domingo, marzo 28, 2010

Ábati i á son griegas

Enos trebajus d’envestigacion pal dicionáriu, landeandu la etimologia duna de las parabras mas generalis enas muestras habras, ábati, hizi angunas hallauras enteressantis: tantu el alvérbiu ábati comu la entrejecion á son parabras d’origin griegu.

Las parabras ábati i á procein de una antígua entrejecion aba, qu’entavia se conselva en angunas zonas lionesas. Esta entrejecion se hormó del emperativu dun verbu abar, regressivu del elenismu latinu apăge “alarga-te, huera, hopo, humo” (gr. ἄπαγε, 2a press. sing. pres. end. v. ἀπάγω < ἄπο + ἄγω “alargal”). La horma ábati está conpuesta por aba + te, horma emperativa pronominal (cf. vai-te, alarga-te, arrehazi-te), cuyu primel valol es entrejetivu i que entavia se conselva, enque mu difússiu, ena su huncion enpressiva en frasis comu ábati que me caigu “quita-te que me caigu”. Esta horma, con el mesmu acentu, essisti entavia en asturianu: ábate. Mu atijá está tamien la horma abaté, ondi prevaleció el segundu acentu enpressivu aba-te [ˈaba ˈte]. La horma chana abati está toita lessicalizá comu alvérbiu con el senificau de “quasi”, “apenas”.

La horma á, que en prencípiu creiva regressiva de anda, paici tenel mucha mas relacion con aba que con anda, tantu etimológica comu semánticamenti, de mois que á procei de aba, sigún es testimoñu el lionés de salamanca, andi entavia está aba con essi mesmu sentiu de “alarga-te, vai-te”: [ˈaba] > [ˈaβa] > [aa] > [ɑː].


Con estu se demuestra la nesseciá que avemus entavia de estuyal el léssicu estremeñu, tantu las variantis de prenunciacion comu las morfológicas i etimológicas, margullil-mos ena estória d’ellas i encrará-las. Un trebaju laboriosu albondu.

jueves, marzo 18, 2010

Valdelacalzada en flor 2010

Comu tolos añus, sigún vien huendu costumbri en esta bitácora, vos conviu con unus afotinus a dil a vesital mi puebru pa estas fechas, paque veais i conoçais qué es la primavera en Estremaura i cómu se vivi. Esti añu la froracion á siu tardia por mé del água i el airi, pero con tó i con essu los arvus án traiu las froris i los goloris própius d'esta epoca.

No vos olvieis las tres prencipalis fiestas de los arvus en frol en Estremaura: los almendrus de Garrovillas, los frutalis de las Vegas de Guadiana i los cerezus del Jerti.

Vos traigu un reportagi fotográficu d'esti passau fin-de-semana. Entavia quean por frorecel los peralis i los bruñus. Asperu que vos cumpran!














jueves, marzo 11, 2010

Entrevista en El Rincón Extremeño

Manuel Trinidad hizu una entrevistina a Bienvenido Gutierro, hundaol la asociación Pablo Gonzálvez, i a la su ija Maxi pal pograma el arrádiu catalán El rincón extremeño.

Poeis ascuchal el pograma aquí. La entrevista a la que me refieru enprencípia ena segunda ora. Ascuchai-la i sacai las vuestras própias conclusionis.

Noragüena a tós tres. Con esti tipu de devulgacion ca dia mas genti va tomandu conocimientu i concéncia del estremeñu, endrentu i ahuera de la muestra region.