Cujo pan esgarras?

El Viernis passau, en compaña de Bienveniu i de Tiu Revu , huimus a Çorita a hazel unas grabacionis pa dal testimoñu del estremeñu en essa localiá cacereña. Agraeçu muchu a quien colaborarun, mesmu cudiaoras, a Luismi i, mas que ná, a los entrevistaus pol su tiempu, pacéncia i alegria i vel passau una güena mañana pallí entri cancionis i relatus d'antañu. Ei subiu una grabacion a Archive pa elustral sobri el güen usu el estremeñu en esti puebru. A pocu a pocu con muestras comu estas se va deprendiendu una mijina mas a tentu el estremeñu. Aquina vos pongu el reprodutol cona grabacion. De juru vos cumpri.

Enos trebajus d’envestigacion pal dicionáriu, landeandu la etimologia duna de las parabras mas generalis enas muestras habras, ábati , hizi angunas hallauras enteressantis: tantu el alvérbiu ábati comu la entrejecion á son parabras d’origin griegu. Las parabras ábati i á procein de una antígua entrejecion aba , qu’entavia se conselva en angunas zonas lionesas. Esta entrejecion se hormó del emperativu dun verbu abar , regressivu del elenismu latinu apăge “alarga-te, huera, hopo, humo” (gr. ἄπαγε , 2a press. sing. pres. end. v. ἀπάγω “alargal”). La horma ábati está conpuesta por aba + te , horma emperativa pronominal (cf. vai-te, alarga-te, arrehazi-te ), cuyu primel valol es entrejetivu i que entavia se conselva, enque mu difússiu, ena su huncion enpressiva en frasis comu ábati que me caigu “quita-te que me caigu”. Esta horma, con el mesmu acentu, essisti entavia en asturianu: ábate . Mu atijá está tamien la horma abaté , ondi prevaleció el segundu acentu enpressivu aba-te [ˈa...

Comu tolos añus, sigún vien huendu costumbri en esta bitácora, vos conviu con unus afotinus a dil a vesital mi puebru pa estas fechas, paque veais i conoçais qué es la primavera en Estremaura i cómu se vivi. Esti añu la froracion á siu tardia por mé del água i el airi, pero con tó i con essu los arvus án traiu las froris i los goloris própius d'esta epoca. No vos olvieis las tres prencipalis fiestas de los arvus en frol en Estremaura: los almendrus de Garrovillas, los frutalis de las Vegas de Guadiana i los cerezus del Jerti. Vos traigu un reportagi fotográficu d'esti passau fin-de-semana. Entavia quean por frorecel los peralis i los bruñus. Asperu que vos cumpran!

Manuel Trinidad hizu una entrevistina a Bienvenido Gutierro, hundaol la asociación Pablo Gonzálvez, i a la su ija Maxi pal pograma el arrádiu catalán El rincón extremeño . Poeis ascuchal el pograma aquí . La entrevista a la que me refieru enprencípia ena segunda ora. Ascuchai-la i sacai las vuestras própias conclusionis. Noragüena a tós tres. Con esti tipu de devulgacion ca dia mas genti va tomandu conocimientu i concéncia del estremeñu, endrentu i ahuera de la muestra region.

Acabu de atopal esta bitacorina que lleva huncionandu dende el 2008. Se trata duna página andi van pusiendu parabras de pa la Puebra d'Obandu . Asperu que puli la página i vaigan enjaretandu un güen parabreru. Un salú dende aquí i ánimu!

El acaémicu Gregorio Salvador escrevió estas parabrinas nel diáriu ABC vai unus añus ya, nun artículu entitulau Lenguas imaginarias . Por mé de la bitácora Geolectos me ei atopau con esti endilgui. No vo-lo perdais i julgai vosotrus mesmus. El pensamientu oligoglóssicu trumfó el sigru passau i trumfa vé-lo equí n'esti.

Ya está disponibri ena Redi el segundu númeru la sérii Cuadernos de Gramática Extremeña . Esti númeru enclui cincu articulinus: 1. - Abozinamientu de /o/ . 2. - Resultativus en -en- . 3. - El afiju -iqui- . 4. - Endigual, antigual, manigual . 5. - Renti . Vo-lo poeis descargal achuchandu aquina .

Ya se puei vél ena Redi el reportagi que emitió Canal Extremadura ayel-nochi a tentu la fala i el estremeñu. Palrarun Frades, Cañada i Feijóo. Julgai vosotrus mesmus. El reportagi creu que dura una semana ena web i alogu lo descámbian pol de la sotra semana, assinque no vos pongais remolgonis i vei-lo.

Esta nochi, 25 Jeneru, a las 22:00, nel pograma " Soy Vecino " vesitarán us tres lugaris .

Oi, 24 Jeneru, hazi la Güiquipeya tres añinus dende que s'aprevó. Lleva mas de mil endilguis i asperemus qu'acontini cumpriendu muchus mas... Noragüena al zahoril i a los colaboraoris de drentu i huera d'Estremaura pol vuestru eshuerçu!

El próssimu dia 29 Jeneru, a las 19:00 daré una chalrina a tentu el estremeñu en Valdelacalçâ, ena Casa la Cultura la localiá. Palraré sobre los orígin, la luenga, la literatura i la devulgacion el estremeñu. Tocaré un poquinu tamien el envestigaeru ena palra las Vegas Bajas, prencipalmenti, enque mu somerinu, léssicu, refranis, frasis hechas i cantaris. Agraeçu la vuestra assesténcia.

El Domingu, enantinu de escomençar el añu laboral, la nievi mos entalló de chopetón a los estremeñus. Vos pongu paquí unus afotinus que jeché aquel dia de Caçris. No s'olviarán assín comu assín las bellas imagin el Parque del Príncipe encultu pola nievi, el réziu caballu Hernán Cortés o la cotorina San Peiru nevaus. Asperu que vos gustin.

En estas Naviais anduvi tradujiendu una nueva obra al estremeñu. Se trata del Somnium Scipionis , destraiu del De Republica Cicerón . Es una obrina cortina, pero mu linda, huendu unu de los escritus la Antigüeá que mereci abrocalo a tolas luengas possibris. Escipion se sueña con su agüelu i su pairi, quien lo endilgan a una via güena i a un conpromissu cona pátria. Nel sueñu, Escipion haz un viagi astral o estelar (sigún las entepretacionis) hata el Caminu Santiagu, dende onde tien una panorámica el universu. Descricionis, concéncia i reflession sobre la fegura el ombri s'atijan i enrelian pa arrematar con el destinu que tien los ombris ena Tierra i el que l'aspera enas estrellas. Asperu que vos cumpra i vos haga arreparar lo mesmu que haz el protagonista la estória. Poeis decargar-vos el librinu aquina.

Acabu de subil un nuevu PDF cona tradución en estremeñu del comiençu el Satiricón , obra de Petróniu . Pa mas enhormación vesitai La Billota literária , aí tenís el atiju pa poélvula descargal.

Landeandu una mijina entri las leis tocantis al sistema educativu estremeñu u que tien relación con él ei hallau cosas enteressantis i utis pa la reconocéncia i concenciación social del estremeñu. Nesti primel endilgui vos bicharé a tentu la lei sobri la que se sostriba la reconocéncia i proteción la muestra luenga, pos eno que respeta al enmarcaeru legal, avemus reconocéncia en quantu bien cultural i moaliá lingüística, andi se precura conocimientu i respetu. Emprencipiamus pola lei que a tolos españolis albarca, la Constitución española . Aquina mos acogemus a dos artículus prencipalmenti: • Art. 3.3. La riqueza de las distintas modalidades lingüísticas de España es un patrimonio cultural que será objeto de especial respeto y protección . • Art. 20.3. La ley regulará la organización y el control parlamentario de los medios de comunicación social dependientes del Estado o de cualquier ente público y garantizará el acceso a dichos medios de los grupos sociales y políticos significa...

Tony Alcarria á espubricau oi un articulinu sobri el autu el passau Sábau en La revista de Miajadas . Enclui angunus santus de quandu empençó la comferéncia i parafrasea las parabras el presienti l'associación. Podís leel el articulinu aquina .

Doi dende aquí las grácias a la Asociación Cultural Pablo Gonzálvez, en especial, al su presienti Bienveniu i a la su família, pol tratu recebiu i atorgalmi esta esperéncia. Tamién agraeçu a los miembrus la associación i algotrus vezinus de Mijadas el poel assestil a la chalrina. Tamién m'alegró muchu la assisténcia Antonio Garrido Correas , el traduziol d' El Prencipinu . La chalra ahiló sin trabancu i a la final s'abrió un debatinu sobri las custionis tratás, andi el púbricu palró, preguntó, hizu osselváncias. Temas comu el polqué essi dispréciu al estremeñu, el desaculagi pol parti las almenistracionis competentis, el pobrema las luengas en España, las destintas variantis ortográficas que se gastan ena literatura aparecierun i se relatarun con ánimu. Mesmu, se mentarun angunas cosinas en estremeñu. Anque el autu no cuentó con mucha propaganda i esta hue tardia (ena mesma tardi mos enteramus de que lo mentavan en un articulinu nel Hoy ), vinun genti bastanti. Comferenci...

Acabu de subil el archivu PDF con el primel númiru de los Cuadernos de Gramática Extremeña . Estus quaerninus vienin huendu aspécii los artículus que pongu nel Cúyu?, pero aquí están recadaus i nel hormatu en que ya estais acostumbraus. Pa ponel mas faci la devulgación el estremeñu i pa dil alantrandu la Gramática , estus quaerninus precurarán tocal temas pocu conocius, hallauras, normas, ec. a tentu la muestra luenga, comu vengu hiziendu paquí. Quiu asseñalal tamién que estus quaerninus me gustaria que hueran colaborativus. Quien quiera escrevil un articulinu a tentu el estremeñu, puei colaboral. Pa essu mandaimi angún correinu, que vos endilgui eno que huera mestel. Podís descargalvus el primel númiru el CGE achuchandu aquí . Cuaderno de Gramática Extremeña I by Ismael Carmona García is licensed under a Creative Commons Reconocimiento-No comercial-Sin obras derivadas 3.0 España License .

El próssimu Sábau dia 21 Noviembri vo a dal una chalrina en Miajás a tentu el estremeñu. Tocaré custionis generalis sobri dóndi vien el estremeñu, la literatura en esta luenga, la su preséncia ena Redi i la concéncia lingüística. La chalra es en el Complejo Cultural Palacio Obispo Solís de Miajás. Asperu que los enteressaus puean assestil, la entrá es de baldi. Títulu: El estremeñu pol Ismael Carmona García. Lugal: Complejo Cultural Palacio Obispo Solís, c. Real 28, Miajadas. Ora: 20:00 h. Olganiza: Asociación Cultural Pablo Gonzálvez. Entrá: Libri.

El muestru amigu Wifredo mos ofreci otru nuevu vídiu conas parabras vivas que gastan pa Garrovillas. Muchas grácias, compañeru, asperu que saquis mas vidinus destus! amus a palral un poquinu 4 from dotoljoskin on Vimeo .