jueves, enero 07, 2016

Cuenquinus delas Mingarras

Pola parti que dizin delas Mingarras, en el términu de Nava'l-Conceju, ai un retahila de canchus i canchaleras que tienin cuenquinus i cuencas (cazoletas) pocu estudiás. En el endilgu de oi vos traigu los que ei descubiertu en una canchalera cerca del caminu delas Mingarras.
Vista general dendi los canchus
 Las retrataúras las ei sacau oi, paque se vean los cuenquinus con el'agua, de má que m'ei pegau una calaúra. Entre mollineu i mollineu i landeandu polos canchus dal reol, namás encontré unu un pocu más baxeru i desviau del conjuntu que presenta un cuenquinu.
Cuenquinu en una piera suelta duna gavia
 Saltandu gavias, ena terminación duna dellas, se halla el canchu más ralu de tós: se trata dun canchu en piringutu que tien varius cuencus por baxu en escala. Tres d'ellus están aliñaus, siendu el central el más grandi. Tós tres son inregularis, no parecin escavaus. El central es auevau i tien, comu s'aprecia ena retrataúra de más pabaxu, desagüi. Entre el central i el cimeru, ai una especii de pergañu i rebaxi más allanau. El mosgu no da pa vel marcas de hiendas o cuenquinus más chiquininus. El picu da pa ponienti i los cuenquinus pa salienti.
Vista del canchu i el piringutu

Vista delos cuenquinus dendi'l piringutu

Cuenca central
 Por detrás ai canchus i bolus en barrera, que la fusca i el mosgu no dexa vel gran cosa. Sin embargu, sí púi subil a una especii de cueva o abrigá entre dos canchus por mé dela que se va citrandu el'agua.
Canchal

Cuevina
 Al lau se vei una piera despressa acuencá entre los cerezus embarreraus.
Piera despressa

Tres cuencus
 En subiendu un pocu, por cima dela cuevina, ai una estancia entre varius canchalis que unu tien tres cuenquinus seguíus. Son reondus dos de ellus bastanti bien hechus, no parecin naturalis. Por frenti delos hoyinus está la entrá a esti espaciu que tamién da pa ponienti. Pola posición, la postura de sol á de dal en essus hoyinus.
Detalli del primel hoyinu
 Al hondón, se vei otru canchu partíu, con una horma mu curiosa, del que ya vos trairé retrataúra otru día.
Vista pa ponienti
Por avel mosgu tapandu tolos canchus, lanchas i mesmu los cuenquinus más chicus i están mu refalosas las caras delas pieras, de má que es compricau estudiá-las en esta fecha. La piedra más cimera tien dos cuencus quasi reondus i unu más grandi inregulal. Por delantri dellus s'aprecian otrus cuenquinus menoris, peru con el mosgu namás se barruntan.
Detalli delos dos cuenquinus dela piera cimera
En esti primel endilgu namás pueu ofrecel lo que se está ala vista, sin sabel qué poía sel essa canchalera, si era un santuariu, un osservatoriu, puestu de vegilancia, si avía vivienda o qué. Pola orentación i la recholá de cuenquinus en unas pieras dás i no en otras, seguramenti huera un osservatoriu-santuariu, que diremus estudiandu enas destintas fechas.

No hay comentarios: