domingo, septiembre 06, 2015

A vila de Ouguela

Ontém estive a visitar a antiga vila de Ouguela, perto de Campo Maior e da nossa Estremadura, sempre a vigiar o castelo de Luna. Não sabia se era preciso fazer um outro blogue para as questões alentejanas, mas como sempre pensei que a história que temos é comum, o recomendável era pôr a reportagem no Cúyu.
Casa tradicional de Ouguela

No s'aginin, amigus, que ya escrivu en cristianu paque m'entendais, enque no se descadeçan de que el portugués es otra delas lenguas dela nuestra tierra i que devemus conocé-la i valoreá-la lo mesmu que'l estremeñu. 

Una delas callis adoquinás del puebru
 Dendi que trabajé un añu en San Vicenti i escuché mental ena Cosera d'esti puebrinu no me se quitó el píu de tenel vesitá-lu. Más entovía dispués d'enteral-mi de que tenía castillu.
Saliendu del puebru
 No está largu de Campo Maior, dispués de atravessal una parti de chaleris imponentis, queandu una huenti con pilón ala derecha, al revolvel un cerru, que pala derecha manda pal santuariu de Enxara mos metemus en Ouguela quasi sin dal-mus cuenta.
Paneras del lavaeru púbricu
 Dizin que puea tratal-si dela antigua Budua. La verdá es que tien un sitiu mu buenu renti el regatu del Abrilongu i la rivera de Xévora i ena propia morra avía un castru. Con tó i con essu, no se aprecian restus prerromanus. Tapocu romanus, desquitandu angunus sillaris de cantería paquí i pallá. Seguramenti tolos materialis se volvieran a usal pa alevantal el castillu i las casas del puebru. De tolas formas, no tenemus muchas enteracionis del passau d'esti puebru i lo asseñalan enos letrerus turísticus: "Não há dados arqueológicos, nem documentais, que confirem estas suposições".
Fonte de Graça
 El puebru está repartíu en tres barrius: unu por drentu del castillu i los otrus dos por huera. El más abitau está compuestu por tres callinas en prunu i una praçuela ena barrera norti del castillu. Alogu otru nuevu s'abri pa ponienti diendu pala atalaya que mos queemus sin vel porque mos cogía la nochi.
Detalli delos baldosinis
 Ena parti baxera se halla a fonte de Graça: una linda huenti de cantería recubierta de bóveda i con pilón. Ena parti d'arriba  reza en azulejus secularis el lema "Se quereis saúde, vinde a mim / Fonte de Graça". La verdá es que no es bebibli, peru á de tenel la sus propiedáis quandu la engarrafavan pa llevá-la ata pa Lisboa i Mairil, sigún reza el letreru que está junta ella.
Pilón dela huenti junta una alverca i un uertu
 Entre tupíus jardinis, barreras que son arreatis de froris i prantas decorativas mu bien cudiaus i respetaus se subi al castillu. Cona salía i entrá pa salienti, en varias liñas de muralla, ai un fosu arroeandu tola costrución.
Puerta del castillu
 El entraeru se has por un puenti de mampostería i ladrillu que da a una delas puertas de castillus más lindas que ei vistu. No sé si serían el escúus, l'arquitetura dela puerta, los esgrafiaus o la postura de sol, peru la verdá es que era un logru d'arquitetura.
Puenti sobre'l fosu
Escúu dela puerta
Galería de saeteras
Altura dela puerta prencipal

Entovía lleva pa otra puerta más padrentu de buena altura i con otru escúu en estucu con lema en latín i que conserva bastanti la pintura: "Pro Rege, pro Patria et pro Fide aut vincere aut mori" Palos que no hizun latín ena escuela i siguin inorantis d'esta lengua: "pol rei, pola patri i pola fé o vencel o moril".  Velaí el lema ibéricu duranti tantus milenius en un escúu d'estucu.
Escúu d'estucu con lema en latín
Sillaris dela puerta
 Ena mesma puerta se vei unus sillaris de cantería mu bien lavoreaus i que poían sel romanus, ya que el restu de muralla i otras partis que no sean assientus es de mampostería inregulal.

 Mos reparamus en el detalli duna delas esquinas dela puerta que paeci un gravau ena piera que no atinamus a sabel que puea sel.
 Ena parti de drentu hallamus un otru mediu puebru. Una praça bien grandi conas bocas dela alverca soterraña en el mediu i varius viejus i nuevus sentaus al frescu. Preguntamus pol subil pala torri en alentejanu "posso subiri" i mos endilgan que sin poblema. Assín que a pateal tol adarvi, la torri del omenagi i las destintas torris del castillu osservandu el hondón dela dehesa alentejanu-estremeña.
Una delas pocas callis del interiol del castillu

Vista dela praça dendi una delas callitas

Llanu con casas encustrás ena muralla

Passeu del adarvi

Torri del omenagi

Garita con el puebru embaxu

Horma dela muralla esterna

Chimeneas del barriu de drentu del castillu

Espadaña dela ilesa

Vista norti dendi el castillu

Abuquerqui mira respelosu de frenti, entovía comu quiriendu guardal una lindi que nunca estuvu más que palas capitalis delos reinus. Viendu la cantiá de castillus que tenemus pola Raya, los que están i los que estuvun entendemus enas sus pieras la sufrencia i el dañu que mos hizun los interessis ajenus delos señoritus i los reis, queandu una delas partis más ricas del ponienti Uropeu quasi que sin genti, aburriendu-si las vegas de Guadiana i Xévora que, entovía oi esprimentan la huía delos más nuevus.

No hay comentarios: