Cujo pan esgarras?

En tol largol desta Estremaura desistin hormas deferentis pa conhugal el pretéritu pluscuamprefetu suhuntivu. Lo mesmu que en castellanu se gastan enderefentienti las hormas del pluscuamprefetu d'endicativu latinu que las del suhuntivu. Si aguramus la atención pa la horma hubiese , que vie del latín habuissem , mos atopamus con tó un hadi e prenunciacionis. Las hormas que acontinan, asiahás de mayol a menol grau de casteyanidación son: - ubiese - biese - ubiesi - biesi -abiese - abiesi - fuese - huese - fuesi - huesi Las cuatru úrtimas hormas verdaeraenti nu precein de la horma habuissem sinu e las correspondientis del verbu sel estremeñas. Esti espetu tamién lo abemus compaltiu con el andalú, peru nu sedrie el únicu. Amás las variantis aquí arreprehentás, abemus angunas que son mu ralas, que son las gastás pola mí zona (inoru si se gastarán en algotras zonas) entri los falantis campusinus mas afechaus. Desistin namás que pal singulal i mu esporadicaenti pa la trecel el prural....

Encetamus pofín enus andaerus la redi! Me huchean Fraili Carmona e La Vara u Fraili Carmona Valviensi, sigún vos paeza, i quiu gastal esti "blog", entri algotrus andacapairis, pala contina rehormulación del castú palral que vinimus hidiendu un añus há. Esti blog se á criau en un esmienzu pa la divurgación de custionis gramaticalis del estremeñu. Se idrán prepusiendu apontis i artículus sobri custionis que remanecin azonchás u inorás polos estuyus del estremeñu, asín cumu algotrus espetus de interés sobri el estremeñu. Asperu que colos indirguis, comentárius i pobremas de toa crasi vaigamus apuchandu la muestra palra i se ehi de arrutal enos puemas duguañoti i se haga verbu sonau, polque entavia abemus elusionis la su renacéncia. Letoris, queais conviaus.