas . Se pretendi con ellu golvel un poquinu mas a las raizis lusas. Poeis vél la notícia nel diáriu Hoy, achuchandu aquina . Noragüena a los oliventinus!

Pa deprendel estremeñu

Comu poeis vél, agora no pongu al dia la bitácora comu enantis. Pero, güeno, en quandu en ves, me vaga pa ponel-vos unas línias con angunas enteracionis. Mesmu oi, en landeandu pola Redi atopé el esmiençu dun cursinu en estremeñu que se queó en essu, un encetu. Namás vien la primel licion con un diálogu i ejercícius. Sirva de atiju con el proyetu de tiu Pelinu que lleva un tiempu hiziendu por Facebook : un grupu pa deprendel estremeñu on-line : Pa deprendel estremeñu paquí entre mujotrus y mujotrus . Aí se van pusiendu los contenius i la genti enteressá pregunta i comenta. Á si me desenbarullu una miaja i me entru tamien a dal angunus endilguis. Mentras, aí teneis material suficienti pa enlial-vos a deprendel algunas cosinas mas de las que paquí salin. Noragüena al Pelinu por esti encetaeru i que acontini a deprendel a la genti!

Entrevista pa Radio Unión Catalunya

Ayel-mañana el amigu Manuel Trinidad me hizu de dil pa la facultá de Derechu con el mistériu de entrevistal-me pal pogramina que tien Radio Unión Catalunya a tentu Estremaura, las sus gentis i la su cultura, El rincón extremeño . El güequinu de Manuel es Voz de mi tierra, hormi la su wiki que muchus conocís. Agraeçu muchu esta oportuniá a Trinidad i a RUC por premitil-me palral a tentu el estremeñu i las cosinas enas que venimus trebajandu dende vai ya unus añinus paquí pola Redi. Tamien le doi las grácias a Rodrigo, dende la Biblioteca Central de Caçris pola su pacéncia, colaboracion i leturas. Sirva dende esti arrádiu pal mundu la horma en que mos dedicamus al estremeñu los que mos enteressamus pola muestra cultura. Muchas grácias a tós.

Ringurrangu

Imagen
Navegandu pa pola Redi m'ei atopau con esta web en estremeñu. No sé quién es el criaol, pero noragüena. Dende aquí le hazemus un güequinu, lo añiimus a la lista marcaoris i le damus las felicitacionis paque puli i acabi de costruil el sítiu. El estremeñu a pocu a pocu va consiguiendu representacion nel mundu vertual.

Las habras estremeñas en Mercurio

El proyeutu Mercurio qu'arrancó pocu á comu eniciativa pa una television educativa andi los professoris puein subil archivus de soniu i vídiu cuenta con angunas grabacionis dialetalis estremeñas de Cabeza el Buey, Guareña, Campanario i del Val de Xálima. Vo-las pongu paquí: Preparación de los cardillos (Campanario) Comida de romería (Cabeza del Buey) Fabricación de la aspirina (Cabeza del Buey) La matanza (Guareña) El maestro represaliado (ena fala) Los molinos y el pan (Val de Xálima) Á si se va destendiendu la enclusion d'esta crassi grabacionis, mas que ná, quandu van enfocás a la educacion los zagalis. Güenu sedria que los professoris de los sítius andi mas se conselva el estremeñu subieran grabacionis enas que los viejus elustrin en luenga i en costumbris i trebajus.