Léssicu de Las Vegas Baxas: Retahila 29-01-12

Acabu de subil una nueva retahila con léssicu estremeñu de Las Vegas Baxas. La retolá de parabras i el gastu que se hazi d'ellas costitúi una parti essencial de tolas lenguas. En el casu l'estremeñu, la situación es compricá, porque ca ves son más las vozis del castellanu que suponin las estremeñas. Formi passan los días, está más difici poel oyel naturalmenti  parabras comu andorina, antigual del común golondrina, compresibli de ves de compasivo o reponel por ves de reformar. Estas parabras son las que gastan los mayoris i que los nuevus, por no sabel las generacionis d'entremediu, se quean tamién sin sabé-las i lo que es piol: se quean sina golienda de preguntal qué senifican. Tenemus de dil ahinchonandu essa golienda entre la joventú colos métodus que tengamus a manu i se passi el testigu dela parabra. Tal ves, alo primeru no divan a gastá-llas, peru ya las conocin. El gastu duna parabra se idrá assentandu quantis que la concencia de comunidá lingüística s'aconchavi i se aquellará  en compartiendu la lengua dela mejol manera que ai de compartí-la, que es palrá-la en qualquiera cercustancia.

La mi contribución al apontonamientu la comunidá lingüística, prencipia dendi la parti andi vivu, de má que estas parabrinas las pongu aquí paque las conoçan estremeñus i de huera. Es quasique un crimi contra la nuestra coltura estal inorantis de parabras comu recordança, mojina, mentación, inrálidu o levámenti.