El Broncu es unu d'estus puebrus que están assentaus en un sitiu de passu i, comu es de passu, naidi lo echa por cuenta. Diendu pa Villa-Nueva o pa Mueda, lo atraviessas ligeru, comu si aquellu hueran quatru casinas. La verdá es que esti puebru está en un cruzi de caminus (pa Santa Crus, pa Cerezu, pa Palomberu, pa Santivañis, pala Igal, pa Villa-Nueva...), arroeau por dos regatus (El Riscu, Moñina) i la rivera del Broncu, que le da nombri. Tó essu no s'aprecia pal que vai pola carretera, peru antañu quandu no queavan más medius que dir a peoncia alos sitius, esti puebrinu sí salía enos mapas. De hechu hue monicipiu, ata que dispués passó pa Santa Crus comu una alquería.
 |
Letreru formi se vien de Villa-Nueva
|
Ogañu es un puebrinu atravessau pola carretera, entre olivus, enzinaris, ondi s'estila el cavalleu i el ovejeu, pa fachenda i pa quesus. Angunas casinas nuevas se vén obrandu, quiciá delos ijus i nietus delos bronqueñus que vivían aí.
 |
El lugar del Broncu an pie dela rivera omónima palos añus 40-50, ena retrataúra del Vuelu Americanu
|
El caseríu d'agora está retificau i pocas casas quean cona hechura delas casas del siclu XVIII o XIX, conas toças i las ombreras de granu, los bastioris delas ventanas lo mesmu i las poyatas delas ventanas. Las callis siguin el destraci antiguu de ponienti a salienti, abocás al norti, formi el recuéncanu dela rivera. Quasi que no se aprecian costrucionis nuevas comu otrus puebrus que s'enancharun... quiciá porque esti puebrinu no cai cerca de capital nenguna i porque la genti hue ahuyendu con el ajorraeru delos añus.
Los nombris delas callis, desquitando "Cervantes" y "Colón", que son los únicus antropónimus, los demás mientan del sitiu, es dizir, conservan los nombris antiguus acastellanaus: Real, Medio, Sol, Fragua, Plazuela...
Esti es velaquí el reportagi en retratus que amus hechu a esti puebru delas tierras dela Graná antigua que ogañu malaspenas cogi los 43 abitantis.
 |
Cara enxavelgá ena Praça
|
 |
Gatu nuna paré dela Praça
|
 |
Bancus dela Praça entre plataneras i periquitus
|
 |
Ilesia dela Madalena dendi el atriu
|
 |
Detalli dela puerta
|
 |
Calli "Colón" agurandu pala calleja la Fuenti
|
 |
Toça que pon "Añ[o] D[e] 1898"
|
 |
Ventanina dela calli "Real"
|
 |
Praça "Colón"
|
 |
Calli "Medio"
|
 |
Puerta dela calli "Colón"
|
 |
Travessía dela "Fragua"
|
 |
Gatus dela Calli "Fragua"
|
Comentarios