El dolmin de Carmonita

 Enos tiempus del canchu, del guiju i dela piçarra quandu s'alevantavan morumentus con el píu d'ellus durar pa siempri reçumían costrucionis sagrás, tasmeás i perpetas andiquiera. La mentalidá dela genti aquella muó pa una atualidá de chichinabu, delo ligeru, delo endebrinu i delo escarchizu i por mediu el'ansia de tesorus. Assina resumimus la istoria de tolas costrucionis megalíticas estremeñas, que passó duna essestencia que agurava palas estrellas a una aburría, envilortá i desajena.

El dolmin de Carmonita

 

Pal casu delas pieras del dolmin de Carmonita, el arramplamientu hue quasi que total. Quearun lo que no puyerun llevar-si, peru quandu menus no lo rebentarun con varrenus cumu passó con el nombrau de Lácara.

 

Detalli del correor

 

Subiendu pol caminu vieju que lleva de Carmonita ala Aldea-del-Canu, a quasi que 400 metrus d'altura, passandu pola puenti porcima del Trampal, a somatraspón por cotorrus i cabeçus i arroeaus d'alcornoquis i fincas de caça apareci ala derecha el dolmin, an pie del mesmu caminu. Es delos pocus dolmin que están asseñalaus, lo mesmu nel puebru que polos caminus.

 

Las pieras hincás o ortostatus dela cámara

Tienin aprepará la parti aquella con merenderus, columbius, pista de fubu i otrus avíus dominguerus, tuviendu comu centru prencipal la costrución nolítica. Velaquí que se halla en un lombitu que tuvu que ser el turrunqueru antiguu que lo tapava, ogañu vallau pola parti del reor dela costrución a trocu de que no entrin los animalis i lo acabin de çalear. El vesitanti puei passar descorriendu el cerroju i entrar al morumentu con respetu i entendiendu que es un sitiu sagrau.

 

Detalli delas pieras dela cámara

 

Lo que está ala vista son las parés dun correor que se barrunta más largu delo que pareci. Angunas pieras se vein declarámenti lavoreás, pos tienin la cara de drentu alisás. 

 

Cara de drentu dela piera hincá prencipal

 

La cámara está más entera, viendu-si las pieras hincás (ortostatus) perfetamenti a destraçar el reondel, enque ai un portillu pola parti del ponienti. La piera junta el correor tien un rebaxi hechu cumu quijiendu hazer arcu. Las demás pieras están hincás, peru con talleras entre muchas dellas. 

Detalli del portillu i del rebaxi dela piera del ponienti

 

Pola parti dafuera no se aprecia el anillu más que por unas pieras junta los ortostatus pola parti del ponienti con angunus centimetrus más de tierra por cima. Dela tapa no se vé pallí ni froncia, assinque lo mesmu se la llevarun pa otru sitiu. 

 

Pieras del anillu dafuera

Pol endirgu de Navascués m'enteré de que muchas delas cosas que aparecierun en el sitiu las regalarun i de que arramplarun con más dela cuenta. Siempri me preguntaré que interés tien la genti en antiguañas que ni entiendin ni sabin lo que son, si por adornu o por perreteu. 

La Estremaúra del quieru-i-no-pueu tien maravillas por tós laus, peru la huerça dellas están aburrías enos campus, perdías en cotus de caça i hondeás entre bardalis, sin adecentamientu nengunu ni letrerus por mieu, por perrería o por ansia. En esta tierra la coltura está derrotá i mal o pocu estudiá: no ai puebru que no tenga, no digu ya unu, sino un cientu de tesorus que ni los propius vezinus conocin porque los arramplarun, los vendierun, los çalearun o mesmamenti están sin asseñalar. Las associacionis d'andarinis, los bloguis i las redis socialis dan en conocer estas cosas que'l Goviernu hazi huerça por inorar i desacular-si dellas, creyendu que'l beneficiu está ena fachenda, queandu una tierra que es rica en coltura probi de quien la entienda.