sábado, febrero 26, 2011

Criau el Órgano de Seguimiento y Coordinación del Extremeño y su Cultura

Ayel tardi mos ajuntémus a las 18:00 los sócius fundaoris en el CPR Caçris con un ojetivu craru: aproval los estatutus del Órgano de Seguimiento y Coordinación del Extremeño y su Cultura (OSCEC) i escomençal a enfuncional.

Retrataura, de gocha pa derecha: Maxi Gutierro, Bienvenido Gutierro, Francisco Duque, Ismael Carmona, Manuel Trinidad, Carlos del Sol, Juan Francisco Reina.


Endespues de comental los Estatutus, se votarun i s'aprovarun por unanimiá. Dau essi passu, ya tenemus una basi cona que enlial-mos a trebajal.

Angunas de las primeras cosas que se decidió hue apreparal una carta presentacion del Órgano, crial una bitácora de siguimientu i una direcion de correu.

Amás, ya s'entangarun los conponentis de las tres comissionis pa dil trebajandu. Pola parti de Cultura se quiel organizal el encuentru cultural del que vos palré ai tiempu i un proyetu pa una revistina; pola de Literatura hazel un corpus de utoris i obras i pola de Léngua envestigal léssicu, morfologia i sintassi i descutil a tentu l'ortografia.

Ayel dimus un passinu mas en el caminu pol respetu i la recuperacion las lénguas vernáculas d'Estremaura i pa la promocion de las sus manifestacionis culturalis. Enque esté en barrera i mos queemus entalliscaus, mos acanchalemus o mos apescolemus, comu otras vezis mos á passau estus añus, sabemus que en el luchi ain momentus de hundieru i de enpenical-se, de avantal i de arganeal i mollanqueu, pero que tó estu se hazi pusiendu con huerça la voluntá, la vista i el pie ca dia un poquinu mas alantrinu, bien assentaus.

2 comentarios:

Huliu dijo...

Brabu

TXEBE dijo...

Noragüena, compañerus. Siempri es dificil apencipail, y el primel pasu ya está dáu. Agora, a agilal p'alantri.

Un saludu dendi El Rebollal.