Castru de Pescueça

El puebrinu de Pescueça se halla entre Cachorrilla i Portagi, por baju d'Alagón. A muchus les sonará por mó del Festivalino. Pero pa los de paquí cerca, pa las hesas i cotorrus d'esta parti del riu, cuentan leyendas de ombris-lobu i curiosas tradicionis comu la matança dun machu pa la boa. En un cotorrinu que dizin Viroti crein que se halla la tumba de Viriatu i no es d'estrañal que aigan costumbris assina tuviendu pobramientus celtíberus tan cerquina. L'otra tardi ajorrémus de Cória tres compañerus i un amigu a vesital el cotorru andi pareci que antañu uvu un castru.

Puenti i torri de molinu

Diendu por camininus con paeris de güena hechura, al norti de Pescueça, se llega a los molinus. Allí la caja del riu se halla entre suavis cuestus i cotorrus i charpicau en ves en quandu polos torreonis de los viejus molinus, ogañu farrungaus.

Regachu que desenboca en Alagón. A la derecha se puei vél los restus dun antíguu aliviaeru

Fragüinis i regachus que nacin de los maniantalis de por cima de los lombus se abarrancan entre las pieras que ena estacion de llúvias pingan rachandu-las i hindiendu-las con tentigués.
Los salientis de piçarra almiran polas hormas, hiziendu en angunus laus auténticas paeris.

Parti inferiol del castru

Bordeandu Alagón i achancandu regachuelus i chalabarquinus, se asciendi a lo altu del cotorru andi estava el castru. Entovia se aprécia, entre las pargañas i los repegonis, el contornu la ciudadela i troçus de granitu i cerámica enos suelus maquinaus.

Arriba quean paeris de piera i vé-le equí esti sahurdón, seguramenti de ganau. Angunus murus, de juru mu antíguus aparecin entre la fusca i en angún terraprén.

Parti mas alta del castru

Vistas de ponienti de Alagón dende el castru

Prayina a renti d'Alagón en el orihoscu

Dende el castru se escumbra el recorriu de Alagón, los campus de Casillas i de Cória i las destensas hesas al otru lau del riu. Es un rinconinu d'Estremaura mu repoliu, entre Casillas i Pescueça i de los que me alegru vel descubiertu enantis de aballal.