En Nava’l-Conceju, a renti del ríu Xerti, se
celebra en san Sebastián una d’estas costumbris paganas que tantus quebraerus
de cabeça da alos antropólogus: el Taraballu. Espasma cómu s’arrebuja lo paganu
cono cristianu.
 |
Ilesia de Nava'l-Conceju
|
En san Sebastián, dispués delos preparus delos
días anterioris, se has missa pol santu en presencia del Taraballu. Duranti sal
el imagi de san Sebastián con el ramu de naranju pola puerta dela ilesia, los
zagalis asperan an pie dela crus el Taraballu.
 |
| Salía del santu junta'l Taraballu |
 |
| Prusseción |
 |
| El Taraballu a harreal alas autoridais |
Antiguamenti le tiravan naranjas, verças i
mondajas. Bailava tamién enantis al son del tamboril i él mesmu llevava unas
castañuelas grandis mirandu el santu de frenti, aparecíu a comu son los
lançaoris de Frexenal. Con ellus comparti algu dela vestimienta, pos el
Taraballu tamién vá de brancu i colorau: brancu el hatu, aspecii de monu, con tolo demás colorau: bolronis delantri, puñus i
baxeras, la estrella de seis puntas bordá en el pechu i braçus. Ala espalda, un
reondel con un muñecu, tó colorau, i por baxu, ena parti del rabillu, la
palabra BESA. Pegau al tragi, un picoruchinu brancu. Ai tiempu tamién
s’antruejava con una careta.
 |
| Un zagalinu a pegal al Taraballu |
 |
| El Taraballu con el ventril harreandu |
Muchachus, moçus i viejus procuran de dá-li una
palmetá enas espaldas cuandu se descudia. Él respondi con un vergajazu que
harrea con un ventril d’espartu endurecíu, hiziendu que la genti no guardi el
ordin ena prusseción, corriendu pa un lau i pa otru.
 |
| San Sebastián junta'l colegiu |
En ves en quandu tiraoris pegan un escopetazu al
airi, salvas que rebumban enas callis estrechas del puebru.
 |
| Un muchachu corri del Taraballu |
 |
| Regressandu ala ilesia |
Namás conservan la tentigués el colru de
cantoras que, con un son más apagau i despaciosu que comu cantan en el
Harramplas, ván tras del santu con una copra aparecía.
 |
| Los tiraoris i las últimas salvas |
 |
| Terminación dela leturgia dispués dela prusseción |
La prusseción ahila polas callis prencipalis a
otru passu i sin acabal d’encaxal con el correteu del Taraballu i el silvíu del
ventril. Fiesta comparanti ala Lupecalia, al Harramplas, alas Carantoñas, ala
Borrasca… ritus paganus que sirvin pa hondeal con el iviernu i entral purus ena
primavera, trocaus de día, pa casá-lus cona ilesia.
Comentarios