Cujo pan esgarras?

Es el nuestru Partenón, Vaticanu, Santiagu i Wall Street dela Antigüedá tó juntu. I está aquí, en Estremaúra. No ai que dislocal-si milis de quilometrus, ni atravessal oceanus ni maris. Ya los antiguus mo-lo pusun aquí con una cencia que agora es inorá, ena creyencia dunus diosis ya aburríus i palrandu una lengua dela que ná sabemus. El templu del Canchu Roanu, entre Çalamea i Quintana, quasi sin endicaoris que endilguin, recinchau por un regatu, delos muchus que por Estremaúra ain, que dizin Cagancha, en un enzinal por baxu dela sierra, debaxu dun chufardu modernu, sin postineu. Querían de hozal pa sacal ponel una alverca i sacarun, velallí, el menumentu más importanti dela Iberia prerromana. Namás los arquiólogus que trabajarun enas grandis pirámidis del Egitu puyerun superal en felicidá alos que tuvun la suerti d'escaval en essi buhíu la joya de tol ponienti uropeu. Cerru enantis dela escavación (retrataúra del centru d'entrepetación) Estau del assentamientu ogañu ...

Ayel domingu se terció de dil a Quintana a vesital unus parientis. Era la feria, que oi acaba, i estava el puebru a tentiboneti, peru aquellu no quitó de entre taverna i taverna i conciertu de dil a echal unas retrataúras por allí. Un primu de mi pairi mos hizu de ciceroni espricandu ca rincón de quandu él chicu. S'alamentava delo muchu que están retificás las casas, de bel caíu el tejal o el de çaleal muchas fachás. Con tó i con essu, la capital dela piera de granu no dececiona, porque las casas siguin conas esquinas, los assientus i las toças de piera i ai escúus, modernus i viejus a ca lau. Peru no vo a arreparal en essus apellíus familiaris i ena cantería d'essus símbolus eráldicus, porque ai detallinus que clissan el oju entre las toças, las casas de labraoris, las forjas i otrus rinconinus lindus del centru del puebru. Velaquí una muestra.

Largu de Badajós, hincau entre canchus, grandi pa estremeñus i portuguesis, está Abuquerqui, sonau pol castillu i la sus callis en prunu con puertas de cantería. Dendi arriba se vé el mundu, peru largu dela vista del vesitanti i los retratus de postal ai un Abuquerqui de esgrafiaus i piera con marcas, letras, caras, puntus i rayonis que se gravan en el oju peru no son vistus pol celebru. Velaquí una muesta d'essus detallinus.