El Batán: el puebru delos tauricidas

Quandu se vesitan los puebrus, siempri se vén las ilesias, las ermitas, los jardinis, las fuentis, las puentis, las ruinas... Tolo que da a entender la istoria del puebru por mé delos sus edificius. Pocus guipan los letrerus delas callis: en ellus tamién ai istoria. Se vén enas baldosas, chapas o letras destacás delas esquinas delas callis las buenas i malas decisionis delos que proyetan los puebrus, delos concejus, delos politiqueus, de si se guardan los topónimus con certeza o si los falsean... Milenta de datus dan essus letrerinus de callis que se sobreponin, que s'aborran, que los pican i vuelvin a poner. Peru qué passa quandu un puebru enteru omenagea los que tienin o tuvun por oficiu matar torus por sicopatía, lucru, fachenda i gustu?

Letreru dela "Calle el Cordobés", en el Batán

Pos velaquí el Batán, un puebrinu de colonus que preteneci al Guijitu, de casas brancas i de callis que siguin el pranu ortogonal, peru colos nombris delos prencipalis assessinus de torus del sigru XX i del sigru XXI.

Casa dela calli "Miguel Márquez", en el Batán

Ogañu quiciá muchus se susprenderían i ahuchearían al alcaldi si ondi vivin tieni el nombri dun genocida, dun parricida, dun pederasta, dun racista, dun machista confessu o dun lairón del puebru. Sin embargu, las callis delos nuestrus puebrus i capitalis entovía regentean con letrerus que los que escrivin la istoria delos ganaoris dierun en llamar "euris" o cosa aparenti, cona pruma cargá de sangri d'ergullu nacional i de ideologías apotronás . Reis, ifantis, duquis, generalis, militaris, conquistaoris, obispus, escrivientis están por tós laus nombrandu callis que enantis tenían nombris cenzillus comu La Fuenti, El Cinojal, Derecha, Conceju, El Pocitu, La Era... por custionis políticas o ideológicas, sin juíziu éticu nengunu. La genti no se susprendi dellu, más, le da igual.

Ventana cona forja delos puebrus de colonus del Alagón con el letreru de "Mondeño", en el Batán

Cómu no le vá a dar igual si una calli se llama "El Cordobés", "El Viti" o "Mondeño"? El nombri delas callis que luzin con el nombri dun tauricida es tan repunanti comu las que omenagean assessinus del regimi franquista, ifantas laironas o pederastas dela Ilesia. Sin embargu, es ergullu de muchus ahinchonar la sicopatía dela sufrencia por mé las fiestas, los omenagis, el sostribu púbricu i, comu diximus estus días atrás, los símbolus. Essus letrerus son símbolus en puebrus i capitalis especistas. Los ergumentus que dizin que no es pola sangri, sino por la valentía es comu el que defiendi el machismu dixiendu que no es pola apresión alas mujeris, más bien pola ombría, comu si lo propiu delos ombris huera la violencia i delos políticus apregoná-la. Ná malu tienin topónimus bien cercanus comu Nava-Mojá, Assunción, Alagón, El Guijitu, El Refugiu, El Rincón de Vivalis, Quintinis, Las Martinas, Candelariu, Sauzitu o Lamajosu, pa qué mentar assessinus enos letrerus?

Letreru de Luis Miguel "Dominguín" en el Batán

Es mester dizir que essus letrerus son istoria del puebru? Sí, es istoria i si la istoria aprendi algu es que ai que muar i dir a passu a passu mejorandu comu especii. Agora, en el sigru XXI, a pocu a pocu la sociedá está dexandu d'embastecer-si por causa dela violencia i muchus consideramus que matar un toru por entretenimientu no trai ná buenu, ni pal propiu toru, claru está, ni pal que se lucra con ellu que considera que un animal por ser deferenti á de servir pa enllenar l'andorga o la bucheta, sin muar ni un átimu la consideración que se le da, ni tapocu pal que se regorça con ellu derechamenti hincandu-li una espá o renegámenti pagandu por ellu, porque umenta el pentellu envirtiendu-lu en un brutamonti. Por essu, es mester hazer un juíziu críticu i éticu de qué nombris ponemus alas callis: no se puei cumprir a mantenienti cola lei de memoria istórica, aborrandu las acordanças al "caudillo" por un lau i alogo por otru tenguerretear con aquellus que son martirizaoris, assessinus o violaoris sin contradizir-si.

(Averá una segunda parti...)