Cujo pan esgarras?

  Tiempo ha que llevo envestigando los ditongos <ai>, <ei>, <eu>, <oi> i <ou> en estremenno que se conservaron de manera residual nel vocabulario i ena toponimia. Estos ditongos vienen normalmente del ditongo <au> latino o dela vocalización de grupos internos como <al>, <ac>, <ag>, <ec> o dotras sitaciones como la metátesi antepositiva de iode. Las vozes en estremenno antiguo son ambiguas, porque hai mui pocos testimonios escritos que conserven essos ditongos. Apenas púi documentar mouros nel Fuero de Campo Maior (1260), ou nuna concordia del obispo de Coria (1257) i Balsadoyro nuna aveniencia entre Alcántara i Coria (1250) enos documentos que llevo esculcaus. Sin embargo, tien mas representación el ditongo [ei] i [ai] dende el XIII ata el XV: Pereyro, cavaleyro, Sequeyros, Severeyro, Ferrayra, Terceiros , etc. La forma mais o mays es mui corriente ena documentación en antes del XV. Lourianilla colando pola Roca ( IDEEX )

  Cuando sal una canogía destas es mester aprovechá-la. Me convidaron a ver una pieras romanas que están ena villa de Granaa (dexamos esso de Granaílla para los delas Cortes, dau que el sufixo -illa, -illo que amenúen los lugares, villas i parages estremennos corre mas dela cuenta dela Almenistración central delos Mairiles que delas vozes delos paisanos, daa aquella a marrá-la enos sus priegos). En companna del amigo Marciano de Hervás púi fazer un estudio in situ duno delos testos que mientan el distrito cauriense. Ara de Cilea   El ara, segundo me espricó el Marciano, vien dela igresia dela villa i era la que gastavan de pila con agua bendita. Es por esso que se esprica el buraco cimero i la conservación buena dela escrición, enque tien algunas arrescunnaúras enas primeras linnas i la parte baxera está bastante borronosa pola metade, como se vei ena retrataúra.  El testo es velaquí esti: CILE Æ·FLAVI·F CAVRENSIS ANXXX·HSE[S] T·TL·FLAVVS·MA TRI·EXS·TESTAM ENTO FC Campo del testo La

   En Azeituna, lugar de los canchaleros, aier tarde tuvi la oportunidade de acuir con un grande conoceor de la coltura tradicional, Félix Barroso , i el mítico Marciano de Hervás , con el pío de landear polos canchales del campanario de la igresia de santa Marina en cata dunos petróglifos.    Retrataúra de los alquerques de Azeituna    Dispués duna carava agradabre an pie del campanario, fecho de materiales romanos, mos enreamos a esculcar por tolos canchales dal reor. Le tenían dicho al Félix, siendo conoceor el propio alcalde del lugar, que juntal campanario havía unos petróglifos. Pero sin mas datos i sin saber si poían ser unos boches, unas marcas, unas cruzes o que crasse era difici dar con ellos. Descartaus un pilancón i otras marcas naturales produzías pola foçaera i los contrastes de temperatura, estavamos por dirmos ata que un canchal chamó la atención ena parte del poniente. Por baxo havía marcas de cunnas de bastante fondura i ena parte de arriba, faziendo una mesa, se dest