El cielu nocturnu

L’Astronomía populal estremeña es unu de los campus la nuestra coltura que más se desconoci en ogañu. Enque los estremeñus de siempri án mirau al cielu, l’án teníu muchu respetu. No án puestu en él erois ni grandis estorias mitológicas i malaspenas religiosas.

Ena maginación los estremeñus, en el cielu nocturnu salin las estrellas —porque essi es el verbu que gastamus, salil— de destintas maneras formi'l tiempu. Se hazin varias destincionis delos cuerpus celestis nocturnus: estrellas, luzerus, Caminu Santiagu, estrellas descabrijás, Luna.

Cielu nocturnu (Almiración dendi Badajó)

Estrellas

Son los cuerpus que relumbran de manera fixa sigún la época l’añu. No está la vos costelación de manera populal, sino el concetu de salil. Sigún el tiempu, las estrellas salin en una horma o en otra, comu si pal mirandiqui dela nochi hueran aparicionis de destintas figuras. Ei arrecogíu en parabras delos nuestrus viejus varius nombris delo que ogañu entendemus comu costelacionis i que están pendientis de vél su relación colas costelacionis griegas. Los nombris asseñalan cosas corrientis comu El Braseru (Corona Borealis?), El Carru Grandi (Ursa Maior), El Carru Chicu (Ursa Minor) o La Bozina (Ursa Minor?) o d’animalis comu Los Patus, Las Ovejitas o Las Cabrillas (Pleiades). Las Cabrillas, entre los conoceoris del cielu, es la referencia prencipal pal cielu d’iviernu, pos los más antiguus sabían la ora namás que pol altol que lleva. Otrus son erencia la tradición cristiana o del acristianamientu nombris paganus comu Las Tres Marías (Cinturón de Orión), El Mantu la Virgin (Pegasus?), El Carru Santiagu (Ursa Maior). Tenemus el reflán populal que dis, izi: La Luna d’otubri el Mantu la Virgin cubri. Si seguimus los endilguis el reflán, pol altol la Luna en essi mes, se halla por baxu de Pegasus, que es más aparenti a lo que quiel izil.

Comu estrella más importanti’l cielu nocturnu i que tien el su nombri es La Guía (Polaris).

Luzeru

Cola parabra luzeru se llama en estremeñu a qualquiera estrella que sea sobressalienti pola su brillés, peru más que ná, al praneta Venu quandu se vei al pardeal i al crareal. Si es velaquí el luzeru la mañana se llama Luzeru l’Alva o Luzeru Matagañanis i si es el dela anochecía es el Apeayeguas.

Caminu Santiagu

Es el nombri cristianu pala Via Lactea, conformi tamién con el nombri de El Carru Santiagu i el Arquitu Santiagu (Arcu-iri). Junta él está el nombri paganu, menus conocíu i que pareci que á sobrevivíu a la tradición cristiana i que es el de Caminu de Roma.

Estrellas descabrijás

Essi es el nombri populal pa llamal a los pranetas, mentaeru que senifica una cosa apaicía al griegu πλανήτης. Alo vistu, los pranetas son en estrellas, peru no están hincás, sino que comu están unas vezis en un lau i otras en otru pareci que ahilan descabrijás. Polo plontu no ei recogíu dengún nombri pa mentá-las en concretu.

Luna

La Luna enas sus destintas fasis tien los nombris de crecienti, mediá, menguanti. Quandu está llena mos apareci otra ves el sentíu religiosu cristianu, pos está la creencia de que en esta fasi sal en ella la cara Cristu. Quandu la Luna es nueva se habla de las novicionis. Ai un reflán a tentu’l cercu la Luna i el Sol que izi, izi: el cercu’l Sol moja al pastol i el de la Luna, lo enxuga.

Esti, comu otrus campus del sabel populal estremeñu, está cencíu, lo mesmu eno tocanti a las creencias i mitus comu al léssicu. Tamién temas comu los mitus criacionistas i hechura’l universu, nombri las estrellas —qualquiera que sea l’andal— o si ain nombris autóctonus pa mental otrus cuerpus celestis comu cometas, galassias, nebulosas, etc.