Cujo pan esgarras?

En estremeñu, lengua rica en palabras, alas vezis passa que quien l'aprendi s'abarulla en gastandu-las. Más, si quien lo hazi vei la palabra escrita de muchas maneras o duna manera que provoca más perdas que ganus ena conocencia la ralidá lingüística. Vos vo a ponel un exempru que, por causa delos trebajus continus de léssicu pal entagamientu el dicionariu, vien al pelu palo que m'acabu de referil. Es el casu de tres prantas fabacias que derivan toas tres del mesmu étimu latinu erv|, estoi palrandu delas arvillas, las arvejacas i las arvellanas.  En latín, el ervum era lo que pa nusotrus es el arvejacón o l' arvejaca i las erviliae son lo que conocemus comu arvillas . La mata l'arvilla ( Pisum sativum ) es duna pranta fabacia que de siempri s'á criau enas senaras i uertus estremeñus, mu apreciá ena cozina. Pol jeitu, se vei que tien una baga menus larga que la de las havas, más fina i en drentu se vein las arvillas verdis. En portugués llaman ervilh...

Quandu se llevan varius añus a estudial una lengua fundamenti oral, se vein entre las palabras, la su hechura i el gastu que llevan, no gramática namás, sino cómu es el caraiti delos falantis. En el estremeñu, lengua con una tupa de prodecimientus de criación léssica por derivación i una riqueza léssica que los que arreparais en ella o que leeis esti blogui de continu eis poíu vél, sin embargu naa en insultus. Tenemus un cientu de maneras de mental la calamorrería con ajetivus, sustantivus, espresionis i frasis, peru poquinas pa asseñalal la inteligencia: estu aconteci en tolas idiomas, por sel el ombri más dau a atestal que a brindal cumpríus. Essu no precupa, peru lo que sí es aginanti i deviera de dal-mus el espanturrión es la tupa de palabras que asseñalan ala servidumbri. Paque vos echeis una idea, hadremus un bandeu somerinu por essa parti dela nuestra idioma que, sin desapartal-mus delas vozis popularis —no mentaremus cultismus tardíus— dan cuenta del sentimientu d’apressi...

Acabu de subil otra retahilina de palabras de pala mi parti. Tiempu á que no subía ná porque esti viagi el trebaju de recadación á estau más despaciosu. Las entrás están ena linia: preferencias por ciertus sufixus (- úo , -miento, -oso, -eo, -ero ), sentíus desconocíus ata el momentu ( descrito, descriví-se, gravá-se, ravioso, barba ) i otras nuevas que no tenía decumentás comu harocha , descruí-se , barbeteà , queximbre o tamborero .  Enos rasgus fonéticus son sobressalientis la ditongación analógica en demuestrà , la epéntesi de yod en diurnio , el rotacismo en comprexo i acomprexá-se i la sonorización en de mp > mb en combarsa . Curiosa es la horma telegrafo , con acentu llanu, que tapocu tenía decumentá. Comu derivacionis dela lengua están las palabras hembrista al lau de machista  (de hembra , antigual de gastal-si la culta feminista ), i la vos requitiquismo que vien del ajetivu requítico . Tamién ei registrau angunas locucionis i frasis comu en vis...

Acabu de subil una nueva retahila con léssicu estremeñu de Las Vegas Baxas . La retolá de parabras i el gastu que se hazi d'ellas costitúi una parti essencial de tolas lenguas. En el casu l'estremeñu, la situación es compricá, porque ca ves son más las vozis del castellanu que suponin las estremeñas. Formi passan los días, está más difici poel oyel naturalmenti  parabras comu andorina , antigual del común golondrina , compresibli  de ves de compasivo o reponel  por ves de reformar . Estas parabras son las que gastan los mayoris i que los nuevus, por no sabel las generacionis d'entremediu, se quean tamién sin sabé-las i lo que es piol: se quean sina golienda de preguntal qué senifican. Tenemus de dil ahinchonandu essa golienda entre la joventú colos métodus que tengamus a manu i s e passi el testigu dela parabra . Tal ves, alo primeru no divan a gastá-llas, peru ya las conocin. El gastu duna parabra se idrá assentandu quantis que la concencia de comunidá lingüística s'...

L’Astronomía populal estremeña es unu de los campus la nuestra coltura que más se desconoci en ogañu. Enque los estremeñus de siempri án mirau al cielu, l’án teníu muchu respetu. No án puestu en él erois ni grandis estorias mitológicas i malaspenas religiosas. Ena maginación los estremeñus, en el cielu nocturnu salin las estrellas —porque essi es el verbu que gastamus, salil — de destintas maneras formi'l tiempu. Se hazin varias destincionis delos cuerpus celestis nocturnus: estrellas, luzerus, Caminu Santiagu, estrellas descabrijás, Luna . Cielu nocturnu (Almiración dendi Badajó) Estrellas Son los cuerpus que relumbran de manera fixa sigún la época l’añu. No está la vos costelación de manera populal, sino el concetu de salil . Sigún el tiempu, las estrellas salin en una horma o en otra, comu si pal mirandiqui dela nochi hueran aparicionis de destintas figuras. Ei arrecogíu en parabras delos nuestrus viejus varius nombris delo que ogañu entendemus comu costelacionis i qu...

Muchas vezis en el coteju de palabras ena hechura del dicionáriu atopu ena Redi cosas curiosas que están arrescondias entre los hacis de testus en estremeñu. Vos pongu en baju un testinu trascritu de Félix Barroso Gutiérrez que se halla en el artículu "Apunte sobre Las Hurdes" , de la Revista de Folklore . Barroso es unu de los que mas á envestigau la cultura tradicional hurdana, hiziendu una tupa d'artículus a tentu de las costumbris de los hurdanus dende un puntu de vista antropológicu. El testu que vos pongu son las palabras duna saluaora hurdana paque arrepareis enos tenicismus qu'ain en melecina populal. Vos espricu en baju las palabras mas enliosas que ei avriguau de momentu. Algotras no ei siu escapás de avrigual qué senifica o qué malotia se refierin. Amás ain palabras, costrucionis i hormas verbalis que ata esti testu no estavan decumentás: tan aina, ... tan aina..., atrasoti, de juru i de juru, palombu, dambus a dos, dolin, trajiorin, llegorin ... Leei-lu po...

Vos ei puestu otru carruchau palabras de las Vegas Bajas. Dende l'última ves que vos biché ei cogiu un güen dau númiru d'ellas, angunas escuchás pola calli, a mi agüela, a mis pairis o mesmu revisandu grabacionis en cinta que tenia i que no tenia mirás. La raleza d'angunas palabras, que no án siu decumentás hata agora, mos hazi pensal que entovia quea muchu que envestigal, muchas entrevistas que hazel, pero que ni en tuviendu un envestigaol por hablanti huéramus acabau en 100 añus. Una d'estas palabras es acutá , por mé de la qual vos pusi un endilgui quandu la oyí, porque me pareció de las mas curiosas. D'aquellas cintas arrecuperé tamien las palabras adabilla i mediao . De ayel mesmu es el sustantivu majuelu : un majuelu es aquella pressona que á pulau ena vida pero que lo á hechu por ve-li ayuau alguien enportanti. Mi agüela me contava casus en La Puebla andi genti que estavan quasi que en el espíciu bufarun por servil a angún señoritu o por assestí-li enos tr...

Quandu unu se margulli enos orígin las parabras estremeñas halla de tó. Quiciá unu de los muchus campus que quean por estudial en estremeñu es el de la etimologia. Sedria curiosu sabbel qué porcentagi de términus son d'origin latinu i por qué vias mos án allegau (leonés, gallegu-portugués, francés, castellanu), quál son árabis, quál íberus/vascus (que los ain tamien, acordai-vos de pitarra , nava o pitiñosu ) i quál son germánicus. Ain huélligas de las raízis germánicas en un buen dau númiru de parabras i que namás poemus esprical por mé del germánicu, ya que no ain parecius en otras lénguas que anduvun paquí. La parabra raceal , que en estremeñu senifica aparecel o passal por un sítiu, tien un curiosu pareciu cona el ingrés race o el alemán rasen (germ. *ræs| ). Los términus trincal, trinqui o triquerazu (comunis con el castellanu) vien tós de la raís germánica *drenk| que senifica "bebel" (cf. ingr. drink , al. trinken ). Otra parabra, del campu léssicu ganae...

Vos ei puestu otra retahilina parabras del estremeñu de las Vegas Bajas . Ain verbus comu atorgá que son comunis en tol domíniu astul-leonés. El verbu guiá es la parabra que tradicionalmenti se gasta en igual de conduzil . Curiosa es la prenunciacion onque que arrecogí l'otra tardi en La Puebra i la n ena parabra desaunciao (en el normativu desahuziau ) cuyu mesmu sentiu se vei tamien enas Vegas Altas. Essa n la atopamus, en que con destinta naturaleza, en otras parabras arrecogias delantri de entredental ( encancinao, alcancil ). Eno tocanti a açucécio i açucécia ai que dizil que es un arvu que ya apeninas se vei en el campu, enque ai genti que lo tienin enos corralis o enos güertus. En castellanu izin azufaifo i azufaifa i portugués açofeifeira i açofeifa . Es parabra d'origin árabi: az-zufáyzafa . La ressolucion en estremeñu hue la assimilacion a entredental, quiciá pol enfruju de otra parabra con enpieci apareciu: açucena . Açucéciu cargau d'açucécias. Tienin ...

La redi de universiais popularis ( AUPEX ) acabba de sacal en hormatu degital un libru con el trabbaju de recopilacion que llevan hechu por mé del proyetu " Ecopunto lingüístico ". Se trata de la edicion del material que sacan ena su página: un pdf de 220 páginas con léssicu, testus entrevolaus i locucionis. La ortografia i la redacion las definicionis no son de lo mas aparenti, dende logu, amás, contribuin a esparigil que el estremeñu es una varieá de castellanu, mesturan castúo con estremeñu i dizin d'estal lo espuestu en desusu. Siquiera es un material mas con el que cuental. Pareci que en el andal de las universiais popularis ai ciertu enterés pola léngua i es curiosu el métodu que án llevau pa recadal tola enformacion por mé de úrnias. Dende aquí la noragüena al pograma pola dinamiçacion la genti mayol en tolo que sea tocanti al patrimoñu oral. Vos poeis descargal el libru en pdf endespues de arrellenal un formuláriu dende esta página , andi pon "publicaciones...

Vos acabbu de subil otru haci de parabras de pal mi sítiu que ei arrecogiu esta Semana Santa i otras que ei añiiu que no tenia apuntás denantis. Ain angunas mu curiosas comu muela, hopeo, friolento, pallaso o carambola . Tamien palrandu con mi agüela me mentó cosas de la cultura de patrás, comu los antíguus cultivus que avian pal puebru (muelas, havas, arvillas, algodón, henu i tabacu) i que en Semana Santa tenian por costumbri quemal un muñecu paja que simboliçava a Juda enas esquinas i rinconas. Aquellus que pensavan que lo de llamal a la genti con el apelativu cariciosu de prenda era namás del norti de Caçris marran: tamien se mienta pa las Vegas Bajas. I junta prenda , tamien el de madre i padre con un sentiu apaiciu. Curiosu es que la parabra pallaso venga del paleam i no del italianu, comu demuestra el sentiu que mosotrus le damus al espantaju las güertas, i tamien que el verbu dal lo gastemus con el sentiu de "pensal, creel", comu ena frasi : Quién diva a dal q...

El Diccionario Extremeño acabba de superal las 10.000 entrás (10.005, pa sel essatus arrepartias en 425 páginas). Es un trabbaju largu i cansau, pero a pocu a pocu va tomandu la hechura suficienti comu paque drentu de ná lo saqui. Esti no va a sel un parabreru mas comu a los que estamus acostumbraus: es un dicionáriu, con enteracionis, además de semánticas, de prenunciacion, morfológicas, sintáticas, locucionis, etimologia i prencipalis variantis. Quantis que tengamus consensu ortográficu en el OSCEC adataré l'ortografia las parabras i espubricaré la primel edicion del dicionáriu, que, esperemus que puea sel en hormatu degital i enprentau. Dende aquí doi las grácias a tolos que d'anguna manera án ayuau en él, mas que ná a los enformantis i a los colavoraoris en tous estus añus que de manera desenteressá m'án estau dijendu senificaus, usus i parabras nuevas.

Ei puestu un listau de parabras las Vegas Bajas arrecogiás dende el mes passau. Angunas son mas sonás, otras menus. Asseñalu el verbu entanguilá comu, quiciá, el vocablu mas ressaltanti, conpuestu de la raís tang| presenti en tangu i los sus derivaus: tangallu, tangañu, tángalu, tangalillu, entangal o destanganiu . Endrentu los aljetivus, parabras bonitas son calloncu i maniosu , que procein de callu i mania al respetivi. Tamien, por mé del amigu Juanín , mos enterémus de que enguachinao senifica, dichu dun líquiu, que está pringosu. Curiosus son los sentius i usus de borso, acordá, emigrá i buscá . Tamien está presenti la locucion jacé bamba que se l'arrecogí a mi pairi. Fonéticamenti, ai que arreparal en el ditongu de vestimienta , el landacismu en plao i plaera i en el retraimientu la r ena parabra catrasto , apareciu a cabrestu i la epéntesi en jarcinto i Ingalaterra . Eno tocanti a las hormas las parabras, tenemus los sufijus -il- , -ez- (esti reduziu en brillés...

Acaba de passal-me el amigu Juan un atiju con una web mu bien trebajá i séria. Se trata de la página La voz de Feria que lleva Juan José Becerra. Tien mu güen trebaju lessicográficu i de devulgacion hechu i al qual le do la noragüena. Vesitai quantis que poais esta página porque no tien desperdíciu dengunu.

Acabu de ponel un haci de mas parabras en el Vegas Bajas. É precurau ponel la prenunciación de ca parabra, enque angunas án saliu mal, pero vos podís jechal una idea. Veilas aquina .

Esta mañana añií un nuevu haci parabras pobranchinas, la huerça dellas conocias en el norti Caçris. Otras mas ralas comu regollá, afitijo, blincá, carajota, encolgá, gracio, perindongo u zambuco salierun ena entrivista de horma espontana. Asperu que los enteressaus puean deprendel toas estas parabras paque no se pierdan enjamás. Achuchai aquí pa poel velas.

Un nuevu haci de parabras pa quien entavia les cuesta creyel que el estremeñu es una luenga i pa los que, en huendu coscientis de lo que avemus, entavia inoramus la riqueza espressiva la muestra luenga. Achuchai aquí pa poel leyelas.

Acabu de subil un haci de parabras al Vegas Bajas. Lo ciertu es que tenia ganas de dil espubricandu tolas hallauras que é hechu en veranu i que, pol suerti, acontinu hiziendu. A los que se mos avançan las oras el dia envestigandu i escreviendu a tentu el estremeñu mos aconteci que contri mas landeamus, mas alcontramus i, en que tapocu landeis, con tenel las orejas pendientis densiguia te salta anguna frasi u anguna parabras que pocu u ná tien que vel cono que muchus llaman castellanu mal hablau . Dessisti una inoráncia total sobri los mecanismus de composición las parabras en estremeñu, cómu se costruin las frasis, la correta prenunciación, la morfologia las parabras i pol qué no senifica lo mesmu socochal que sococheal, tolas oras que las oras toas u pol qué se dis el chascu que m'á estau u dándi vien la parabra chinanclu u la enfrujéncia las labialis pa cierral la o en mochu , molinu u bosseu. Muchus sonin los puntus que tenemus que encraral i mu poquina la genti, assinqu...

Una las custionis ortográficas mas curiosas el estremeñu es cómu escrebil el haci parabras qu’avemus namás con una a , cuya prenunciación u posición sintática mos din que senifica una cosa u otra paí. Sieti son las parabras que en estremeñu namás llevan una a arrepartiéndusi entri sustantivus, partículas i entrijecionis, de mois que la primel destinción qu’ai es la categoria la parabra a la que pretenecin. Otru critériu lo hallamus enos andaris fonemáticus, destinguiendu a lo primeru entri as tónicas i átonas i alogu entri las tónicas entri /ˈɑː/ i /ˈa/. Otru critériu es el sintáticu. Está craru que en huendu tres crassis destintas parabras, unas van a gastalsi duna horma i otras velaí dotra, pero tenemus qu’arreparal prencipalmenti enas partículas, polque unas se gastan eno primeru l’oración, desensartás del continiu, i otras abrin u cierran sintamas. Pa deferencial tó estu, es mestel gastal una ortografia dalcuerdu conos prencípius propuestus endespués, siguiendu velaquí las regras d...

El caraiti i el pensamientu los ombris tien el mijol refreju enas parabras la su própia luenga. Ain campus enos que el léssicu se estronchona i, gastandu de tolos reculsus gramaticalis i lessicalis, se encasulla i pinga de matizis. Unu destus chascus son los verba percipiendi , andi unus sintius cuentan con un léssicu mas deferenciau qu’otrus. El mas emportanti es la vista i es un sintiu en que la huerça las luengas tien un haci verbus con el senificau básicu de “vel” pero con destintus sintius. Acontinación, vo a esponel los prencipalis verbus de “vel” que dessistin en estremeñu. · Vel : “pelcebil cona vista algu”. Es el verbu genéricu pa la vista, sin apeninas marca. Provién duna antígua holma veer i ésta del latín uidēre . En estremeñu es inregulal, juegandu con dos raizis i várius alomorfus. Derivaus desti verbu son entrivel “vel con emparchi algu” i prevel “vel enantis, con antelación”. · Miral : “derigil la vista a algu”. S’opón al anteriol verbu en que esti ti...