sábado, noviembre 22, 2014

Lacimurga, la capital margullía

Enas lindis entre la Serena i la Siberia, en el tesu que dizin el Cogollúo i al reol se hallan los restus dela vieja Lacimurga. Mal escavá, mal cudiá i mal estudiá, encima se halla quasi que toa perdía por estal cubierta pola presa d'Orellana, queandu assina una delas capitalis más importantis dela antigüedá lusitana-vetona çamargullía i aburría.

 Diendu pola pista que ajuntava la Puebla i Esparragosa con Pela se atraviessa parti dela dehesa que son los restus dela vegetación d'aquellas tierras enantis de cael en el desiertu dela ganaería estanca.
Sala con poyu corríu
 Sitiu de pescaoris, la huerça folasterus, los canchus que'l agua dela presa desaparta, peru una puenti ajunta, se hallan tan largu i tan cerca al mesmu tiempu que no se puei entendel ná dela vida antigua en esta parti estremeña. Tantu muó la paisagi que ai que echal bastanti maginación pa vel cómu poían sel los puebrus prerromanus i arromanaus que avían pallí.
Bañu
 En el cerru del Cogollúo, ala parti derecha dela presa, se hallan los restus escavaus i aburríus del tó d'algunas estruturas romanas, las más presenteras, las termas.
Rinconinu con el poyu i las parelis de piera
 Varias salas con destintus tipus de bañus, tinas, poyus corríus i canalis comíus pola fusca, las cagalutas del ganau i las catalinas del de dos patas en qualquiera esquina.
Unas delas parelis
Entrá a unu delos quartus


Materialis tiraus enos quartus
 Varias salas presentan pieras despressas i con otrus gastus que s'án díu hundiendu i cayendu.
Barrera a mediu escaval

Pista enantis de atravessal el tuni, an pie del cerru Cogollúo

Puenti con pescaoris
 Pola orilla junta la puenti delos pescaoris entovía quea la conseña costrucionis, alguna cata trasconejá i liençus de murus.
Liençu al pie dela orilla

Orilla con pieras caías delas parelis
 En el museínu dela Puebla poemus vel angunas delas pieças del Lacimurga, prencipalmenti romana, comu terrae sigillatae, lucernae, urnias, hevillas, parelis finas i escricionis.
Caquinu con decoración de guirnaldas i rezimus

Urnia

Varias pieças romanas

Lucernas i parelis finas

C·IVLI/VS·C·I'·/FRONT/O·AN·XL/H·S·EST/S·T·T·L·

CERERI/L·IVLIVS/L·F·AFER/VICANIS/DD
Lacimurga es una dela muchas muestras del patrimoniu estóricu estremeñu hechu ciscu polas obras mandás de huera i la dexación del goviernu pala escavación, conservación i esplotiju del yacimientu (o lo poquinu que quea). Dispués de venil dallí, se hincha el pechu de ravia i desazón por vel cómu la nuestra estoria sigui aburría, sin estudial, sin esparramá-la entre los propius estremeñus, ignari perpetui.

sábado, noviembre 01, 2014

A ponte de Olivença

Las puentis ajuntan las pessonas quandu está en ellus la voluntá d'ajuntal, porque tamién ai puentis que desapartan. 

Enas tierras d'Olivença, en el ríu delas mil caras que es Guadiana, a primerus del sigru XVI, en 1509, el rei don Manuel el Primeru mandó hazel una puenti que ajuntara la importanti Olivença al reinau i que tuviera buenas comunicacionis con Elvas i, está polo claru, con el restu de Portugal.

 Olivença, rica en ganaus i tierras, se benefició d'esta obra, que vidu cómu el obispu de Ceuta (por antoncis portuguesa) s'assentó en tierras oliventinas. El poel religiosu s'esparramava dendi la Igreja de Santa Madalena, antañu sé del obispau, modernamenti "mejor rincón 2012" sigún una marca famosa, cosas delas almiracionis estóricas... 

 Pal casu que quandu Estremaúra se convirtió en tableru de juegus pal reinu castellanu i el Alentejo pal portugués, la puenti sufrió los primerus çocotreonis delas ansias nacionalis de ca lau conas guerras de Restauración. Más tardi, ya en el sigru XVIII, el exércitu comandau pol marqués de Bay s'encargó de gastal la pólvora pa cael la puenti justamenti dos sigrus dispués dela su costrución, queandu-la formi se vei enas retrataúras. Tristi estoria de guerras que hizun que Guadiana de ves de sel el ríu que uni, se convirtiera ena frontera ata agora.
 La puenti está bastanti farrungá, peru el cachu dela parti portuguesa es la más largol conserva delos 19 ojus que tien por juntu.
 En el mediu la metá dela puenti se hallan los restus del puestu de vegilancia-fortaleça que en su día guardava la costrución. Apeninas quea una paré con vanus, una escalera i el arranqui dun arcu.

 Alo largu dela calçá se vein los hoyancus, ciegus i trascolandu, que comu la corcoma vá aburacandu la estrutura.
 Pola parti baxera entovía se vein las marcas de canterías con mucha variedá d'ellas, dendi numeralis, ata símbolus, floris i cruzinas.

 Por cima crecin las carrascas i matas dela dehesa, rachandu el suelu i alevantandu las pieras.
El caminu a parti nenguna, los endicaoris de cachu cortau i, al reol, las enzinas i los vesitantis que echan el día de campu entre moquerus de papel i condonis de colorinis gastaus. Essa es la lindi da ponte Ajuda (pola ermita que ai pallí). Puenti muerta, antis caminu de unión, dispués puntu estratégicu, alogu pieras cargás d'estoria que dan sombra alos dominguerus. La estoria i las sus jangás, largu d'entendé-las, aquí vos pongu esta vista de retratus: tamién enos Tossantus celebramus la muerti delas obras del ombri.

miércoles, septiembre 10, 2014

Los dançaoris de Frexenal

El 8 de setiembri, concidiendu cona luna llena, los dançaoris en milenariu baili recorrin Frexenal en baxu del son clissanti dela gaita. Las vesitas polas casas de mayordomu, ilesias, tavernas i otrus sitius andi contribúin en el petitoriu los vezinus hazin que dendi las sieti dela mañana ata las dies dela nochi no parin de bailal. Velaquí la corónica en imagis.

La tamborera de catorzi añus, hiziendu estoria

Bailandu delantri del'imagi ena ilesia

Ajorrandu por una delas callis, tamboreru, guía de verdi i los dançaoris


Letreru omenagi en unu delos puntus de baili

A bailal polas callis entallás del lugal

Movimientus ena parti rápida del baili

A bailal conos pañuelus

A bailal de frenti ala virgi



Los zagalinus acontinandu cona tradición

Costalerus a descansal




lunes, agosto 04, 2014

La tumba dela Uerta Montero

Las vezis que no abremus muau de parecel, de religión, de cultu, de costumbris dendi los primerus abitantis d'estas tierras ata los que estamus agora... Sin embargu, toas essas muacionis que quasi que nunca sabemus a cuentu de qué son hazin que veamus las obras delos antiguus con estrañeza i almiración. 

Eno que agora es el políganu de Mendraleju, velallí ena parti norti del puebru i siguiendu una carrefilera de empuebramientus i necrópolis dendi los cerrus delas Vegas Baxas ata el centru delos Barrus, está la tumba dela Uerta Monteru, una sepoltura de que tien 4650 añus (sigún preva del carbonu-14)  i que es una delas joyas más antiguas del  patrimoniu delos estremeñus.
Dibuju dela tumba ena entrá
 En una lomba que ai renti al caminu Lobón que sal de Mendraleju i el regatu las Picás, mesmamenti junta el ferial, está acotau el terrenu ondi se halla la tumba. Amás, el terrenu cedíu pol ayuntamientu al reol dela tumba vá a premitil el día que aiga possibli tenteal pa vel si ai más tumbas, pos no era ralu que esti crassi d'enterramientus estuvieran ajuntaus, no solitarius.
Entrá andi s'aprecia la rampla i el correol de piera
 La tumba de correol está cubierta por un edificiu aparenti pa servil tamién de centru d'entrepetación, bastanti atinau dá que el yacimientu está ahuera del puebru i precisava de estal tapau i cercau. Fallu gravi es el no tenel mostruariu nengunu con angunas delas pieças o uessus allí hallaus: lo únicu son grandis letrerus espricativus.
Lanchas de piçarra del correol
La tumba está mu bien conservá, seguramenti porque está escavá en el caleñu un par de metrus, es dizil, no está sobressalienti comu otras tumbas, i amás la propia bóveda dela sala que uvu de sel por acercamientu de pieras, comu muchus delos buhíus tradicionalis estremeñus, i que ena parti del mediu tenía unus 4 metrus, deque cedió i se farrungó, tapió la sala premitiendu que no cedieran las parelis i los axuaris i el uessariu permanecieran sin tocal. 

Sala o cámara. S'aprecia la clariá entrandu pola puerta.
Detallinu dela paré
 La colá o el correol tien un cachu que está de rampla alo primeru ata llegal alos metrus propiamenti dichus que son de passillu ondi grandis lanchas de piçarra lo tapa. Essi primel cachu tien la paré de caleñu i alogu el segundu cachu es de piçarra, en lanchas i en paré. La hechura i colocación premitin que'l día del solticiu d'iviernu el sol atraviessi el correol i alumbri la sala entera.
 Ena sala, que tuvu usu duranti un mileniu arreglu alos destintus tipus de uessus i materialis que se hallarun endrentu, agora está conas parelis sin cubierta más que anguna que otra lancha. El haci de materialis que dio hue enormi, dendi retejonis i caquinus de vasijas i vasijas enteras ata los imagis o ídolus labraus. Tamién cuyamenti que encontrarun dos caracolas.
Detalli dela puerta
Letreru conos materialis dela sala
 La sala tien un diametru bastanti grandi, pos estas tumbas eran coletivas. Comu estuvu por tantu tiempu usá, lo mesmu pa enterral que pa hazel cultus, son muchus los cuerpus que se hallarun, pocu más dun cientu. La huerça delos cuerpus se encontrarun çaleaus, enque uvu exemprus tamién delos acolocaus de manera agaivá ena postura fetal.

Lagareta, canal i citerna
Peru si la propia tumba no huera ella propia susprendenti, tamién al reol ai tres lagaretas ondi se hazían las mesclas de barru i caleñu pala tumba. Estas lagaretas están también escavás en el suelu i una d'ellas tien una canalina que vien duna citerna de unus 80 litrus de cabusía.

El yacimientu en verdá que espasma pola antigüedá i lo bien conservau que está, andi se aprecia quasi que tola tumba. Oxalá i el día de mañana escavin por detrás andi se vei que puea avel otra igual! Esti tesoru que está en los Barrus no es el únicu que mos quearun tan de patrás los nuestrus antepassaus. Devemus de conocé-lus i valoreá-lus por juntu porque assina entendemus cómu vivían aquellus ombris en estas tierras i cómu sabían servil-si respetuosamenti del mediu, aprovechandu lo que la tierra dava sin prejudical. Enantis de abril más navis en aquella parti, deverían de prospetal bien el suelu no sea cuentu que los interessis acabin por tapal pa siempri tesorus comu esti.
Dendi aquí agraecemus a Ana, la nuestra guía, la vesita al yacimientu i la su amabilidá. Los que querais vé-lu, cosa que recomiendu pa tol que quiera sabel más dela nuestra estoria en unu delos puntus más antiguus conservaus, ya sabeis que teneis de palral primeru cona oficina de turismu.