Las cocarachas fotofóbicas i la katsaridafobia

Caqual tien mieu duna cosa: las cocarachas i los inorantis dela lus (con perdón delas cocarachas) i la genti delas cocarachas. Quandu un enxambri de corianas se passea tranquilamenti pola paré del vati o pol encerau dela calli, namás hazi falta que da-li la ora i seguir palantri. La naturaleza mos huerça a convivir con estus bichinus, lo mesmu que las hormigas, las arañas, los morgañus, los fínfanus, los lácarus o las chicharras enas casas. Qué mos esperamus si tenemus tó colonizau! O convivimus o mos matamus motamenti.

Periplaneta americana ahuyendu delas curas en Val-dela-Calçá

Dendi ai muchus veranus se llevan viendu cocarachas que no son las negras chiquinas dantañu, sino unas colorás que vuelan. Alo primeru namás que salían en veranu, paquí pallí, dandu un sustu ca ves que echan a volar. Sedrá cosa del regueríu i la calor. La verdá es que se trata dela Periplaneta americana, que, comu los que siempri ponin los nombris están destinaus, no es d'Almérica, velaí es del'África. De má que esta coriana, comu otras especiis envasoras, s'estaló i s'esparramó por causa delos desmanis del comerciu, el hotrileu d'especiis i el visiteu en el andar grobal. Agora las noticias a ca no ná salin de genti a quexar-si dela praga de cocarachas, comu en Caçris o Miajás, peru es que enas Vegas Baxas la sitación es insoportavli dendi ai añus.

Cocarachas estripás i envenenás

Esti animalinu no daría castigu si no huera porteaor de tantas bacterias i parásitus por andar tol día hurgandu enas cometías, rejillas, fusca i desagüis delos umanus. Portean muchas crassis de Salmonella que puein dar gastronteriti, amás d'otras bacterias que puein poner los ojus pitiñosus, dar bandárrigus, úlçuras o numonía. Quandu llegan las caloris, milenta de cocarachas salin quandu las casas están tranquilas (no es precisu que sea de nochi, ya que s'án adatau a salir mesmu de día, enque s'enhuleran enas hiendas i rehendijas escuras de qualquiera sitiu de casa). Las solucionis caseras passan por toa crassi de venenu i desinfetantis: amoniacu, lexía, polvus, ligas... Las que dan los responsavlis monicipalis i los ayuntamientus alas pragas son las curas delas alcantarillas con toa crassi de polvus, liquius i çorreras con inseticida, apreviniendu, ena fuga dela calor en veranu o quandu llega la toñá. La custión es que, fueraparti dela mortandá de cocarachas que se quean estirantás andiquiera envenenás, los animalis que alogu s'alimentan delos sus cuerpus comu los santorrostrus o las hormigas, tamién s'envenenan, si no contamus con gatus, páxarus o perrus que puean caçá-las quandu estén morimundas.

Entovía las pessonas no án síu escapás de hazer un mundu más saluavli pa ellas propias porque essu no essisti: la naturaleza siempri buscará la manera de equilibrar la sitación, con pragas, con virus o con sequías o tó ala ves, cumu passa agora. Hazer del mundu un comerciu ondi tó se compra i se vendi es lavrar un ataúl pa tolas especiis, mesmu nusotrus. Tener katsaridafobia lo mesmu es el mecanismu de mantener-mus largu delas malotías que train las cocarachas, peru quandu las cocarachas son otrus abitantis más dela casa por causa duna naturaleza altereá es mester hazer un dessami i tasmear i buscar solucionis que no espongan ni a umanus ni a animalis. Envenenar es el caminu faci, dañinu pa nusotrus i nefastu pal restu d'animalis. Pisá-las, no arregla ná, más, la contaminación sigui aí i, si son hembras, has que la ueva quei en el sitiu i empeora la sitación. La única solución particular es la de sacá-las de casa i llevá-las a un sitiu que no pongan en peligru a naidi (jardín, solar, campu) i que sigan cola su vida, ata que s'avrigüi cómu aprevenir de verdá la praga sin precisar de venenus ni otrus animalis.