Cujo pan esgarras?

En el puebrinu d' El Guiju , mu cerquina de Coria, la conservación del estremeñu entre los hablantis nativus es bastanti buena. Acabu de subil-vus una grabación que da fiel testimoñu de que el estremeñu se tien comu lengua vernácula entre los propius estremeñus con tolos rasgus que los dialectólogus dizin que no es capás de tené-lus en un mesmu hablanti. Ena grabación participan tres viejinus, unu de 88 (el ombri) i dos mujeris. La que mas habla tien 69 añus. Comu curiosidá pa los que categorizan al estremeñu de español, se puein oyel cosas comu "barré-llu", "ruiu", "dambus", "piejus", un gerundiu "traxiendu", etc., parabras toas ellas dialectales del castellanu (!). Grabacionis comu estas son la mejol preva de que el estremeñu se habla, que sus origin son leonesis i de que á de acontinal hablandu-si entre la genti nueva cona mesma involtura cona que palran los agüelus. Con esta grabación do mejol contiesta al professol Salvador de ...

Se inagura el apartainu de decumentus sonorus ena página de Pubricacionis . Aquí vos vo a dil pusiendu las grabacionis en estremeñu de hablantis de destintus puebrus d'Estremaura paque vaigais viendu la prenunciacion, el léssicu i el entonaeru que gastamus. Son selecionis de caravas i entrevistas hechas con nativus de los lugaris que vos pongu. Las que estoi a subil agora pretenecin a Serrailla (Caçris), puebru de los que mejol conselvan la léngua. Esperu que vos sean aparentis pa aprendel.

Tiempu á que grabé esta carava en Garrovillas d'Alconeta , allá junta Taju. Ei aprovechau la mesma página que tengu en Archive pa subil la grabacion que andava trasconejá en otras páginas, pero que agora la recadu en mejol sítiu. Alogu izin que es enventu... Quántu mos quea pa envestigal entovia!!!

El proyeutu Mercurio qu'arrancó pocu á comu eniciativa pa una television educativa andi los professoris puein subil archivus de soniu i vídiu cuenta con angunas grabacionis dialetalis estremeñas de Cabeza el Buey, Guareña, Campanario i del Val de Xálima. Vo-las pongu paquí: Preparación de los cardillos (Campanario) Comida de romería (Cabeza del Buey) Fabricación de la aspirina (Cabeza del Buey) La matanza (Guareña) El maestro represaliado (ena fala) Los molinos y el pan (Val de Xálima) Á si se va destendiendu la enclusion d'esta crassi grabacionis, mas que ná, quandu van enfocás a la educacion los zagalis. Güenu sedria que los professoris de los sítius andi mas se conselva el estremeñu subieran grabacionis enas que los viejus elustrin en luenga i en costumbris i trebajus.

El Viernis passau, en compaña de Bienveniu i de Tiu Revu , huimus a Çorita a hazel unas grabacionis pa dal testimoñu del estremeñu en essa localiá cacereña. Agraeçu muchu a quien colaborarun, mesmu cudiaoras, a Luismi i, mas que ná, a los entrevistaus pol su tiempu, pacéncia i alegria i vel passau una güena mañana pallí entri cancionis i relatus d'antañu. Ei subiu una grabacion a Archive pa elustral sobri el güen usu el estremeñu en esti puebru. A pocu a pocu con muestras comu estas se va deprendiendu una mijina mas a tentu el estremeñu. Aquina vos pongu el reprodutol cona grabacion. De juru vos cumpri.