Las jaulas del campu

Quien quiera passear-si agustamenti por Estremaúra, d'andarín, de ciclista, correor o mesmu passeanti, no puei. Tó en Estremaúra son cotus de caça, fincas de ganau o dambas a dos cosas ala par. Cona propuesta de tener vacas, ovejas o guarrus andiquiera, el campu enteru está cortau con vallas, parés de piera, alambris con pinchis, cancelas o angarillas i candaus, muchus candaus por tós laus. 

Cancela candá enos Arcus, Bajós

 

Un andarín que gusti delas custionis colturalis, arquitetónicas o arquiológicas á de echar-si la cuenta de que á de tener mu buenas piernas pa saltar parés, angarillas, portonis o alambris de pinchis, telas metálicas o procurar por portillus i cachus rotus si quieri ver qué. La Estremaúra delos terratenientis i ganaerus has que caminus púbricus i vereas estén cortaus sinos ayuntamientus hazer ni tapocu ná al respetivi. Naidi considera essus antiguus caminus que atravessavan los campus que juntavan puebrus, restus duna forma de vida más mobi i escotera. Essus mesmus caminus agora muerin en olivaris, en henalis, en forrajalis o mesmu en un tapau.

Ver una lapa, una piera hincá, una boca de cueva, unas ruinas, una ermita o mesmu desfrutar dela naturaleza junta las riveras, delas froris, delos imponentis arvus, delos páxarus, delas puentis de piera, delos molinus o de qualquiera cosa dela que se gozin los que de verdá aman la naturaleza, tienin que saltar-si, cumu una preva d'estáculus, entre cincu i dies parés, cancelas o cercaus cumu mínimu porque tó tien amu i essus amus son gustosus de arroear las sus tierras p'assujetar animalis astilu zológicu que coman pastu o bellotas o monti, tuviendu la poca vergüença de dizir que están sueltus.

El alamentu delas vacas que llaman alos sus bezerrinus polas hesas de Montermosu, la tristeza delas ovejas sin pelar que comin delos rastrojus del Almendral en agostu o los guarrinus que s'asan en baxu delos chigorçus d'uralita dan en llamar "ganado suelto". Los javalinis, conejus i perdigonis que crían en granjas inlegalis (da igual que sean legalis, siguin sin ser éticas) p'alogu soltá-lus enos cotus no son ganau, ni siquiera son animalis abraviaus, son juetis delos caçaoris que s'apropinquarun del campu i, con ellu, dela naturaleza toa. 

Mentris que Estremaúra s'enseca i s'envierti en desiertu por estas esplotacionis, hazin d'ella una jaula ena que ençochan la vida, cautivá-la comu si hueran tomatis i quitandu dela vista la istoria duna tierra que nunca aprendi.