Entidá
Alas vezis el nuestru egu precisa duna seña d'entidá, más quandu se sienti gurruminu i anda en cata d'aprovamientu por parti de quien se considera mejor, más, pa sentir-si que preteneci a algu más grandi. Estu has que tengamus que dir pusiendu ala vista de tó chichirimundi las cosas que mos representan. Caúnu tien la suya propia: una bandera, una marca, una palavra, una canción, un santu, un partíu políticu, una idea... i en essi símbolu encontramus un cachu de musotrus o, cumu le passa de continu ala genti, essi símbolu se convierti en musotrus.
"Palabras con identidad" en Román-Gordu |
Assina apaecin los tipismus i la ralidá enlatá. Se vé en aquellus puebrus ondi sin entender la istoria ni el sitiu que lo arroea procuran por una bandera ençalamá de sangri i dizin que lo propiu es achacinar un guarrapu, hazé-li judiás alas vaquillas, conviar en un friti alos vezinus, dedicar cientus d'ectarias al promu, la sufrencia i el derroti ambiental, quear-si enos añus 60, otrus enos 30, otrus ai dos sigrus... Tó p'ahinchonar lo que dan en llamar el "desarrollo rural".
"After Louis Wain" de @nher19, en Gata |
De tolos proponimientus que hazin associacionis, ayuntamientus o la propia Almenistración, un quantu-quantu namás no maltratan, matan o estroçan ná. Alo mejor devemus d'aprender de Román-Gordu, que dio en adornar las sus callis con arti, retratandu la vida dela genti, el usu i la libertá delos animalis, los oficius, con posía, con prantas melecinalis, con el patrimoniu oral estremeñu. Mesmu dela Serraílla i las sus palavras en forja pola callis o Gata i los retratus de gatus (enque no tenga ná que ver una cosa cona otra) o una feria del barru en Salva-Tierra (sin el burru harrieru, claru!) o del livru en Badajós. Estas ideas ai que sostribá-las, con el visiteu, cola propaganda, colos me-gustas. Si de verdá andamus en el sigru XXI, ca ves se sentirán comu bárbaras i antiguás essas chirrichoflas comunalis pa llamar al visitanti i otrus holgorius que acaban colas callis llenas de vasus de práticu, quintus i fusca de tolas crassis, con animalis que entretengan por sustener una costumbri liquiamenti atrasá, injusta i çamarra, más propias de canecus que de pessonas umanas.
El símbolu á de ser artísticu i respetosu, que no amorri ni embasteça. La mejor manera de no contribuír ala charracina que propón un puebru que entiendi el visiteu de muerti es no diendu. Tu decidis.
Comentarios