El usiu la "d"

La quinta letra sigún el arfabetu estila arreprehental el fonema /d/ siempri en pusición esplotiva i ralaenti entrevocálica. Puei hormal el grupu dr peru nu *dl. En el chascu en que esté al escomencípiu la parabra i en diendu preceia puna aspiración, arreprehenta el fonema /θ/: mas desu [má: θésu]. Inque risurti efariciosu idil óndi es que se gasta d i óndi nu en estremeñu, quidiás vos puean ayual a nu dual tantu estas cencillas regras, ya que nu siempri se escambaha la d ni nu siempri se pon.

Se escrebi con d- lantera:
—Namás los prefihus di- (alumorfu de-) i dis- (alumorfu des-) etimulóhicus i las parabras, polo heneral, que encetin pol d- siguia e cualisquiá vocal acetu e. V. gr.: difici, deviil, deviil, divelsu, descurpa, daleal, diriqueal, dotol, dua, dientista, dios. Las parabras que vacilan entri des- i es- es preferibri escrebilas sina d, acetu naquellus chascus enos que enhamás se dua. V. gr: esgalazal, escalabraura, esnual, esmayau, peru nu descánsiu, ya que el verbu descansal fruhi d-.
—Los prenombris/ahetivus dambus i dengunu.
—Las crasis la prepusición de mas atelminanti, prenombri u alvérbiu. V. gr.: del, dunu, della, daquel, dangunus, dantis, duguañoti, dondi.
—La prepusición de preceia e consonanti, vocal larga, ditongu u vocal tónica. V. gr.: escapás DE, reventá DE trebahal, vie DE mercal. A la escontra, si le precei una vocal brevi i la prepusición nu contrai cola parabra siguienti, nu se escrebi la d. V. gr.: un pocu e vinu, cachu e higu, dia e bureu, peru nu vivi Dangunus mesteris, ondi la d á contraiu cola siguienti parabra.
—El prefihu des- proceenti e ex-, acetu deque esini al ex- latinu con el sintiu e «argu que á siu i á ehau de selu», cumu es chascu e esalcardi. V. gr.: desamin, desaherau, desimilsi.
—Los monusílabus, acetu la prepusición de enos chascus ya vius: dies, dos, dau, deu, dai, dios.
Hueraparti desisti un gran númiru parabras que namás con el usiu se sabi si fruhin d lantera u nu: dehalamiu, deleción, descrebil, desque, delabón, demuación, ec.

Se escrebi con -d- entrevocálica
—Las parabras conselvás proceentis la antígua z sonora: hadera, idil, adeiti, redal, redeta, codina, hadel.
—Alantri ditongu. V. gr.: aduana, condiós, hudaicu. Nu estanti, la d siguia e ditongu esmienzau pol i —di— pasa, polo heneral, a y. V. gr.: meyudia, estuyu, inrayal. Aceción son dios i los sus derivaus.
—Parabras compuestas pol prefihación ondi la orihinal fruhiá d- lantera: redoblón, adutrinal, supidotau.
—Parabras de usiu mas curtu u ténnicu cumu adiposi, ipidulia, redentol.