domingo, marzo 20, 2011

Vesita a El Rebollal

Ayel me convió José Benitu (Txebe) a echal el dia pa El Rebollal. Dende que hui al congressu de Villarrúbias me queé conas ganas de conocel el sítiu una mijina mas despacinu i tenel l'oportuniá de poel escuchal a los palrantis pallí (estu de escuchal el estremeñu cona "s" resulta curiosu).

M'enseñó la su tahona, andi lo primeru que llama l'atencion son los cartelinus bilíngüis (palra-castellanu) i trilíngüis (palra-francés-castellanu) de los produtus. Alogu, con una guipaina general s'alviertin elimentus de destintas culturas peninsularis (lionesis, portuguesis, vascus) que dan un encantu únicu.

Cartelinus ena palra i en castellanu. Tamboril

Pocas tahonas averán paí andi, hueraparti del golol a pan, se vean tantus elimentus culturalis: una figurina del Olentzero, el ramu lionés, un tamboril...



Arvillas i millu

Endespues me enseñó el lugal. Vimus angunus charailis, el museu, endicaoris ena palra, los restus las casas antíguas, el tesu que llaman "Castillu", la ilésia... Lo mejol, vel teniu l'ocassion de palral con angunus de los vezinus, comu la tia Andrea, la tia Gora i una familial de José Benitu. Hue la tia Gora, de 106 añus, la que mas m'almiró, pol possitivismu i l'alegria que reçumian las sus parabras i l'agiliá pa espressal-se en recordandu cosas de patrás, frenti a la lumbri. Ata mos cantó angunus versus de La Charrascona!


Carru conos estalonchus.

El Castillu de Peñaparda

Letreru con topónimu ena palra

Charail del Rollu (Peñaparda)

Charail de las Majaillas (Peñaparda)

Me queé desmentau cona gaita hecha de güessu d'ala butri que José Benitu assoprava, comu dandu la bienvenia ena su casa de Peñaparda i con el panderu quairau hechu con pelleju de cabra que entovia conselvava el pelu. Aluspues de la merienda mos tocó un par de pieças con el tamboril i la gaita, queandu-se unu al escuchá-le enpelihincainu.

Parorama dende el castillu d'El Payu

Moruja del riu Águeda (Navafrias)



Plenilúniu dende la salia de Navafrias

L'amabiliá de Txebe i Patri les llevó a convial-me a merendal, a vél El Payu i Navafrias i ata cenal i mas porque no me se terció de estal, que se hazia tardi, porque m'ofrecierun cama i almuerzu! Dende aquí les quieru dal las grácias otra ves pola su espitaliá i pol güen dia que echémus pallí a conocel los lugaris i, mas que ná, las pressonas.

2 comentarios:

Huliu dijo...

Pue me animau a i pa Rebollal pa semana santa

TXEBE dijo...

Lo pasamus bien. Lástima que los días sean tan cortininus :-)

Ya sabis que tienis las puertas abiertas pa cuandu quieras golvel.