La Raya abierta

Estremaúra siempri hue territoriu rayanu dendi que le pusun el nombri essi: enantis las rayas colo que es agora Portugal no essestían. Verdaeramenti, las custionis d'arrayus namás las entiendin las pessonas... i drentu delas pessonas, las que sientin los ergullus vacus delas nacionis. No sabin delas lindis más que los machus que marcan.

Ríu Guadiana dendi la Puenti Palmas, en Bajós

Oi s'ajuntarun en sitius nombraus de Bajós i d'Elvas essus machus que dan en abrir i fechar formi las comenencias. Ogañu por causa delos virus, antañu por guerras que naidi entendió, peru que muchus sufrierun. L'alcáçava de Bajós i el castillu d'Elvas, sitius que estavan enantis ala mira i que eran d'enhusmamientus solóbrigus, oi huerun llavis del visiteu i el comerciu, hotrileu de perras.

Ser esuísta i no aprudentar-si quandu la clisi sanitaria has abrir lo inabrivli. Essas comenencias delas que dependi el estalachi económicu i social puein sacar lo mejor i lo peor dela genti. Dela mesma manera que antañu cayerun puentis, agora los alevantan i dispués los volverán a caer, porque delo que la genti aprendi no es delos trompeçonis de patrás: essu s'olvía ligeru. Acelerar-si, açogar-si, çalear en el desmandi de ser pessona umana no trai aprendeeru nengunu. La coltura que s'arrastra namás agatea las gracis deque se has un dessamin éticu: tolo demás son tambaleteus i zangarrear sin assientu ni rumbu.