lunes, abril 14, 2014

La puenti d'Ayuela ena carretera Badajós

Sabi dios las vezis que abré bandeau la carretera de Caçris a Badajós en estus añus...! Pos ata oi no m'á dau por paral-mi i vel más despaciu lo que polas priessas i el aginaeru con el que siempri vo pa Caçris no ei poíu vel. 

Esta carretera atraviessa muchas riveras, ríus i regatus: la Troya, la Piçarrilla, Ayuela, Salol... Sin embargu dos puentis, mu aparecíus, son los que antiguamenti ajuntavan pola parti delos Llanus la carretera, el de Salol i el d'Ayuela. Los dos son mu aparecíu ena hechura, peru oi vos traigu namás el de Ayuela.
El ríu Ayuela cona puenti en el vuelu americanu
 En el términu de Caçris, al pie dela sierra de San Pedru, corri el ríu Ayuela, de linda corrienti en iviernu i primavera i que en veranu se quea reduzíu a chabarconis paquí i pallá. La parti dela que tiramus retrataúras es la que está junta la carretera, entre las dehesas delos Ramogiles, Xacafre, Xaquesón i el Clavín (topónimus bien curiosus). Mesmu el nombri de Ayuela tapocu está mu esclarecíu. Galvés de Fuentes (2000, Los topónimos: sus blasones y trofeos: pág. 176) lo trai dun *Abiola con raís prerromana *Abia, sigún pareci idrónimu. No estó yo mu ciertu d'essu, tendremus que envestigal.
Ríu Ayuela pola dehesa del Xaquesón
 La puenti que passa por cima, en el tramu que está anulau peru que se puei passal con el cochi, es mu reziu, comparanti al imediatu darriba, el del Salol i mesmu aparecíu al de Guaxira, polo que quiciá que sean dela mesma fecha. No ei encontrau escrición nenguna que den más enteracionis de quándu lo costruyerun. Comu esti ríu no acostumbra a enllenal-si lo suficienti comu pa crial riás, la costrución está mu bien conservá. Amás dendi que dexarun de roal los cochis porcima se puei vesital sin perda ni estorvu pa naidi.
 Hueraparti dela puenti, convién echal una guipaína al reol i sentil el guarrapeu delas ranas, el cantíu delos xilguerus, los galápagus a tiral-si dendi los canchus al'agua o regalal-si cona vegetación de carrascus, cantuesus, xaras, xaramagus...
Canchus dela barranca norti

Ayuela pola parti de salienti

Xaras aflorecías

Cantuesus con coquinus a çugal

Froris en el'agua
 Enque ena retratúra del vuelu americanu, tirá en veranu polo secu que se vei tó, no vemus ucalitu nengunu. Estus arvus tan dañinus pal campu están tupíus junta esta puenti criandu un suelu secu andi no crecin más que la grama i quatru yervulajus. Los ucalitus están ena parti sul del ríu, peru cogin unas pocas de ectarias pola dehesa del Clavín. Desconocía que las xaras puieran crial-si junta los ucalitus (o al revés), peru comu tola parti al sul ata metel-si ena sierra está tupía de xaras están a baqueal pola sobreviviencia i los nutrientis del suelu. Con tó i con essu, los ucalitus aí son mayoría i está çugandu del suelu las aguas del Ayuela sin consideración ni naidi que los baraji. Confiemus ena huerça delas xaras!
Xaras aflorecías embaxu delos ucalitus

No hay comentarios: