La chumbera i l'alambri

Adatación es ser aparenti alas circustancias. Lo contrariu es calamorrería i muerti. Quien sobrevivi es por muar pa ver hallau el mó i la manera de dir cola corrienti, sin aginaerus. Una forma de crecer por drentu i por huera que llevi a ser derechu ena retortuña es el trunfu dela naturaleza.

Chumbera ena carretera d'Azituna, en Montermosu

En estus tiempus ser aparenti alas circustancias es hondear con el egoísmu de ser pessona (la pessona es una máscara i revestir-si de máscara es hazer dela vida un antrueju) i valorear la empatía de ser endividuu en sociedá. Deque veu la genti escuseandu las buenas acionis, peru torteandu las acionis ajenas i aperguñandu las intencionis propias en baxu dela requemación de vivir por mé delos demás, me s'aprimi el entusiasmu de ver la genti pular por sí propia. Essa mordahustés de querer sin voluntá i d'aguarreu mortuñu que se respira no da p'abarcar-si alo que ai: es la contiesta encavá i tristi duna sociedá cansá, mareá i desnortá, que no has por ahilar cumu no sea pola voluntá ajena.

Hincar-si en una idea, acivarrar-si en el ideal apregonau de genti que está por cima en el barajeu sicológicu o quear-si namás que ala recachera no es ambientar-si, es morir o hazer-si el muertu. Sin embargu, la naturaleza solo concedi hazer-si el muertu quandu ai amenaza de muerti i quien premanecin ahonguillaus en estus tiempus están abocaus a envertir-si en zombis, cuconis veleterus sin voluntá nenguna porque el mieu i la galvana los púu. Agora adestrar-si senifica procurar la verdá entre las alambris, con tentigués, crivandu i tasmeandu, con tientu, aprudenta-mus i mirandu por que los que están atrás atopin la verea con endirgu i aprender delos que están por delantri en silenciu.