Las coloris dela governança

Izin los antiguus que enantis delos brancus governar, lo hizun los de raza negra i enantis los dela raza roxa. Las porfías, caías i renacencias que ván arreglu los ciclus no entiendin de coloris. Essas coloris namás son parti dela coltura. El propiu Chamizo dixu que semus pardus, cumu si mos escamuflaramus astilu perdís. Los que se arrebujan en banderas nacionalis agarran las ideas que train essas banderas i llevan essas coloris eno que comin, eno que vistin i eno que calçan. Ca color senifica una cosa i essi senificau múa con el correr del tiempu, delas ideas i delas colturas. Pal negru el demoñu es brancu, pal brancu el demoñu es negru, un axedrés continu ondi tolo que es buenu i tolo que es malu pretenecin al mesmu tableru i juegan sigún el turnu.

El arquitu-de-Santiagu en Val-dela-Calçá

Los que acolocan banderas chinas con coloris nacionalis, banderas con marcas de cerveza con essas mesmas coloris, arquitus-de-Santiagu con enseñas dás, ropa con santus de marcas que deverían de pagar pola propaganda o pulseras hipis d'animalis muertus manifiestan un afán de pretenencia, un agarraeru morriñosu i una capacidá de sentir-si igual al otru quandu se tien un odiu común. No estanti, la sociedá ogañu es auténticamenti hurriña, suya i esuísta en unus tiempus ondi lo prencipal es la comuniá.

Agarrar un símbulu, tracamundeá-lu o mesmu çaleá-lu es encender el tútanu cumu una cañaherra, desaforigar-si en un arrebati que compartin los que odian las mesmas cosas. La comuniá agora es namás del mal común sin comprender que tó es cumu á de ser. Ara, sentir odiu es la forma más faci de hazer-si endevrinu i por muchas banderas que arrebujin los cuerpus, las casas i mesmu la cara, no averá segurança nenguna: das a entender al mundu enteru quál es el tu mieu i que si tocan essi ataeru, t'esboronas.