El conventu de san Marcus en Marchagás

 Jincau por baju del picu de santa Bárbara, ena sierra d'Altamira, entre Palomberu i el Casal de Palomberu, está el puebrinu de Marchagás arroeau d'olivus i plaus que se destiendin ata cuasi las mesmas cotorinas de las montañas.

Vista del conventu/chibiteril

Por cima del puebru, a cuasi dos quilometrus subiendu unas barreras mu prunas está entre la fusca i comeerus de cabras i d'umanus el conventu de san Marcus, mirandu al meyudía. Pa dir al conventu es mejor subir a peoncia pol caminu las Pegocheras que ajila dendi la praza las Majaíllas. El primer cachu está acementau i de en seguía el caminu es pizarrosu con joyus de las correntías i con recuéncanus cerraus por causa de las escobas ata la Joya María. Cuasi tol caminu passa por olivaris i peñas de pizarra. Dendi la Joya María parriba ya es puru monti entrebolau con alcornoquis i argún que otru pinu ata aportar al conventu.

Pareonis

Las vistas de la sierra i del valli de Palomberu son estrordinarias si precisar subir a las entenas del picu de Santa Bárbara que cai mas arriba subiendu por una pista.

Cúpula

De que se llega al conventu entra unus aginaerus por ver el estau en que s'encuentra: alpacas, yervas, palés, vena loca i cardus que llegan al sobacu i tolas parelis aprovechás pa angarillas pa animalis i comeerus.

Ventana i mechinalis

Del conventu apenas está a la vista un cuartu con cúpula caía, unus pareonis a la isquierda que parecin que tuvun bovia, sigún se vei polos arranquis de por cima, i un otru pareón a la derecha an pie duna barranca entre comeerus de cabras. Las parés son de pizarra, con ladrillu colorau en arcus. Quean restus del ludíu brancu con dibujus arrayaus (esgrafiaus), peru pocus a la vista por que la fusca lo inculta tou. El conventu enteru estava encalau i se vía dendi largu.

Detalli de ajedrezau

Quitandu las enteracionis del amigu Félix Barroso i de lo que ponía el letreru del merenderu que está por cima, no ei conseguíu demasiaus datus a tentu del conventu esti velequí. Es unu de los cuatru que guardavan las sierras de las jesas de las Urdis i las Batuecas, junta'l conventu del niñu de Belén ena Rebollosa, el de las Batuecas i el de los Ángelis en el Pinu. Lo entangarun a metá del siclu XV i de contau acibió el nombri de conventu. Se sabi que era de monjis franciscanus, de ma que la jechura del conventu tuvu que ser mu simpri, sin demasiaus adornus ni lujus que enturviin el redu i la dedicación. Los monjis que vivierun aquí eran sacerdotis, coristas, legus i donaus i en ves en cuandu subían a passar temporás religiosus de Coria i mesmu san Peiru d'Alcántara.

Pareón lateral

S'abastavan duna uerta que regavan con el agua que abaja de la sierra i de la que entovía ai muestra enas dos juentis con depósitu de cantería que están en el merenderu de por cima. El sitiu tamién lo repusun de árvolis, por essu los alreoris del conventu están cerraus de bosqui si se compara cola parti mas cimera i mas bajera ena que na mas se vei monti.

Fenefa d'ajuera

El conventu s'echó a perder comu tantus otrus edificius religiosus dispués de la desamortización. La finca cambió d'amus i las pieras del conventu sirvierun pa jader otras costrucionis en el puebru i enas fincas de la sierra, de ma que las ruínas juerun venciéndosi ata velas comu están oi.

Otra estancia

El conventu tien un cuentu tamién que es precisu asseñalalu por ser parti de la memoria popular del norti estremeñu: la virgin d'Argemi l'acostodiarun velaquí cuandu la Guerra la Endependencia no juera ser que la jamparan los francesis. El fraili José de Coria i Ponce, por tener la virgin mas segura, la llevó a un covachu ena sierra que l'endirgarun unus lobus. Estus lobus guardavan el imagi de la virgin cuandu en el covachu no avía naidi. Ogañu se sigui sin saber que covachu era aquel i pandi caíva, pos na mas lo sabían los lobus i el monji que subió el imagi. Otras versionis que cuentan en otrus puebrus idin que no juerun los francesis, sino los morus i, que, velaquilo, el cuentu es de muchu mas patrás. Sin embargu, ena versión de la Rebollosa, cuentan que la virgin d'Argemi estuvu acostodiá allí por un toru pegosu, en una abrigá cerca del conventu de Belén.

Almiracionis dendi el conventu