domingo, junio 05, 2011

Encuentru en Botija: primeras valoracionis

Ayel hue unu de los dias grandis del estremeñu i de la su cultura comu rezava el lema. Un primel passu que á asseñalau la huélliga entre las gentis de Botija i dal reol que vinun a echal el dia entre vetonis i lusitanus d'antañu i d'ogañu.

Pola mañana, la sala de prenus del Ayuntamientu quasi que pa última ora tenia enllenu el aforu. Endespues de apresentara yo al OSCEC i diera una chalrina en estremeñu a tentu de las lénguas repuntás en Estremaura, José Benito mos palró del estremeñu i de la cultura populal d'El Rebollal en léngua vernácula.

Alogu Bienvenido, de l'Asociación Cultural Pablo Gonzálvez, mos hizu una valoracion de la situacion del estremeñu i de cómu están trabajandu en Mijadas pa la promocion de la léngua, andi se está criandu una verdaera concéncia social.

P'arrematal, José María Alcón mos pressentó la su última novela i anduvu palrandu del processu de criacion i de pubricacion que tuvu con El Revesinu i conos Requilorios.

De que dimus las chalras ajorramus al estalachi andi los escritoris José Benito i Alcón Olivera espusun los sus librus a los vesitantis i yo el libru La nueva literatura en estremeñu dende el OSCEC. Allí en el estalachi puimus palral con tolos curiosus i enteressaus que acuian a avrigual qué es essu del estremeñu. Poel caraveal conos escritoris, con vezinus d'otrus laus de Estremaura que mos dierun la su enpression a tentu de la léngua tradicional, entrecambial pareceris, chalral amistosamenti sobre el estremeñu mos inchió el pechu i mos renovó las ganas de siguil luchandu pol patrimoñu oral. Mentris, la genti echava las palabras del su puebru en una buchetina que Bienvenido tenia aprepará. Eduardo, dende Serrailla, mos aprendió los sentius que tien la palabra cancaperra, Bienvenido los de turruncleru, palrémus de los apelativus cariñosus i d'otras custionis de la léngua. El maestru Naharro mos enteró de datus estóricus a tentu del muestru passau... tó estu en un ambienti vetón.

Ya de tardi, a las 18:00, endespues de dal una palabrinas pal Canal Extremadura, José Benitu "Txebe" abrió el espetáculu tocandu-mus pieças tradicionalis d'El Rebollal a la gaita i el tamboril i al panderu quairau.


Les siguierun los miembrus de la Asociación Cultural Pablo Gonzálvez que mos enllenarun los oidus de versus estremeñus i castúos, recitandu i leyendu, queandu al púbricu desmentau ena praça, alevantandu risas i arrepesguñandu los coraçonis, con acuerdus graciosus unus i cargaus de sentimientus otrus. Por baju, José Benitu criandu ambienti musical con el tin whistle de Dani.


Arremató Txebe l'actuacion cantandu cancionis ena palra i en leonés al son de los vasus de tubu o de la sartén cona cuchal i el deal. Gaita, tamboril, sartén, cristal, dulçaina, panderu i vos: música tradicional que almiró a Botija.

Subierun al escenáriu endespués Anhiojo Folk, dende Inojal, que achiporretó el puebru de jotas i sonis en estremeñu.


Pa concluil el dia, huimus a vesital el castru vetón en el tiempu de la postura. El pobramientu en aquel lugal sacau de penícula mos queó embaius entre enzinas i murus secularis, conpartiendu estórias d'antañu i d'agora.


Hue un dia enportanti pal estremeñu i pa lo estremeñu. La cultura pola cultura entovia atrai a la genti i comu diji ena presentacion del OSCEC, no es la cultura lo que mos uni, sino el querel conpartí-la. Muchas grácias dende aquí a tolos participantis, organiçaoris i al puebru de Botija.

No hay comentarios: