domingo, mayo 30, 2010

Olivença consigui letrerus bilíngüis

Grácias a la associacion Além Guadiana, el monicípiu pacensi de Olivença arrecuperará dende Juñu el nombri tradicional de las sus ruas. Se pretendi con ellu golvel un poquinu mas a las raizis lusas. Poeis vél la notícia nel diáriu Hoy, achuchandu aquina. Noragüena a los oliventinus!

miércoles, mayo 26, 2010

Pa deprendel estremeñu

Comu poeis vél, agora no pongu al dia la bitácora comu enantis. Pero, güeno, en quandu en ves, me vaga pa ponel-vos unas línias con angunas enteracionis. Mesmu oi, en landeandu pola Redi atopé el esmiençu dun cursinu en estremeñu que se queó en essu, un encetu. Namás vien la primel licion con un diálogu i ejercícius.

Sirva de atiju con el proyetu de tiu Pelinu que lleva un tiempu hiziendu por Facebook: un grupu pa deprendel estremeñu on-line: Pa deprendel estremeñu paquí entre mujotrus y mujotrus. Aí se van pusiendu los contenius i la genti enteressá pregunta i comenta. Á si me desenbarullu una miaja i me entru tamien a dal angunus endilguis. Mentras, aí teneis material suficienti pa enlial-vos a deprendel algunas cosinas mas de las que paquí salin. Noragüena al Pelinu por esti encetaeru i que acontini a deprendel a la genti!

sábado, mayo 15, 2010

Entrevista pa Radio Unión Catalunya

Ayel-mañana el amigu Manuel Trinidad me hizu de dil pa la facultá de Derechu con el mistériu de entrevistal-me pal pogramina que tien Radio Unión Catalunya a tentu Estremaura, las sus gentis i la su cultura, El rincón extremeño.

El güequinu de Manuel es Voz de mi tierra, hormi la su wiki que muchus conocís. Agraeçu muchu esta oportuniá a Trinidad i a RUC por premitil-me palral a tentu el estremeñu i las cosinas enas que venimus trebajandu dende vai ya unus añinus paquí pola Redi. Tamien le doi las grácias a Rodrigo, dende la Biblioteca Central de Caçris pola su pacéncia, colaboracion i leturas.

Sirva dende esti arrádiu pal mundu la horma en que mos dedicamus al estremeñu los que mos enteressamus pola muestra cultura. Muchas grácias a tós.