Primel Assamblea pal huturu el estremeñu
El Viernis mos ajuntémus pocus, pero pa prantal la simienti no eran mestel mas. Acuyerun escrevioris, representantis d’associacionis, professoris, filólogus, políticus i amantis la cultura estremeña.
El ordin el dia tocava quatru puntus, en cuyus dos primerus mos espaceémus bastanti. El primeru d’ellus diva a tentu las associacionis i el associacionismu. Propusimus la criacion duna cabecera que sirva de referéncia a tolas associacionis culturalis segunderas a las muestras entencionis. Por mé d’ellu se puei almenistral mejol el haci trebaju qu’avemus i favorecel la concéncia social. En drentu d’esta cabecera divan a enfuncional cordinás pressonas i associacionis que hata el momentu queavan desapartás, que se relanci el estremeñu i lo estremeñu enos meyus. Mesmu propusun la criacion duna revista a tentu lo estremeñu i una editorial pa librus ena muestra léngua.
Alogu, eno que toca al segundu puntu, a tentu la unificacion el estremeñu, comenté que es mestel avel una varieá de estremeñu a la que tola genti puea agarral-se, que se puea deprendel i escrevil de horma unitária, en baju duna mesma gramática, sin que ellu suponga la perda el palraeru local. De los assestentis, la huerça d’ellus vidun nesseçáriu avel un estremeñu estanda si se quiel que se conselvi la léngua. De raspahilón se mentó el tema quartu, atijau a estu que izimus, que es la criacion dun grupu o un organismu que cúdii del estremeñu, propusiendu una norma gramatical i ortográfica, pero por andal tardius no mos vagó pa concretal ná al respetivi.
Eno tocanti al puntu tres, al tentu del estremeñu ena educacion i del su deprendizagi en escuelas i estitutus apeninas se hizun angunas referéncias, pos lo prencipal hue la custion de associal-mos pa prencipial a trebajal cordinaus.
Esta primel queá pa tenteal la custion el estremeñu á siu bastanti possitiva, enque no se destrujun conclusionis terminantis. Hizimus propuesta duna nueva assamblea abierta pal 21 Jeneru del añu qu’entra ena que á si poemus tratal la costitucion la diretiva d’essa cabecera i tamien proyetal en un dia primavera un alcuentru cultural que mos sirva de enceti a la celebracion la estremeñiá por tola muestra muestra.
Comentarios
Lo ideal sería argu paicíu a lo que jidun los asturianus, una política d'"uniá ena diversiá". Los asturianus tiinin una norma gramatical y ortográfica de referencia basá nel asturianu central sin metafonía. Pero alogu dispués han criáu unas prepuestas pa ditalsi pa escrebil en cualisquiel varianti el asturianu, jata angunas que tiinin sonis que no dexistin nel asturianu normativu "de referencia". Pol ejempru han estabrecíu que la "che vaqueira", que no dexisti nel asturianu "de referencia", se ponga comu una "ll" con puntinus abaju o comu "l.l" si s'escribi enas variantis andi s'usa. La norma, pol un lau, consisti en normas gramaticalis pa la varianti de referencia, y alugu hain normas ortográficas que valin pa tolas variantis. Se trata de tresmitil el mensaji de que tolas variantis del asturianu son correctas en tola su dimensión (fonética, morfosintaxis, léxicu...), igual de correctas que la norma "de referencia", se puen escribil, s'anima a que se jaga y jata "la norma idi cómu hay que jadellu", pero essu no quita pa qu'amás haiga una norma gramatical "de referencia" aparti. Cualisquiel cosa qu'esté demostráu que sía tradicional pa angún puntu d'Asturias es "correcta" escrebiendu ena varianti d'essi puntu y jata tiini una manera "normativa" de sel escrebía y representá en grafemas, inque no se corresponda cono que dita la norma "de referencia" eno léxicu, fonéticu o morfosintácticu. Amás los asturianus lo ponin tos en práctica. En forus, chats, redis socialis y tal y más sonin muchus los asturianus qu'escrebin en asturianu occidental u oriental, o nel asturianu central sureñu de pa Ayer y tal, con metafonía y che vaqueira, pero no lo jadin comu les peta a ca unu, siempri se ditan sigún lo que proponi la academia pa escribil essas variantis, inque no se correspondan con el asturianu normativu "de referencia". Ponin siempri la che vaqueira comu "l.l" y la aspiración anicial del asturianu oriental comu "h.", no de cualisquiel manera que se les acuerdi. (acontina...)
Otra cosa de la que no sé si s'ha palráu es d'envestigaeru, qu'es tan emportanti comu la normatividación, la organidación u algotrus aspectus.
Al respectibri lo de si l'estremeñu ena educación y tal... Una revindicación mu simpri, qu'es la mesma qu'están piyendu los cántabrus, es que l'estremeñu sía decraráu BIC, igualicitu qu'a fala. Essu no es muchu ni nenguna panacea, pero es un passu más pa ejal craru qu'oficialmenti l'estremeñu no es castellanu mal habráu. Y pue abril puertas pa más cosas, encluyendu la educación.