sábado, mayo 18, 2013

La Cumbri

No mu largu de Trugillu, en sitiu llanu i bien oreau está el puebrinu dela Cumbri. Es sitiu nuevu, pos ata el sigru XV no se mienta en decumentación nenguna, sigún asseñalan Sánchez Rubio i Bernal Estévez. Seguramenti viniera comu destensión delos empobramientus trugillanus tardíus cercanus pa reforçal los assentamientus dela parti de salienti, cerca del cussu de Tamuxa i Gibrançus.
La Cumbri
 Ogañu es un puebru que guarda l'arquitetura dela parti trugillana. Callis con retortuñas i desordenás, casas en picu, callejas, callejonis con recuéncanus i lindus rinconis, puertas hundías en arcus i praçuelas en cruzis. En passeandu polas sus callejas i callis de piera, con casas viejas i repuestas, boegas i talleras se sienti la ligereza con que uvu de crecel esti puebru ai sigrus, sin siguil una guía, arremolinandu-si en praçuelas, entallandu-si unas con otras, sin sitiu apenas pa bestias.
Elesia dela Assunción
 Esta vesita de tardi al puebru se la devu al compañeru i amigu Diegu, cumbreñu vieju, que hizu de ciceroni polas callejas, uertus i caminus. Enque la tardi s'echava, dio pa vel lo más asseñalau o, quandu menus, lo suficienti comu pa trael-vus un reportagi aparenti d'esti puebru estremeñu.
El Rollu con el ayuntamientu al atrás
 Izin "cumbreñu, pata de leñu" i otrus los llaman "atravesaus" i es que la Cumbri tien cuentus míticus sobre el caraiti delas sus gentis. La viga que querían entral de mala manera, el burru asfissau que quitava las yervas del campanariu o los gatus que divan a fornical a Trugillu son estorias de guasa que rezumin simpatía i dessageración, con que artolanus i ganaerus s'entretienin enas corroblas.
Crus con corona, pa salienti
 El desacolocamientu aparenti de casas se vei chalpicau de cruzis enas partis dahuera, lindandu el puebru vieju. 
Crus cerca dela carretera, al sul

Crus de ponienti

Casa tradicional, cona entrá en arcu i chiminia antigua

Casa de picu

Rincón

Calli entallá

Casa de picu
 En una delas casas vemus un escúu religiosu del sigru XVII, sigún reza en baxu.
 En una delas uertas del puebru, encontramus un conjuntu d'arcus bien curiosu. Son de ladrillu i cal i pareci que son el lau d'algún claustru o la parti delantera d'unus estabrus, compricau sabé-lu oi.
Arcá de uerta

Detalli de arcu más anchu
 Cerca está la ermita de San Gregoriu, con una antigüíssima crus delantri. Está repuesta, peru entovía conserva los contrafuertis i la espadaña de ladrillu.
Ermita de san Gregoriu

Espadaña
 Saliendu del puebru, pa ponienti, pol caminu Prasençuela, buscandu las barrancas i las barreras del ríu Gibrançus encontramus el tesoru dela Cumbri: la Puenti. Ajuntava algún vieju cordel, dá que es una puenti mu bien costruía en un ancón que hazi Gribrançus. El caminu estava perdíu ai un sigru i ogañu la Puenti no lleva a parti nenguna, pos en atravessandu-lu lo que se vei es una alambrá.
La parti dela Puenti, dendi el caminu Prasençuela

Cuestas de Gibrançu

Flora del lugal


La Puenti

Gibrançus

Detallinu del suelu dela Puenti
 Las cercas dal reol muestran engarillas de forja, unas más decorás, otras más bastas, que sostribás contras las ombreras entovía aguantan el passu del tiempu.
Puerta de forja sin remachis
 Siguiendu el caminu de Prasençuela vuelvi a cruzal-si Gibrançus por un puenti nuevu i cerca puein vel-si las conseñas de molinus i antiguus passus pondi diva el caminu vieju.
Gibrançus

Molinu vieju

Conseña duna puenti

Molinu vieju

La Cumbri dis Castaño Fernández, que vien de culmen, por estal en sitiu altu, peru la ralidá es que la Cumbri no está en altu. Conos escassus 481 metrus no se destaca delas endulacionis dela penillanura trugillana más que otrus laus ni que otrus puebrus cercanus comu Prasençuela, Ruanis o Vivarnandu, tuviendu, mesmu, más altura la dehesa dela Xara, pa ponienti, que son los arrayus del puebru con Prasençuela. Un otru sentíu á de tenel esti topónimu entocis...



No hay comentarios: