sábado, noviembre 01, 2014

A ponte de Olivença

Las puentis ajuntan las pessonas quandu está en ellus la voluntá d'ajuntal, porque tamién ai puentis que desapartan. 

Enas tierras d'Olivença, en el ríu delas mil caras que es Guadiana, a primerus del sigru XVI, en 1509, el rei don Manuel el Primeru mandó hazel una puenti que ajuntara la importanti Olivença al reinau i que tuviera buenas comunicacionis con Elvas i, está polo claru, con el restu de Portugal.

 Olivença, rica en ganaus i tierras, se benefició d'esta obra, que vidu cómu el obispu de Ceuta (por antoncis portuguesa) s'assentó en tierras oliventinas. El poel religiosu s'esparramava dendi la Igreja de Santa Madalena, antañu sé del obispau, modernamenti "mejor rincón 2012" sigún una marca famosa, cosas delas almiracionis estóricas... 

 Pal casu que quandu Estremaúra se convirtió en tableru de juegus pal reinu castellanu i el Alentejo pal portugués, la puenti sufrió los primerus çocotreonis delas ansias nacionalis de ca lau conas guerras de Restauración. Más tardi, ya en el sigru XVIII, el exércitu comandau pol marqués de Bay s'encargó de gastal la pólvora pa cael la puenti justamenti dos sigrus dispués dela su costrución, queandu-la formi se vei enas retrataúras. Tristi estoria de guerras que hizun que Guadiana de ves de sel el ríu que uni, se convirtiera ena frontera ata agora.
 La puenti está bastanti farrungá, peru el cachu dela parti portuguesa es la más largol conserva delos 19 ojus que tien por juntu.
 En el mediu la metá dela puenti se hallan los restus del puestu de vegilancia-fortaleça que en su día guardava la costrución. Apeninas quea una paré con vanus, una escalera i el arranqui dun arcu.

 Alo largu dela calçá se vein los hoyancus, ciegus i trascolandu, que comu la corcoma vá aburacandu la estrutura.
 Pola parti baxera entovía se vein las marcas de canterías con mucha variedá d'ellas, dendi numeralis, ata símbolus, floris i cruzinas.

 Por cima crecin las carrascas i matas dela dehesa, rachandu el suelu i alevantandu las pieras.
El caminu a parti nenguna, los endicaoris de cachu cortau i, al reol, las enzinas i los vesitantis que echan el día de campu entre moquerus de papel i condonis de colorinis gastaus. Essa es la lindi da ponte Ajuda (pola ermita que ai pallí). Puenti muerta, antis caminu de unión, dispués puntu estratégicu, alogu pieras cargás d'estoria que dan sombra alos dominguerus. La estoria i las sus jangás, largu d'entendé-las, aquí vos pongu esta vista de retratus: tamién enos Tossantus celebramus la muerti delas obras del ombri.

No hay comentarios: