Cujo pan esgarras?

Acabu de arrematal la que es la otava tradución que hagu de testus antiguus al estremeñu. La verdá que esti testu es unu delos más lindus que ei embrocau pal estremeñu, quien lo lea, sabrá por qué. Se trata del anónimu latinu Pervigilium Veneris , un cantal bastanti personal, hechu palas fiestas dela primavera que se hazían en onol a Venu. La Vispera de Venu - Trad. Ismael Carmona Garcia by IsmaelCG   Poeis descargal-vus libru de baldi achuchandu aquina . Que rehunda la leyenda!

El amigu Cruz acaba de abril otru blogui de poesías en estremeñu. Esperu que mos rehunda muchus las sus sentías palabras i s'esparrami pola redi. Aquí vos queu el atillu .

Unu delos compañerus más tentigus que amus teníu ena promoción del estremeñu, Juan Fcu. Reina (el de Ñíu mielrus ) quiel demostral una ves más que'l estremeñu tamién puei gastal-si pal escrevieru literariu. Con un feitíu modernu, cenzillu i delicau, esti escrivienti nuevu espón testus cortus, cuentinus, aforismus entre lo filosóficu i lo literariu, cudiandu muchu del sentíu delas palabras, peru cona naturalidá que brinda el frujil estremeñu. El blogui se llama Calambucu , vos bien aparenti. Dendi La Bellota damus tol nuestru ánimu pa esti autol i la su nueva forma d'entendel la literatura en estremeñu.

Los ermanus Herrero Uceda siguina divulgal el estremeñu tamién pola redi. Dispués que sacaran angunus vidius de poemas con música, musiquinas pal telefoninu i, comu no, propaganda del su libru, s'án arrochau a sacal la su página Mi Extremadura tamién en estremeñu. La sugerencia se la hizi a Miguel estus días atrás: essa página precisava de versión en estremeñu. Pos velaquí! La verdá es que es una alegría ca día descubril más i más páginas ena nuestra lengua. Pocas ai comu esta delos escrivientis Herrero, con conteníu multimediau: vidiu, santus, música, cantaris, poesía... Quandu la coltura está espressa en estremeñu se sienti cómu enverneci.

S'amontonan las pubricacionis (cosa estrordinaria!). Ayel mesmu presentarun en Montiju la revista de ferias 2012. El amigu i envestigaol Manuel García Cienfuegos s'á encargau de hazel una revista curiosa con artículus de especialistas i provincius ondi s'á destacau la coltura. Portá la revista Estus mesis atrás, me pidió que endilgara algún articulinu pa essa revista i que lo hiziera en estremeñu. Mu gustosu hui d'aquella propuesta, pos era la primel ves que me encargavan un endilgu en estremeñu dientru dela mesma comarca. En siendu justu con el apedimientu, m'aterminé por escreví-lu ena variedá daquí, respetandu las palabras i la prenunciación paque montijanus, poblanchinus, lobonerus, talaveranus o qualquiera delos paisanus que viera la revista i se topara con el artículu lo leyera conos ecus delas sus propias vozis i espressionis. I es que la nuestra idioma es tan rica que da pa escrevil enas variantis de ca sitiu sin descarecel la lengua común estre...

Vos traigu una nueva letura en estremeñu. Tan escassinus comu andamus de testus en prosa i muchu más de traducionis, m'ei arrochau a embrocal en estremeñu unu delos testus más importantis dela antigüedá: la Carta a Meneceu del filósofu Epicuru. Es un testu filosóficu cortu, peru intesu, con una huerça moral imponenti. En ella, el filósofu del uertu precura aborral las aginacionis las pressonas por mé del conocimientu pa poel vivil a gustu. Los diosis, la muerti, las perras, el dolol: tó encuentra respuesta enas sus páginas. El libru perteneci ala coleción Crássicus en estremeñu, que vá pol sétimu númiru. Que'l estremeñu vaiga contandu con una prosa filosófica i moral pareci que lo estamus consiguiendu por mé d'estus librinus. No es muchu, peru a pocu a pocu se ván assentandus las basis la tradución en estremeñu i dela prosa. Aquí vos queu el prencipiu la carta: No vaiga a estal unu sin filosofeal por sel nuevu, ni se cansi del filosofeu quandu avejanti, ...

Ai unus añus, dispués que me pusiera a estudial el estremeñu, m'arroché a escrevil poesía, cuentus i aforismus en esta lengua. Muchas poesías las divulgué pol destintas páginas dela Redi, en forus o bloguis.  Quandu ajunté unas pocas, ya en el 2007, enxareté un librinu en PDF que subí a internet. Essi librinu era  Pan i verea . Algunus poemas tamién án salíu en otras pubricacionis comu la revista asturiana  Formientu  o en el primel númiru de  La Nueva Literatura en Estremeñu .  Comu ya disponemus duna ortografía consensuá, ei aprovechau pa almendal algunus marrus dela primel edición i ponel los testus arregru ala ortografía'l OSCEC. El libru poeis descargá-lu de baldi achuchandu  aquí .  Esperu que con ellu se de un vencijoninu alas letras en estremeñu. Buena letura!

Muchus de los que están en el mundu de lo estremeñu tien conocencia de la parabra castúo i no es ralu que la gastin en quixiendu dizil estremeñu , abarullandu dambas a dos vozis. Lo que es que el castúo , por sel una parabra deferencial —quiel dizil estu que no mienta geografía, ni gentiliciu, comu has estremeñu —, lo tienin por corrienti los que dan cuenta de las hablas estremeñas, a estilu dun bable o la dun baturro . La genti, afanosa en assental los hitus i dizil lo míu es míu, tuvun a bien que cona parabra castúo mentaran las hablas estremeñas. A estu vinu el sostribu de huera, de las vozis no estremeñas que prencipiarun a llamal castúo a la nuestra manera de hablal no sabían qué. Retrataúra de Chamizo Es mestel tesal una mijina i retrayendu-mus a lo primeru pa comprendel que castúo no tien ná que vél con custión lingüística denguna. Muchus no tendrán conocencia de que castúo es una parabra que no populal, sino un enventu literariu —los espertus se repapilan con esti concetu ...

El amigu Cruz Díaz, de Pescueça, á hechu una paginina en estremeñu: La gajá del jurréu . En ella quiel dil pusiendu tolas poesías que va hiziendu en estremeñu. Dende aquí, muchu ánimu i que rehunda el escrivieru! Poeis vél la página achuchandu aquina .

Tengu el prazel de presental-vus esta obra frutu de la colavoracion de los miembrus del OSCEC , por mé de la Comission de Literatura i que presentémus el passau dia 4 en Botija en el I Encuentru del Estremeñu i la su Cultura. Se trata de un librinu entitulau La nueva literatura en estremeñu . En él poeis encontral testus inéditus de José María Alcón Olivera , Antonio Garrido Correas , Bienvenido Gutierro, José Benito Mateos Pascual , Juan Fco. Reina Raposo i quien vos escrevi. Literatura en prosa i en versu escrita en estremeñu pola nueva generacion d'utoris en estremeñu. Esti librinu demuestra que es mestel espubrical muchus de los testus que quean guardaus en ordenaoris i cajonis de poetas i prosistas en ogañu: la caliá de muchus d'ellus poeis vé-la en esta obrina. Los temas án cambiau, el usu la léngua mejora i el arti va perdiendu las botanas i las hiendas pa dil-si entanguilandu comu una literatura polia, destensa i moerna. Asperu que vos gusti. Poeis descargá-la achuc...

Ya poeis leel el nuevu númeru la colecion Crássicus en estremeñu . El libru es del filósofu elenu Eraclitu . Asperu que vos gusti. Vo-lo poeis descargal achuchandu aquí .

Tengu ya apreparau el que sedrá el númeru 4 de la colecion Crássicus en estremeñu . Esta vezi ei descogiu un utol griegu i de los mas enportantis i enfruyentis en el pensaeru ociental. No vos igu el nombri, namás que no á siu faci traduzí-lo. Drentu de pocu vo-lo subiré.

Vai muchu tiempu que no espubricu ná i que se vé estu una mijina parau. Essu va a dil acabandu-se. Polo plontu vos traigu un nuevu poemáriu en estremeñu. Son 19 poemas escritus ena primel metá del añu passau i les ei puestu el nombri de Endofisica , por referil-se a la naturaleza de drentu de mosotrus. Ei subiu el PDF en Archive, comu es costumbri. Pa poel descargal-vos el librinu, achuchai aquina . Güena letura!

Comu aconteci sempri en estus casus, m'ei atopau con una bitácora en estremeñu landeandu cosas pola Redi. Esta página es una mesturiña temática andi gasta destintas huentis. Política, literatura i luenga s'arrebrujan enos sus deferentis endilguis. Pa quien quiera jechal una guipaina, esti es el atiju . Dende el Cúyu? un vencijón paque acontini sacandu cosinas.

En estas Naviais anduvi tradujiendu una nueva obra al estremeñu. Se trata del Somnium Scipionis , destraiu del De Republica Cicerón . Es una obrina cortina, pero mu linda, huendu unu de los escritus la Antigüeá que mereci abrocalo a tolas luengas possibris. Escipion se sueña con su agüelu i su pairi, quien lo endilgan a una via güena i a un conpromissu cona pátria. Nel sueñu, Escipion haz un viagi astral o estelar (sigún las entepretacionis) hata el Caminu Santiagu, dende onde tien una panorámica el universu. Descricionis, concéncia i reflession sobre la fegura el ombri s'atijan i enrelian pa arrematar con el destinu que tien los ombris ena Tierra i el que l'aspera enas estrellas. Asperu que vos cumpra i vos haga arreparar lo mesmu que haz el protagonista la estória. Poeis decargar-vos el librinu aquina.

Acabu de subil un nuevu PDF cona tradución en estremeñu del comiençu el Satiricón , obra de Petróniu . Pa mas enhormación vesitai La Billota literária , aí tenís el atiju pa poélvula descargal.

Acabihu de subil a la Redi una obrina en estremeñu. Se trata del De prouidentia qu'escrebió Séneca traduciu al estremeñu. Anque seya un tratau cortu, es hunta El Prencipinu , Requilorios, Primera Gramática Ehtremeña , La Cohtitución en ehtremeñu i el cuentu la Mardición de Marián , una las pocas obras en prosas escritas en estremeñu.  Anque nu prometu ná, possibrimenti seya la primel obra duna coleción testus crássicus latinus i griegus traducius al estremeñu, dependi de la acohia que tenga el púbricu i el enterés que muestri pol esti tipu obras, que, huendu de suyu enteosas pal letol el sigru XXI, se dobra pol velsi traducia a una idioma cumu el estremeñu. Esta primel obrina es de tema filosóficu, vos pongu un cachinu la entrodución: Esti opúsculu s’enhalla endrentu los Dialogi i compón el primeru de los sus dozi librus. El su títulu orihinal en latín es De prouidentia . Esta obrina en seis capítulus qu’eicó a Lucíliu es una reflessión filosófica pol mé la quala quiel dali un...