43 graus

Dendi que emprencipió el veranu astronómicu, Estremaúra s'asa. La hincaera del anticiclón has que la parti del ponienti peninsular sufra tola huerça dela calor, una calor que s'alarga los días i los días. Enas Vegas Baxas del Guadiana sabemus mu bien dela calor: el airi dexa de correr del ponienti, pola siesta al sol cogi los 50 graus i ala sombra 43. Los gorriatus se cain delos níus asfissiaus, las chicharras s'aposan enos techus i el ambienti es inresestivli. Dan las dozi dela nochi i la una i la flama sali del suelu con más dañu i malicia que los fínfanus... esperandu a que refresqui alas cincu o las seis, enantinu del sol arrayar i vuelta i da-li.

Postura a 40 graus en Val-dela-Calçá

Dispués duna semana ondi los telmómetrus no abaxarun delos 40 de mássima i otrus sieti días aparentis alos que passarun que vendrán, el aginaeru, la cansera, la galvana i la falta de sueñu afeta al caraiti. L'apromación se pega al cuerpu. La sedi no se calma ni con agua, ni con sandía, ni con fruta nenguna. El ençochamientu es obrigatoriu, menus palos jornalerus del campu i los arvañilis que llegan a casa colos biembrus renegríus i la cabeça mareona.

Alogu inciendus enos terramplenis, enos rastrojalis, enos montis, enos pinaris.... andiquiera, porque Estremaúra está esprimentandu tolo malu del desiertu porque se lo buscó. Dispués de cientus d'añus d'envertir la tierra en pastus pa ganaus, de arramplar con tolos bosquis, de poner cerealis palos animalis comer, d'escuajar montis, de cautivar sin descansu las tierras de vega, de premitir la postura de ucalitus i pinus, de talar las riberas, de defiar las corrientis d'agua, de esplotar, por fin, ca canchal, ca costana, ca mesa i ca vega, lo que mos quea son pragas de fínfanus, de cocarachas, de sieticuerus i de camalotis.

 

Tó namás paque las ansias de carnacha llenin la coruja. Estremaúra: demasiau campu i tó pa una andorga que alampa por carroña. Quandu digu que los 43 graus son por comer carni, estudiin la frasi los que prefierin que los tocinus no le súin embaxu del airi acondicionau comiendu chicha. Tenemus lo que mos merecemus, namás son equilibrus delos tiempus. Quandu ena fuga dela calor te quexis, namás es el mundu dandu-ti el tu premiu por çaleá-lu, emporcá-lu i rebentá-lu. Deque l'arena te tapi el lumbral, son las cenizas delos animalis que murierun por dar-ti gustu a ençalamar-ti las andalias. Quantis que vaigas a echar manu del barril i no te pingui d'agua fresca el gargüeru por ver envenenau los pozus, saberás que la sedi puei ser una condición inreparavli.