viernes, marzo 27, 2009

Antroponímia en estremeñu

Anque paiça mentira, no muchu hás, la genti no se llamaba Johny ni Maite ni Charlie ni Vanessa ni Jessica sino Lutéria, Juan, Calru u Jesula. Teniamus nombris gelmánicus, semíticus, griegus i romanus, pero paici que agora llamalsi Todoru u Colasa es pocu menus que llamalsi Pringuizorra!

Los nombris pressona en estremeñu mas tradicionalis son griegus u romanus u gelmánicus u bíblicus i a naidi l’achopaçaba el hechu de mental a alguin pol Felicita u Isiru. Estus nombris tan pulius enas luengas d’origin comu Lutéria “libertá” u Meregildu “guerreru” se están perdiendu.

La huerça los nombris própius en estremeñu se caraiterizan pol un prohundu cámbiu fonéticu dende el original. La prencipal caraiterística es la perda la primel sílaba la parabra (aféresi), comu aconteci de continu n’asturianu.
—De A-: Délia, Gapitu, Nastásiu, Polóniu, Tanásiu.
—De E-: Cequiel ~ Ciquiel, Duvigi, Lías, Lutéria, Lutériu, Emerenciana, Míliu, Mília, Milianu, Miliana, Mitériu, Pifániu.
—De I-: Gíniu, Náciu, Nocénciu, Pólitu, Sabel, Sauru.
—De O-: Nóriu.
—De consonanti + vocal: Bastián, Canol, Colás, Tividá.
—De vocal + consonanti: Pídiu, Tanislau, Carnación, Maculá, Meregildu, Meregilda, Mógini, Colástica.

Los nombris própius esprimentan las mesma apofonias que los comunis, es izil, afechan las vocalis meyas tras el acentu: Mógini, Gíniu, Ugéniu. Assín tamién ain apofonias i dessimilacionis enas pretónicas: Bertolomén, Reimundu, Grigóriu, Ciquiel, Juaquín, Lionardu, Liodoru, Tebúrciu, Ceprianu.

Dessistin monotongacionis de destintu tipu, las prencipalis: eu > u: Ugéniu, Ustáquiu, Ulógiu, Usébiu, Utímiu, Lutéria; au > u: Uréliu; au > o: Clódiu, Lorianu.

Ai rehuerçu con -r- tras t enos nombris Calistru i Salustrianu.

Ai aspiración en nombris comu Helipi i Hernandu.

Los nombris parossítonus i proparossítonus acabijaus en líquia, nasal u aspiración pierdin la consonanti comu aconteci enos nombris comunis: Cesa, Bertu, Esteba, Etu, Angi, Mógini, Feli.
Enos nombris Isiru i Peiru ain vocalización de la d nel grupu dr.

Otrus fenóminus fonéticus menus freqüentis: perda fricativa entrivocálica —Austín—, rotacismu —Arcensión, Bras, Meregildu—, dessimilación wau —Agustu—, dessimilacion yod —Remiju—, assimilación —Feferinu—, apoyu consonánticu en nombris ossítonus —Jesul, Bertolomén—, redución grupus curtus —Vitória, Vitu, Etu—.

De mó que si tenís una criatura, ejaivus de poneli Jessy, Johny, Maite, Soraya u Charlie i acuí a los pulius nombris que mos erearun las luengas crássicas.

No hay comentarios: