Cujo pan esgarras?

Los ermanus Herrero Uceda siguina divulgal el estremeñu tamién pola redi. Dispués que sacaran angunus vidius de poemas con música, musiquinas pal telefoninu i, comu no, propaganda del su libru, s'án arrochau a sacal la su página Mi Extremadura tamién en estremeñu. La sugerencia se la hizi a Miguel estus días atrás: essa página precisava de versión en estremeñu. Pos velaquí! La verdá es que es una alegría ca día descubril más i más páginas ena nuestra lengua. Pocas ai comu esta delos escrivientis Herrero, con conteníu multimediau: vidiu, santus, música, cantaris, poesía... Quandu la coltura está espressa en estremeñu se sienti cómu enverneci.

No mos dexa de susprendel la redi con nuevus escrivientis en estremeñu. Juan Carlos Bermejo Bautista rezién a criau un nuevu blogui llamau Diendu paí .  Prencipió en juliu i lleva poquinus endilgus. En el pon enteracionis a tentu el escrevieru el estremeñu i novedás variás. Dendi aquí muchu ánimu pa esti nuevu compañeru de bloguis i que escriva muchus endilgus más a tentu d'Estremaúra i el estremeñu.

La corrobla proyetá pola amiga Melanie á encontra un sitiu más aparenti pa poel espressal-mus en estremeñu en phpBB . Estu quita el pobrema dela idioma dá que la anteriol corrobla tenía una interface en ingrés que a muchus les diva a costal manejal-si. De má que con esta muación, la nueva corrobla es trilingüi -estremeñu, castellanu, ingrés- de má que puea abarcal una comunidá más ampia.  Enque entovía quean cosas pa ahormal i traduzil, a pocu a pocu lo estamus hiziendu, paque quei un sitiu aparenti ondi la genti puea aprendel i palral estremeñu andiquiera que s'encuentri. Las señas del foru son  http://palraestremenu.com/foru/index.php  i poeis escrevil-vus aquí .

La anteriol corrobla Palremus estremeñu ! acaba de mual el nombri a "Amus a palral estremeñu!". Por pobremas técnicus á teníu que mual las señas, polo que pa entral en ella poeis achuchal aquí .

L'amiga Melanie , dendi Canadá, mos á susprendíu esti viagi cola abriúra duna corrobla pal estremeñu: Palremus estremeñu! Esta corrobla es abierta: namás ai que escrevil-si al ella pa opinal, contestal i compartil tolo tocanti al estremeñu i a Estremaúra. La fin d'esta corrobla es caraveal en estremeñu paque los que quieran aprendel, puean hazé-lu duna manera libri i palos palrantis d'estremeñu poel espressal-si ena su lengua. Aludial el estremeñu dendi la Redi es algu que siempri amus afiau dendi lo primeru: Belsana , Paseo Virtual , La Güiquipeya , QuiLéxico , Voz de mi tierra , una tupa de bloguis, etc., gastandu de tolos formatus que la Redi mos á premitíu, siempri de baldi i con muchu eshuerçu por parti delos sus criaoris i gestoris. En Palremus estremeñu!  ain  ya  varius temas  abiertus de lingüística, carava general, aprendizagi i coltura ondi, arregru al tema, escrevil lo que  empareji.  Era mestel un sitiu púbricu pal corrobleu de manera...

Juan Francisco Reina Raposo á abiertu una bitacorina en estremeñu en Wordpress, Ñiu mielrus . Dende aquí l'animu a que acontini escreviendu en estremeñu i se vaiga hiziendu mayol usu de la muestra luenga ena Redi. No vos perdais los sus endilguis!

Amus criau un marcaol social púbricu andi dil pusiendu tolos atijus qu'avemus a tentu el estremeñu i la cultura estremeña. Lo güenu, es que aquí tenemus recadau tol material qu'ai u se van hiziendu a tentu la muestra cultura. Contri mas seyamus, mas i mejoris enteracionis avremus sobri tolo hechu sobri Estremaura ena Redi: endilguis, estuyus, vídius, grabacionis, páginas web... Asperu que colaboreis. El muestru marcaol es el de Cultura estremeña . Pa poel guardal las señas, es mestel estal registrau, cosa que se hazi pol envitación al correu. Los enteressaus, pegaimus el avisiju pa convialvus.