viernes, junio 14, 2013

Robleíllu de Trugillu

El puebru de Robleíllu, assentau ena cara norti dela Sierra de Montanchis, tien nombri ereau delos tiempus dela conquista, peru era sitiu pobrau de muchu enantis. La idea simpri, más bien duci, de que Estremaúra era una tierra desempobrá i bravía, mos á criau el sentimientu de impertenencia i de renuevu. Peru quandu se vesitan lugaris tan cargaus d'estoria comu los que arroean la sierra de Montanchis i los robris, enzinas i alcornoquis mos enllenan los ojus, restus de tolos puebrus que án díu viviendu allí están esparramaus en baxu dela huélliga dela toponimia, ata el propiu airi enraza i del pechu abarban sentimientus de calentança, antigüedá i segurança. 
Robleíllu
Torri dela ilesia de s. Pedru
 Sabemus polos decumentus i los estoriaoris, que Robleíllu tenía 51 vezinus pecherus, más del dobri de Ruanis i Santana juntus por aquella mesma fecha. Tuvu de sel un sitiu que no se destacava delos dela comarca, más que por estal ena costana dela Sierra de Montanchis, arrecucau entre cerrus i un monti tupíu i desapartau de vías de comunicación prencipalis, enque con buenus caminus ata ellas.  
Puerta falsa cona bandera estremeña
 Ai unas semaninas, hui a vesital esti puebru en compaña dun cumbreñu i un higuereru cuyas espricacionis dela vida d'antañu pallí ayuava a entendel el passau i valoreal más aquellu alo que le estava echandu retratus. En viendu los puebrus enos que nunca s'á estau, si se has en compaña d'algunu delos vezinus, el apreciu polas gentis, la naturaleza i los edificius acreci lo suficienti comu pa querel volvel a dil en cata de más monti, más estorias i más vivencias.
Las callis de Robleíllu siguin los caminus de passu antiguus que atraviessan la sierra, de norti a sul, destendiendu-si al reol dela praça, a 497 metrus. La rivera de Gibrançus que pola Cumbri es una muchachina gustosa de correl mundu, peru sin el premissu delos pairis, en el lugal de Robleíllu en siquiera a prencipiau a aprendel a andal.

El Poço Dulce
 El puebru, sin sel del tó serranu, tapocu es del tó trugillanu -enque pesi el apellíu-. Namás ai que vel la hechura delas sus casas con piera de granu, las toças rezias i brocalis quairaus delos pozus que crían praçuelas o las praçuelas que crían pozus.
Rinconinu
Toça con santu gravau
 Peru con tó i con essu, l'arquitetura arrenda la trugillana en cosas pequeñas: los rinconinus, algunas casas de picu, algunus portalis ahondaus... i sin embargu tamién vemus arcus escarçanus que mos recuerdan los puebrus dal otru lau dela sierra i la tradición romana.
 Algunas casas de fachás derechas con bastioris de granu enos vanus huerun señorialis, erencia de familias que antañu, enos tiempus dela nobreza i la cavallería, eran los que escrevían la estoria, a julgal polo que mos cuentan los librus.
Casa con escúu

Detallinu del escúu conos calderus
 Sin embargu, essas mesmas casas de señoris i familias nobris compartin calli con cercas de piera o casas menuínas, calli pola que tamién uvu de passal el ganau i los pastoris i los sus zagalis sufríus. Agora namás s'aprecia un escúu.
Quaira de picu

Puerta falsa
Detalli duna paré
 Diendu polas sus callis, que en siendu sitiu altu, tapocu están embarrerás demasiau, s'aprecian coloris, puertas falsas, çócalus, santus, escúus, argollas... i lo mesmu muestran la piera que, abexinás, la incultan de baxu del cimentu i la cal. 


Casa de rincón

Portal de sillaris, sillareju.
Puein vel-si las argollas i pondi  cola un regatinu embaxu

Pozu
 Peru si ai algu que'l filólogu valorea más que las argollas andi atavan las bestias, es, sin duda, la presencia de  escricionis. Son la estoria corrienti de aquellus que no quearun más que los sus nombris en piera, muchu más antiguus que los santus delos escúus dela nobreza medieval. Cesiu, Cecilia o Julia, conseña romana delos que anduvun viviendu en tierra vetona. En Robleíllu, comu en tolos demás puebrus dela parti aquella, descubrimus algunas d'estas lápidas encrustás enas parelis o sirviendu de toça. Velaquí tres delas visiblis, siendu la más presentera la dela el casa'l cura.
M·I·M
MARCE
VS·AN·XL
C·I·M·F
CAESIVS
AN·XXXV
H·S·T·T·L·
MAVRA
M·F·C

?????
?VS·?        O
S·E·S·T·T·L·
AECILI A
F·COL  EA
TRI·F·   ·

IVLIA·I·
MAIORI
H·S·E·S·
T·L·

Crus, ala salida del puebru
 Peru no es justu que palremus de Robleíllu sin palral dela sierra andi s'assitia. La parti delos Alixaris, que enque tenga nombri moru, asseñala lo que es, terrenu atravessau por cerrus. Es el cabu dela sierra de Montanchis, justu enantis dela portilla juntu al Puertu de Sta. Crus, ondi la sierra a pocu a pocu vai embotandu las picorotas, las costanas se desponin menus prunas i las alturas son menus altas.
Huenti la Techá
 En saliendu polas pistas, pola crus, se hazi lo que llaman la ruta del cerru Molliquero, un passeu que arroea buena parti del términu de Robleíllu pola sierra i dendi la que se puei vel una muestra delo que la mítica sierra del monti Tangis inculta. 
Pilonis
 Mos susprendi la huenti la Techá, enos manantíus dondi naci Gibrançus, con dos bocas tapás por lanchas i un lindu pilón. El sitiu lo án aviau comu merenderu i es aparenti pa refrescal-si i reparal en el paisagi que, formi ahilamus, se vá cerrandu de robris, olivus, enzinas, alcornoquis, xaras, escobas, arvejaconis...
Canchu con cuenquinus i pergañus
 Desviandu-mus del caminu, el amigu de Robleíllu mos llevó a un canchu curiosu, dendi ondi puei vel-si tola parti delos Alixaris. Esti canchu, ya de por sí tien la su estoria, pos los cuenquinus i los escalonis que tien mos portea a otrus tiempus de ritualis que ya no entendemus.
Morra
 Detrás, la imponenti morra pareci que rompi las nuvis que quierin d'enreal-si entre las pingollas delos arvus provincius.
Ganau ena sierra

Ganau junta la presa dela Çarça
 Enas cercas, el ganau pasta i descansa, descansa i pasta, buscandu la frescança dela tardi, junta'l agua o al reselvu de arvus tan viejus comu las pieras d'essas cercas. Pola parti de ponienti s'escumbra la presa dela Çarça, comu una charca al abrigu dela sierra. De frenti la Raiguera, con bancalis de parras, parti pola que eran sonaus los vezinus de Robleíllu: las higueras. Velaí el moti de higuererus
Engarilla
Las cercas, con engarillas hechas de llantas de rueas de carru, los olivus i las vacas, el pozu la Raiguera, ala entrada del puebru, el delas Viñas... Apenas ai ná ena arquitetura del ombri en esta sierra que desentoni, que se destaqui. El terrenu en bancalis, las cercas escamuflás entre la fusca, los pozus junta los caminus. Las estorias remondonas que se contavan en el caminu eran las passás allí, sanas i de moceu, dela mesma clima. Con essas estorias, ata los coloris dela sierra resultavan más bonitus delos que son agora i, sin embargu, no eramus escapazis de sacá-lus en estus retratus. La buena compaña en estus viagis dan más bondá alas casas i alas cercas delos puebrus que se descubrin pola primel ves en el tragineu delos ombris. 

No hay comentarios: