El pozu del Cinojal

El puebru de la Jigal, pa las tierras de la antigua Graná, es unu de los sitius ondi mejor s'a conservau la mitología popular en toa Estremadura. Gracias al envestigaor José María Domínguez, de muchus añus de trabaju recadandu la literatura oral del norti estremeñu, poemus saber del cuentu del pozu del Cinojal, con algunus paralelismu cola leyenda del aberintu del minotauru Asterión, ena isla de Creta.

Vista del pozu del Cinojal

El pozu del Cinojal está no largu del puebru, abajandu velaí pa los recuéncanus del Palomberu, por una calleja de olivus i plaus. El sitiu es un locus amoenus, un verejel an pie dun regatinu i por baju dun cerru con monti que s'ascapau del escuaji. 

 

Caminu'l pozu del Cinojal

La jechura es aparenti a la d'otras juentis de la parti esta, con bovia de meyu puntu tapandu el pozu, peru de ves de tener brocal, es comparanti conos pozus de galería que ai ena parti de Badajós, jechu con cantería i pizarra.

Bovia del pozu del Cinojal

Arregru a la versión que trasmiti ena su obra Leyendas de Ahigal, el pozu tien un encantu. Una moza que jue a por agua, zamargulló el cántaru de que bajó los dos pergañus c'ai i dispués que cargó, al sacalu, vidu que arrecolgava un jilinu dorau. La moza s'enreó a tirar del jilu ata componer un ovillu, peru por mieu de que la viera una mujer que barruntó abajandu pol caminu, tuvu que cortar el jilu en antis d'avriguar ondi estava el cabu. 

Pergañus

De chopetón, las aguas del pozu se revolvierun, salió el encantu i la moza acagazá s'alargó del pozu. Comu el encantu no poía achancar el regatu que está en antinu d'abajar el pozu, no púu llevársila pal jondón. El cutau, s'alamentava, dijendu que de ver seguíu tirandu del jilu lo juera desencantau i se juera casau con ella i la juera acolmau de riquedas, peru el mieu i l'avaricia de la moza jidun que no se cumpriera el desencantu. El mozu encantau sigui esperandu en el jondón del pozu a que una moza a la mañana de san Juan vaiga a por agua i lo desencanti.

Cacus modernus en el pozu

 

Es un mitu d'agua atillau al sosticiu de veranu, peru a la contra de las encantás del Montiju, aquí el encantau es un mozu príncipi. El agua sirvi pa sustener en dambus dos casus el encantamientu i tamién pa alibralu. Peru el jilu dorau recuerda al que Ariana dio a Teseu pa salir del aberintu del minotauru, por me del que puei conceder un salieru pal que drentu de la escuriá está. Entovía se puein ver cacus de vasijas en una de las esquinas del pozu testigus del passu del tiempu pal mozu que sigui zamargullíu sin naidi desencantalu.