El cedru de Gata
En un mundu ondi la tierra tien amu i está partía i repartía de mala manera, qué pintan los arvus pala genti? Pos si no sirvin pa sacá-li provechu, namás pa estorvar: el oju del ombri que aborreci del verdor delos xaramagus, la cañaherra o l'ambuera tamién considera que sobran prantas, tenga 300 añus o aigan retoñecíu la semana passá.
 |
| Troncón del cedru dendi la pará |
El cedru de Gata tapocu s'escapó i estus mesis atrás le hizun una "poda sanitaria", comu reza el letreru dan pie del troncón, i lo esmocharun reondamenti.
 |
| Troncón sina cogolla |
Cómu unu delos arvus más mentaus dela Sierra de Gata acabi sina cogolla que abarcava la carretera toa es algu que inoru. Hue pola muança climática? Quiciá porque estorvava ala carretera? Tenía praga? No lo sé, porque ni tan siquiera púi entrevistar naidi ena vesita a Gata i que me diera norti i tapocu encontré ná en interné.
 |
| Pie del troncón |
Los gateñus pa recordá-lu dierun un cedru a ca puebru dela Sierra Gata, siguiendu essa tradición delos puebrus norteñus de prantar arvus (Villa-Nueva, Pescueça, los puebrus serragatinus...). Agora namás se puei ver el troncón an pie dela carretera comu un monofitu hincau arroeau de castañus gigantis, pinus i higueras. Empelotinu ena parti que se vei, conas raízis que ahondarán alas razonis mesmas del tiempu, quea comu essas palmeras enfermas que tantu s'empeñan los ayuntamientus en prantar i en curar contra'l picúu. Averá algu que haga bien el umanu? Andiquiera que meti la manu lo çalea, un rei Mida garruñu que empercúi el alimentu, el'agua, el suelu i los arvus, peru que entovía no le roga a Dionisu cómu hazer pa no seguir derrotandu tó.
Comentarios