domingo, enero 29, 2017

El Taraballu 2017

Comu ca san Sebastián, el Taraballu sal con el su ventril delantri del santu pa çurral alos vezinus i correl tras delos zagalis que le hazin bulras. Esti añu la fiesta tuvu un jeitu especial, dau que la missa acabó tardi i la prosseción hue mu cortina. El motivu, en palabras del propiu Taraballu, hue que la missa la pusun mu tardi i que alogu divan a hazé-li un omenagi por bel síu duranti tantus añus quien se visti de brancu i roxu pa salil esti día tan asseñalau palos vallenatus.

La calli'l Mediu
Cara dun balcón
Enque esta fiesta es muchu menus conocía que'l Harrampras o las Carantoñas, el Taraballu costitúi unu delos ritus paganus más antiguus conservaus en Estremaúra, enque cona infrujencia dela ilesia al cabu delos sigrus. 

La fiesta perdió gran parti delos sus elementus más tradicionalis comu la música del tamboril, la careta o que la genti le tiri nabus, verças, naranjas, tronconis, mondajas o matas puirías delos uertus, peru conserva la cantiquiña al santu entre las salvas o el naranju que se prosseciona junta'l santu.


Manque la fiesta precisa duna revisión del ritu eno tocanti ala parti pagana a trocu de remoceal la fiesta i impedil que se pierda ala sombra del Harrampras o enos afanis d'otras fiestas más popularis comu los Quintus o san Jorgi, envinculá por causa del desganu, entovía sigui viva i esti añu quijierun de reconocel la figura del Taraballu que José lleva hiziendu tiempu á i que los canalis del cibernoespaciu siguin a sostribal con el su esparramamientu.
Salía del santu i del Taraballu

 El Taraballu representa lo malu, que sigún las leturas, puei sel aquel personagi que se lleva el iviernu quandu passa polas callis del puebru o un lobu hechu diabru al que se maltrata. Dambas a dos versionis se sobreponin, dau que los elementus que tuvu o tien la fiesta ogañu hazin pensal essu velaí.
Los caçaoris a lleval el santu
 Que apareçan elementus pastorilis o en tiempu aparecieran i se perdieran con el correl delos añus mos enseña que'l Taraballu era el ombri que representava lo malu pal ganau, es dizil, el lobu. Por essu los antiguus se recuerdan de que'l Taraballu, comu las Carantoñas, diva arrebujau de pielis i lo acompañava un tamborileru que aporreava un tambol de piel de perru. Essi perru lo mandavan sacrifical espressamenti pa esta fiesta. Estus elementus, enque tracamundeaus, los seguimus viendu enas fiestas delos Quintus, con el tambol de piel nuevu ca añu i la figura del machu enas rondas delos quintus. 
El Taraballu a çurral
 Agora el Taraballu se visti de brancu, con un tragi de bulra, ondi el processu de endiabramientu se pierdi pa sel bulrau, perdiendu assina, amás del tambol i el tamborileru, tolos elementus que lo relacionan con el mundu insensata del pastoreu. Quean comu reliquia los caçaoris que portan el santu i que a travucazus contribúin a espantal la figura del Taraballu-lobu, enque la letura moderna no comprenda essi papel.
El paganeu entre los monazillus
 Tirá-li naranjas, mondajas, nuezis, verças i otras cosas que ain polos uertus o las casas en estas fechas tamién se perdió pol disloqui dela genti i la falta de respetu pola fiesta. Agora namás lo zagalis le hazin la vaquilla, le pegan, essu sí, despacitu, ena espalda, ondi pon BESA o ondi el muñecu, convirtiendu una fiesta que era pa tol puebru en una atividá palos críus: los mayoris ván pol santu, los nuevus pol Taraballu i los pairis por vel desfrutal los zagalis. Pocu ai del ritu que s'entienda.
Prosseción pola calli'l Mediu

El Taraballu delantri del santu siempri
 Se conserva, no estanti, el ventril con el que çurra ala genti, muchachus i sin sel muchachus, con el que el Taraballu atiza enas espaldas delos que participan ena fiesta. Comu passava enas Lupercalis o passa enas Carantoñas, esti ventril es velaquí ojetu de fecundidá i suerti pal añu que entra. Comu la parti de tirá-li verduras i frutus se perdió, ritu tamién de fecundidá con el suelu, namás se conserva el sessual en el golpi del ventril.
La prosseción pola carretera

Los caçaoris apreparandu las escopetas
El Taraballu a correl tras dela genti


Acibiendu las bulras delos zagalis

Entrá ena ilesia

Últimas salvas

Reconocimientu a José comu Taraballu duranti tantus añus
El Taraballu es una delas fiestas estremeñas con más simbología, entovía no bien entendía, dau que lo paganu, lo pastoril i lo cristianu se mesturan i muchus delos sus elementus se perdierun. Precisamenti hondearun con tolas acionis que tenían violencia o larzina: el sacrificiu de cabras palas pielis del Taraballu, el sacrifiu dun perru pal tambol i el tiraeru de frutus o verduras. Estas partis ritualis conllevavan la muerti d'animalis o que'l Taraballu o el tamborileru acabaran lobateaus dispués dela fiesta. Estas muacionis dela fiesta vinun a bien ya que el ombri de agora ca ves vá siendu más coscienti de que se puei seguil la tradición suprimiendu la sufrencia de animalis o pessonas que los ritus antiguus tenían.

Más enteracionis:
Domínguez Moreno, J. M., "La fiesta del lobo en Extremadura".
Carmona García, I., "El ventril del Taraballu".
Fernandz Chamón, Á. L, "El Jarramplas de Piornal y el Taraballo de Navaconcejo". 

Vesita tamién: El Taraballu.
 

No hay comentarios: