lunes, mayo 09, 2011

Ressolucion pal fonema /h/

El otru dia ena reunion que hizimus la Comission de Léngua del OSCEC dimus una solucion al conflitu ortográficu que prevocava el fonema /h/ en estremeñu.

Enque el acuerdu hue por mayoria, uvu un descutíniu a tentu la conselvacion o no de la h mua etimológica i sobre cómu escrevil l'aspiracion que venia de f latina o árabi i que ogañu tien el mesmu son que j o g.

Tenia que queal craru primeru si era mestel conselval una grafia etimológica -la h mua- o no. La huerça de los presentis votó que no era mestel, enque mos pesara la carga etimológica. Desquitá la h mua, se pia reutiliçal pa la aspiracion, pero ligil aí una h, siendu esta aspirá namás en lénguas germánicas i no en romanci creava canteus destintus entre lo assistentis, pero tamien se reconoció que prejisamenti es con h comu se representa l'aspiracion i siendu unu de los rasgus própius del estremeñu l'aspiracion era lógicu que tuviera cierta representacion con el símbolu fonéticu própiu: h.

Comu no cumpria enllenal los testus con tanta h, se decidió conselval lo mesmu j que g sigún la etimologia i gastal h namás quandu vinieran de f o hueran parabras d'origin onomatopéyicu.

El parorama queó tal que assín:

-Que s'escreva en estremeñu con j proceenti de yod latina semiconsonántica i d'otras ressoluciones latinas -cul-, -li-, -le-: julgal, esprimiju, mujel, paja.
-Que s'escreva con j la palataliçacion de x latina i posteriol aspiracion: lejiu, enjambri.
-Que s'escreva en estremeñu con g quandu procea de g latina delantri de e o i: genti, giba, gengiva, maginal.
-Que s'escreva en estremeñu con h proceenti d'aspiracion de la f esplotiva latina i ciertas f del árabi: huenti, huelli, ahilal, atahárria.
-Que s'escreva j o h proceenti del árabi formi la su etimologia (j < [ʃ], [x], h < [h], [ħ]): jaqui, jara, mohinu, hata.
-Que s'escreva h en parabras de origin onomatopéyicu: heu, hipu, himplal, ahurreal, hihiu, hiheal.
-Que s'escreva ' en parabras con ataqui rísperu espressivu o antiiáticu: 'ave!, 'anda!, vo a 'entral, 'ca!, 'co!, 'to!

Es el segundu i, quiciá, mas enportanti passu que á dau el estremeñu eno que toca a l'ortografia.

No hay comentarios: