sábado, septiembre 03, 2011

Calçaílla

Esta mañana, comu el pran previstu de vesital a Olguera i Riulobus se eschangó, decidí dil pa Calçaílla, que es un puebru que siempri cai de passu, pero en el que entovía vía parau: oi hui aposimenti allí.

Á de sel un lugal mu antiguu, cuandu menus de pobracion de mu patrás, porque cerquina ain restus de assentamientus celtas. En verdá, tola parti esta a renti de Alagón está enllena de las huélligas los celtas, pero, comu muchas vezis aconteci en esta Estremaúra desatenta, están encultás i aburrías. Hazi unus mesinus vos palré del assentamientu del castru de Pescueça comu ejempru de los nuestra estoria desassajá. Pos, vé-la í, Calçaílla o cuandu menus enas sus tierras uvu de conocel celtas i romanus. De los romanus semus mas ciertus, porque entovía se conselvan angunus cachinus de la vía romana que diva al norti, la anombrá comu Vía Dalmacia, pa la parti El Sierru, mas que ná. Por mó desta calçá, le vien dau el nombri al puebru.

Parti vieja Calçaílla

Ogañu, diendu pola EX-204, atravessandu destensas hesas, el primel puebru que tenemus es Calçaílla. De ná que s'entra, alvertimus un pozu techau, que dizin d'El Enzinal i en el que aconteció una leyenda: una zagalina que cayó al pozu por culpa duna naranja pero que sobrevivió miragrosamenti. Una leyenda aparecía arrecogí esti veranu en La Puebla la Calçá, junta la Ermita la Concecion. Esti pozu se halla tamien al atrás duna ermita, la del Cristu l'Agonía, que es el primel edificiu en el que arreparamus namás llegal.

Detalli la ermita

La Ermita tien una hechura del sigru XVI i por huera mos sorprendi el grandol que tien. No ai mucha decoracion esteriol, enque es ressaltanti el rinconinu que está fronteru al bal "Mataliebres", que se vei ena retrataúra. A dambus laus ain ventaninas d'arcu conopial i ena fachá, que es de cantería, destaca el hornichi cona Virgin i una espadaña por cima bien colocá con adorninus.
Estauta el Lagartu

Por frenti ai un chanu adoquinau astilu praça cona crus i es andi ajorra la calli prencipal el puebru. A la derecha mos llama densiguía l'atencion otra cosa: la estauta al lagartu. Esta moerna estauta representa otru miragru sonau en el lugal, en el que un pastol, con rogativas, púu matal a un lagartu giganti endispués de componel-si la cayá que gastava en escopeta. A dambus laus ain unus pareonis escritus: pa un lau, fecha de inaguracion, utoridais, etc.; pal otru el testu en estremeñu mas largu hallau a día de oi en sitiu púbricu: Miragru el Crihtu y el lagartu 'e Calzaílla.
Detalli del prencipiu el testu

El testu por enteru dizi assina:

Pol el encinal / ondi loh pahtorih / solían pahtal / hadi muchuh añuh / había un animal / com'un crocodilu / lagartu o caimán / que atemorizaba / toa la becindá.

Ni paluh ni piedrah / lo puían matal / hahta que un pahtol / hihu del lugal, /acorralaínu / comu ehtaba ya / al Crihtu Benditu / se pusu a grital / pa poel salbalsi / y poel salbal / a lah obehinah / de la su maná.

-¡Crihtu l'Agonía / que la mi cayá / se haga ehcopeta / y cartuchu el pan!. / Ena boca mehma / en toah lah quiháh / un tiru le daba / la propia cayá / y... patah arriba / lagartu o caimán.

Tamien la ehcopeta / queó rebentá / pa que no matara / a dengunu máh. / Y hechu el miragru... / queó el puebru en pah. / El Crihtu protehi / a la becindá.

Está firmau por Pedro Cañada, políticu i utol de la Cohtitución Ehpañola en Ehtremeñu. Al vesitanti que llegui a esti puebru i vea estu escritu cuandu menus saberá del estremeñu i de lo que hablan los sus vezinus, i es que Calçaílla es tamien sonau por acogel el I Congreso sobre el Extremeño o habla extremeña, en el 2002, andi galrarun dialectólogus i estudiosus de la nuestra lengua.
Choçu piera
Al laínu mesmu i sin abaldonal la carretera, se vein a la gocha dos choçus de piera recostruíus en el cascu urbanu.

El Pozu la Pila
Por frenti, al otru lau la carretera, ajorra una callita que da a un caminu, en el que se enhalla el Pozu la Pila. El brocal d'estus pozus es curiosu, pos tien unu o varius desagüis andi va una lancha piera. Esti, con concretu tien lo menus tres, amás de gastal una pilina a unu de los laus, cosa que le da nombri al pozu.

Fachá el Ayuntamientu
Golviendu a la praça que hazi de frenti la ermita i sin dejal el adoquinau, subimus pola calli prencipal ata llegal a la praça andi está el Ayuntamientu. En él destacan los dos grupus de colunas paris de capitel jónicu, mu ralus de vél ena arquitectura civil.

Fachá con escúu
Diendu parriba, ena parti superiol el puebru llegamus a la igresia. Tras de la igresia vémus una fachá con un escúu cuya toça pon la fecha de 1726.

Fachá la igresia

La igresia de Nuestra Señora la Consolacion se halla amontá en un atriu, con naranjus a unu de los laus. La fachá, sin demaseá ornamenta, bastanti remoceá, tien por frenti otru de los pozus del lugal.

Pilina i periquitus

A la puerta lateral, junta los naranjus, acostodiá por imágin, se halla una guapa pilina. El rinconinu que hazi conos periquitus i el capitel con el imagin arriba es unu de los mas políus del puebru.

Torri la igresia

Al otru lau se halla la torri, obra de tres cuerpus, cuyu cimeru está hechu tó de cantería. Destaca la balaustrá del picoruchi, comparanti a la del puebru vezinu, El Guiju.

Calli Puenti

Por una de las callis den baju la igresia se sal a los corralonis de piera, las casas antiguas i las callis que entovía conocierun el cimentu.

Pozu privau
Ya al norti, sin perdel las parelis de piera, ain güertas con olivus i angunus de los pozus típicus.

Pozu grandi (al hondón puei vél-si una passilera)

Calçaílla, comu los demás puebrus antiguus que se esparraman en el valli de Alagón, guarda, no namás la lengua, comu el escritol Pablo Gonzálvez o el políticu Pedro Cañada án precurau demuestral estus añus atrás, sino tamien pozus con leyendas, callis adecentás, callejuelas con nombris como "Burrero" o "Andana" i edificius de linda hechura.

1 comentario:

CarlosDelSol dijo...

Calçaílla, un puebru arrocháu que á savíu comu pocus espetal la querencia al estremeñu comu una de las sus señas de identidá (anqui sa en grafía "gonçalveña"...). Quienis avallamus p'allá n'aquel suritu outuvri del 2002 recordamus el Primel Congressu sobri el Estremeñu comu una esperencia inolviavri... Güen lavutu gráficu, noragüena Ismael.