domingo, enero 30, 2011

La luenga en Estremaura

Mas vídius d'estus son mestel, que defendan amás del estremeñu el restu de lénguas que quean acarvás i repunteás a pocu a pocu polas lénguas mayoritárias. Noragüena al criaol!

sábado, enero 29, 2011

Dichos y diretes

Acabu de topal esti vídiu que pareci sel el pilotu duna sérii audiovisual pretenecienti al pograma El zurrón de Cáceres en tu mano, del colectivu Cáceres en tu mano. Esperemus vél mas endilgus a tentu las muestras parabras en boca muestrus agüelus!

sábado, enero 22, 2011

A tentu de la 2a Assamblea

Ayel pola tardi Bienveniu i yo asperavamus a la puerta del Centru Vezinal a que llegaran los assestentis. Hazia un friu curiosu i acabavamus de venil de jechal fotocópias del Ordin del dia i de las Actas de la primel assamblea. Al ratitinu escomencipiarun a aportal la huerça de los que acuyerun el otru viagi i tamien otras caras nuevas. Encetémus la reunion ena que presenté los dos temas del dia. El primeru d'ellus era la criacion dun Órganu que valiera pa dil enfuncionandu i trebajandu dende ya. El segundu tema era el destraci del caraiti que diva a tenel el Encuentru el Estremeñu i la su Cultura, adiá-lo i assitiá-lo.

A tentu del Órganu, los assestentis dierun la su opinion a tentu el caraiti i organizacion del Órganu, que se entangó de horma provisional entre que se hazia el Encuentru. Quearun mas o menus crarus los ojetivus i que diva a avel tres comissionis endependientis i conprementárias, una pa la léngua, otra pa la cultura i otra pa la literatura, enque entavia quea por destraçal las conpeténcias i tareas d'ellas i ellas. Se nombrarun los cargus del Órganu que está conpuestu de seis vocalis, un secretáriu, un vicepresienti i un presienti.

Aluspues destracémus somerinamenti cómu diva a sel el Encuentru. La cultura estará presenti en él i se amenizará con actuacionis, recitalis, etc. Se previdu que sedrá pa metá de Mayu en Montermosu i se convocarán reunionis periódicas pa organizá-lo.

Comu resultau d'esta segunda assamblea, saquémus el Órganu Siguimientu el Estremeñu i la su Cultura i el destraci del Encuentru el Estremeñu i la su Cultura pa Mayu d'esti mesmu añu.

lunes, enero 17, 2011

Cámbiu d'ora Assamblea

A los que vaiga a assestil a l'Assamblea del Viernis 21:

Á bistu un cámbiu d'oráriu. L'ora en que encetemus l'Assamblea es a las 18:00 oras. Amus retrasau una orina el enpieci paque mos rehunda mas la tardi i los que tengan que dil-se enantis puean assestil a la mayol parti l'Assamblea.

Descurpai las moléstias.


sábado, enero 15, 2011

2a assamblea pal huturu del estremeñu

El próssimu Viernis, dia 21 Jeneru, avemus una nueva assamblea pa descutil a tentu el huturu el estremeñu i vél si hazemus viabris angunas de las propuestas palrás en primel assamblea. Aquellus que no aigan piu assestil a la primera, puein venil a esta segunda i participal, lo mesmu que tol que quiera colavoral o ascuchal.


DIA: 21 Jeneru 2011.
ORA: 18:00 oras
SÍTIU: Centru Vezinal de la Madrila, c/ Abilio Rodríguez Rosillo, Caçris.

jueves, enero 13, 2011

Vergonçosu

Acabu de queal-me espasmau viendu el Canal Extremadura con una notícia que án jechau vai un ratinu. A lo vistu, en el Senau án repuchau -i creu que essi es el términu essatu- la propuesta los gallegus (atencion, los gallegus, que los própius estremeñus no izin ná) de que se reconociera el portugués en Olivença i la fala en el Val de Xálima en el estatutu que aprevarun ena Assamblea d'Estremaura i que ya, por tercel ves, dan el vistu güenu en el Senau.

Aquina unus endilguis d'esta mañana que palran a tentu d'ellu:

http://www.lacronicabadajoz.com/noticias/noticia.asp?pkid=62831
http://www.radiointerior.es/index.php?op=noticia&id=18342
http://www.elperiodicoextremadura.com/noticias/noticia.asp?pkid=555077&page=4

Resulta vergonçosu el tratu que le dan a estas dos lénguas en Estremaura, lo primeru, i lo segundu en essa España prural de la que tantu galrean paí, produtu tó ellu de los prejuícius i de la inoráncia. Si estu es lo que opinan del portugués i de la fala, qué no pensarán del estremeñu? Enantis de apreval o desaculal-se el goviernu duna realiá comu lo son la fala i el portugués en Estremaura sedria mestel que se decumentaran un quantu-quantu tan ensiquiera i alogu obraran. Menus mal que essestin las emiendas i quandu estén las cosas comu tienin que estal, allá que mos espetemus pa hazel que lo que tengan que retifical, lo bichin de la horma mas aparenti. Asperu que oliventinus, mañegus, lagarteirus i valverdeirus no se quein engurrius i peguin un apitiu adenunciandu estu a los meyus.

domingo, enero 09, 2011

Mas parabras

Vos acabu de ponel un endilgui con otra carrefilera parabras de paquí en Las Vegas Bajas. Ain parabrinas tan curiosas comu bamburral, d'origin portugués, jarapil, liebrazo o sentón. Mu poliu el sentiu la parabra jechura conparanti al castellanu "silueta" referiu a una pressona o el verbu avalé-se.

Pola su enportáncia gramatical asseñalu la parabra griesca, con ditongu, lo mesmitu que en el asturianu d'ogañu, la vos lomba con grupu -mb- conselvau, los verbus factitivus en -eal comu norteá i baqueteá i el reiterativu llovisqueá. Tamien despuntan las terminacionis -iu i -iju en guisío i guisijo. Toas ellas muestras de que el estremeñu al norti de Guadiana es el mesmu que el que cista al riu Taju o a Alagón.

sábado, enero 08, 2011

Zahorilis

Tenemus que barrungal mitus criaus que mos están chapurrandu la muestra cultura populal, ijiendu que los estremeñus semus unus incultus. Essa es la herramienta prencipal que tien los puebrus pa barbeal a otrus, la criacion de mitus. El mitu de que los estremeñus no hablamus bien, de que semus engurrius i inorantis. Se crein que enbrocandu essas ideas enas muestras cabeças por tantu tiempu acabaremus por achical-mos i cabeceal a tó.

Alogu agarramus i dimus esbandangandu otrus mitus comu que en Estremaura namás se habla castellanu, que en ca puebru se bicha duna horma destinta, de que el estremeñu essu es de mu patrás i está muertu, de que los agüelus no sabian hablal, que eran unus calamandruñus... Pero lo ciertu que ellus i ellus s'entiendin en aquellu que hablan i en cómu se portan. Essu me lo deprendierun mis própius agüelus con umildá i sin fachenda.

Mesmu ayel hallé que paquí, en prenu sigru XXI, entovia quean zahorilis, cosa que quea mu largu de los aderezus que les pon la mala propaganda pa mitificá-los i poné-los comu seris mágicus. Enantis eran mas los que sabian leel la naturaleza, miravan los cielus i barruntavan las demuacionis, ena postura o al crareal sabian qué tiempu venia, sentian las corrientis d'água en baju los piezis, mirandu las yervas d'ogañu entendian el huturu o curavan con ellas. No era algu estrordináriu: quien siempri á viviu en almonia cona naturaleza, el ombri criaol de la hesa, la entendia i comu la entendia sabia convivil con ella.


Zahorilis sigui uviendu agora i no en Las Hurdis namás. Aquí, en las Vegas Bajas de Guadiana, siempri s'á escuchau mental de los que hazian las caninas sin marru, los que dizian si era añu metiu en água o queavan a sequeru i atinavan. La genti de no mucha eá lo recuerda con almiracion i parti d'essa cultura á queau enos ijus i los de éstus en mosotrus agora. Ayel mi pairi me deprendió a buscal corrientis d'áugua en baju el suelu con alambris. "Mejol es si se hazi con alambris cobri o con ramas olivu". Yo prevava i via espasmau cómu se divan arrimandu los alambris sin movel-me. "A tolas pressonas no le s'ajuntan lo mesmu" -m'izia porque a él le se atravesavan las varillas autenticamenti del tó mentris qu'a mí namás me s'ajuntavan sin cruzal-se muchu. Ándi queará tó esti sabel? Qu'igan los escépticus que enos reflanis i que cosas comu la rabdománcia son chapurrás... Yo vó a acontinal envestigandu.